InfoHub Logo

ناۋرىز ايىندا قازاقستان اۋا رايىنىڭ قانداي بولاتىنى بەلگىلى بولدى. «قازگيدرومەت» رمك ماماندارى الدىن الا سينوپتيكالىق بولجامدى ۇسىندى. وعان سايكەس، الداعى ايدا ەلىمىزدىڭ باسىم بولىگىندە اۋا تەمپەراتۋراسى نورمادان جوعارى، ال جاۋىن-شاشىن مولشەرى نورمادان ارتىق بولادى دەپ كۇتىلۋدە.

بۇل تۋرالى Infohub.kz اقپارات اگەنتتىگى حابارلايدى.

اي ىشىندە اۋا رايى تۇراقسىز بولادى

مامانداردىڭ ايتۋىنشا، ناۋرىز ايىندا اۋا رايىنىڭ تۇراقسىز سيپاتى بايقالادى. ەلىمىزدىڭ سولتۇستىك جارتىسىندا نەگىزىنەن قار، ال باتىس جانە وڭتۇستىك وڭىرلەردە جاڭبىر مەن قار ارالاس جاۋىن-شاشىن بولادى. كەي كۇندەرى جەل كۇشەيىپ، بوران سوعىپ، تۇمان ءتۇسىپ، كوكتايعاق قۇبىلىستارى دا ورىن الۋى مۇمكىن.

سولتۇستىك پەن شىعىستا قىس جالعاسادى

ەلىمىزدىڭ سولتۇستىك، شىعىس جانە ورتالىق ايماقتارىندا ناۋرىز ايى قىستىڭ جالعاسى رەتىندە سەزىلەدى. بۇل وڭىرلەردە سۋىق اۋا رايى، قار، بوران، تۇمان مەن كوكتايعاق جيىلەپ، قىسقى سيپات ساقتالادى. دەگەنمەن، ايدىڭ ءبىرىنشى ونكۇندىگىندە تەمپەراتۋرا بىرتىندەپ كوتەرىلىپ، تۇندە -28-38 گرادۋستان -5-10 گرادۋسقا دەيىن، كۇندىز -10-20 گرادۋستان 0-8 گرادۋسقا دەيىن جىلىنادى. ونكۇندىكتىڭ سوڭىندا تەمپەراتۋرا قايتا تومەندەۋى ىقتيمال.

باتىس پەن وڭتۇستىكتە كوكتەم ەرتە سەزىلەدى

باتىس وڭىرلەردە ناۋرىز ايى دا اۋىسپالى سيپات الىپ، سۋىتۋ مەن جىلىتۋ كەزەڭدەرى الماسىپ وتىرادى. ءبىرىنشى ونكۇندىكتە تۇندە اۋا تەمپەراتۋراسى -5-15-تەن 0-5 گرادۋسقا دەيىن، كۇندىز 0-8-دەن -3+7 گرادۋسقا دەيىن وزگەرەدى. ال وڭتۇستىك وڭىرلەردە ءبىرىنشى ونكۇندىكتە تۇندە تەمپەراتۋرا -8+2 گرادۋسقا، كۇندىز +5+15 گرادۋسقا دەيىن كوتەرىلەدى.

ايدىڭ ەكىنشى جانە ءۇشىنشى ونكۇندىكتەرىندە ەلىمىزدىڭ سولتۇستىك، ورتالىق، شىعىس بولىكتەرىندە تۇندە تەمپەراتۋرا -3+2-دەن -8-15 گرادۋسقا دەيىن، كەي جەرلەردە -20-25 گرادۋسقا دەيىن تومەندەسە، كۇندىز +5+13-تەن 0-8 گرادۋسقا دەيىن وزگەرەدى. وڭتۇستىك-باتىس جانە وڭتۇستىك قازاقستاندا كۇندىز كەي كۇندەرى +13+22 گرادۋسقا، ال ەڭ وڭتۇستىك وڭىرلەردە +27 گرادۋسقا دەيىن جىلىنۋى مۇمكىن. الايدا، انتيسيكلون اسەرىنەن قىسقا مەرزىمدى سۋىق تولقىندارى دا كۇتىلۋدە.