InfoHub Logo

XXV قىسقى وليمپيادا ويىندارىندا نورۆەگيا قۇراماسى جالپى ەسەپتە ءبىرىنشى ورىن الدى. ءبىراق بۇل ەل سپورتشىلارىنا مەدال ءۇشىن اقشالاي سىياقى بەرمەيدى. ولاردىڭ تابىس فورمۋلاسى قانداي؟

بۇل تۋرالى Infohub.kz اقپارات اگەنتتىگى حابارلايدى.

نورۆەگيانىڭ جەڭىس فورمۋلاسى

ميلان مەن كورتينادا وتكەن 2026 جىلعى قىسقى وليمپيادا ويىندارىندا نورۆەگيا قۇراماسى 18 التىن، 12 كۇمىس جانە 11 قولا، بارلىعى 41 مەدال يەلەنىپ، ءبىرىنشى ورىندى يەلەندى. ەكىنشى ورىنعا اقش (12-12-9، بارلىعى 33 مەدال)، ءۇشىنشى ورىنعا يتاليا (10-6-14، بارلىعى 30 مەدال) جايعاستى.

اقشا ەمەس، جۇيەلى قولداۋ

قىزىعى سول، نورۆەگيادا وليمپيادا جۇلدەگەرلەرىنە ءبىرجولعى اقشالاي سىياقى قاراستىرىلماعان. ونىڭ ورنىنا، سپورتشىلار جىلىنا شامامەن 17 مىڭ دوللار (8،4 ملن تەڭگە) كولەمىندە جىلدىق شاكىرتاقى الادى. بۇل قاراجاتتى بىرنەشە جىل بويى الۋعا بولادى. Forbes باسىلىمىنىڭ حابارلاۋىنشا، نورۆەگيالىقتار ناقتى ناتيجە ءۇشىن بەرىلەتىن بونۋسقا ەمەس، دايارلىقتى جۇيەلى قارجىلاندىرۋعا، فەدەراسيالاردىڭ جۇمىسىنا جانە سپورتشىلاردى ۇزاق مەرزىمدى قولداۋعا باسىمدىق بەرەدى. ۇلىبريتانيا مەن يرلانديادا دا وسىنداي جۇيە قولدانىلادى.

باسقا ەلدەردەگى سىياقى

اقش-تا التىن مەدال ءۇشىن 37 500 دوللار (18،5 ملن تەڭگە)، كۇمىس ءۇشىن 22 500 (11،1 ملن تەڭگە)، قولا ءۇشىن 15 000 (7،4 ملن تەڭگە) تولەنەدى. ويىنداردىڭ يەسى رەتىندە يتاليا التىن مەدال ءۇشىن شامامەن 213 مىڭ دوللار (105،4 ملن تەڭگە) قاراستىرعان.

سالىستىرمالى تۇردە، قازاقستانداعى سىياقى مولشەرى جوعارى: التىنعا – 250 000 دوللار (123،7 ملن تەڭگە)، كۇمىسكە – 150 000 (74،2 ملن تەڭگە)، قولاعا – 75 000 (37،1 ملن تەڭگە). بيىلعى وليمپيادادا قازاقستاندىق مانەرلەپ سىرعاناۋشى ميحايل شايدوروۆ التىن مەدال يەلەندى.