InfoHub Logo

وقۋ-اعارتۋ ءمينيسترى اسحات ايماعامبەتوۆ مۇعالىمدەردى كاسىبي مەرەكەمەن قۇتتىقتادى.

ول بۇل جايىندا ءوزىنىڭ Telegram پاراقشاسىندا جازدى.

«قىمباتتى ارىپتەستەر! سىزدەردى كاسىبي مەرەكەمەن شىن جۇرەكتەن قۇتتىقتايمىن. ۇستاز - ول تەك ماماندىق قانا ەمەس، سونىمەن بىرگە ارنايى اعارتۋشىلىق ميسسيا. سىزدەر كۇن سايىن بالالاردى ءبىلىم نارىمەن سۋسىنداتىپ، ولاردىڭ دارىندارىن اشۋعا، دۇرىس قۇندىلىقتاردى بويلارىنا سىڭىرۋگە كومەكتەسەسىزدەر. بۇگىنگى كۇنى ەلىمىزدەگى ءبىلىم بەرۋ جۇيەسى - 500 مىڭعا جۋىق ۇستازىمىز ەڭبەك ەتەتىن ۇلكەن سالا. قاسىم-جومارت كەمەل ۇلى توقايەۆ پرەزيدەنت بولىپ سايلانعاننان كەيىن بىردەن مۇعالىمدەر كورپۋسىن قولداۋ ءۇشىن بارلىق شارانى قابىلداۋدى تاپسىردى. وسىلايشا 2019 جىلى «پەداگوگ مارتەبەسى تۋرالى» زاڭ قابىلدانىپ، مۇعالىمدەردى شامادان تىس ەسەپ بەرۋدەن، مىندەتىنە جاتپايتىن فۋنكسيالاردان بوساتۋعا جاعداي جاسالدى. بىلىكتىلىك ساناتى، ماگيستراتۋرا، سىنىپ جەتەكشىلىگى، داپتەر تەكسەرگەنى جانە ت.ب. ءۇشىن ءار ءتۇرلى قوسىمشا تولەمدەر ەنگىزىلىپ، ولاردىڭ كولەمى ۇلعايتىلدى» دەپ جازدى مينيستر.

اسحات ايماعامبەتوۆتىڭ ايتۋىنشا، مەملەكەت باسشىسىنىڭ شەشىمدەرى ارقاسىندا مۇعالىمدەردىڭ جالاقىسى بىرنەشە جىلدان بەرى جىل سايىن 25%-عا كوتەرىلىپ كەلەدى.

بيىل 25 جىلدان استام ەڭبەك ەتكەن بارلىق ۇستازعا ارنايى ماراپات تاعايىندالعان. ويتكەنى ءوز ىسىنە وسىنشا جىل ادال قىزمەت ەتكەن ماماندار ەرەكشە قۇرمەت پەن قولداۋعا لايىق.

سونىمەن قاتار 30 جىلدان استام پەداگوگيكالىق تاجىريبەسى بار مۇعالىمدەر ساناتتار مەن اي سايىنعى قوسىمشا تولەم الۋ ءۇشىن تاپسىراتىن تەستىلەۋدەن بوساتىلدى.

قىركۇيەك ايىنان باستاپ ەل مەكتەپتەرىنىڭ باسىم كوپشىلىگى بەس كۇندىك وقۋ اپتاسىنا اۋىستى. سوندىقتان مينيسترلىك وسى مەكتەپتەردىڭ مۇعالىمدەرىنە سەنبىنى قوسىمشا دەمالىس كۇنى رەتىندە بەرۋدى ءجون كورگەن.

«ەندى وزدەرىڭىزگە جانە جاقىندارىڭىزعا كوبىرەك كوڭىل بولە الاسىزدار. كەلەسى جىلى قاڭتار ايىنان باستاپ مەكتەپ، كوللەدج جانە قوسىمشا ءبىلىم بەرۋ ۇيىمدارىنداعى بارلىق پەداگوگتىڭ جالاقىسى تاعى 25%-عا وسەدى. سونداي-اق كەلەسى جىلى ەل پرەزيدەنتىنىڭ تاپسىرماسى بويىنشا بالاباقشالارداعى بارلىق تاربيەشىنىڭ جالاقىسى وسەدى. ءبىز بۇل باعىتتاعى جۇمىستى توقتاتپاي، بۇدان دا قولايلى جاعداي جاساۋدى جالعاستىرا بەرەمىز. پاندەميا كەزىندە دە وزدەرىڭىزدى لايىقتى كورسەتە بىلدىڭىزدەر. كوپتەگەن اتا-انا سىزدەردىڭ جۇمىسىڭىزدىڭ قانشالىقتى جاۋاپتى جانە قيىن ەكەنىن تاعى ءبىر مارتە ءتۇسىندى. ال بالالار ءمۇعالىمنىڭ مەيىرىمدى كوزقاراسى، جىلى ءسوزى، ونىڭ كومەگى قانشالىقتى ماڭىزدى ەكەنىن سەزىندى. مەن قالا جانە اۋىل مەكتەپتەرىنە بارعاندا ارىپتەستەرىممەن اڭگىمەلەسكەندى ۇناتامىن. سىزدەردىڭ ءبىلىم سالاسىنا ءسىڭىرىپ جاتقان قاجىرلى ەڭبەكتەرىڭىزدى كورىپ، ىستەرىڭىزگە دەگەن سۇيىسپەنشىلىكتەرىڭىز جانە ادالدىقتارىڭىز ءۇشىن العىسىمدى جەتكىزگىم كەلەدى. ۇستازدار كۇنى قۇتتى بولسىن!» دەپ تۇيىندەدى ءسوزىن وقۋ-اعارتۋ ءمينيسترى.

---