InfoHub Logo

بلوگەرلەر ەربولات جانابىلوۆ پەن ەلميرا تولەگەنوۆانىڭ ءىسى بويىنشا سوت پروسەسى مارەسىنە جەتىپ كەلەدى. جۇما كۇنى، 24 ساۋىردە، ەلميرا تولەگەنوۆا سوتتا سوڭعى ءسوز سويلەدى.

بۇل تۋرالى Infohub.kz اقپارات اگەنتتىگى حابارلايدى.

ءوز سوزىندە ەلميرا تولەگەنوۆا سوتتان وزىنە جانە جۇبايىنا باس بوستاندىعىنان ايىرۋمەن بايلانىستى ەمەس جازا تاعايىنداۋدى ءوتىندى.

«ومىرلىك ساباق الدىق»

«بولعان جاعدايعا تولىق جاۋاپكەرشىلىكتى سەزىنەمىز. ءوزىمىز ءۇشىن ۇلكەن ساباق الدىق، بۇل بىزگە ومىرلىك ساباق بولدى. زاڭدى بۇزعانىمىز ءۇشىن شىن جۇرەكتەن وكىنەمىز. ماعان جانە جۇبايىما باس بوستاندىعىنان ايىرۋمەن بايلانىستى ەمەس جازا تاعايىنداپ، جەڭىلدىكپەن قاراۋدى سۇرايمىن»، - دەدى تولەگەنوۆا.

سوتتالۋشى سوڭعى سوزىندە سوت كەڭەسۋ بولمەسىنە شىقپاس بۇرىن پروكۋرورمەن مامىلەگە كەلۋ تۋرالى ءوتىنىشحات ءبىلدىردى.

بلوگەرلەر جانابىلوۆتار كەشە سوتتا سوڭعى ءسوز سويلەۋى ءتيىس ەدى، الايدا تولەگەنوۆا دەنساۋلىعىنا بايلانىستى سوتقا كەلمەگەنىن جانابىلوۆتىڭ ادۆوكاتى حابارلاعان بولاتىن. وسىعان بايلانىستى پروسەسس بۇگىنگە اۋىستىرىلدى.

جانابىلوۆتارعا نەمەن ايىپ تاعىلدى؟

تانىمال بلوگەرلەرگە ق ر قىلمىستىق كودەكسىنىڭ 214-بابى، 2-بولىگى، 2-تارماعى بويىنشا «زاڭسىز كاسىپكەرلىك» جانە 218-بابى، 2-بولىگى، 1-تارماعى بويىنشا «قىلمىستىق جولمەن الىنعان اقشانى نەمەسە وزگە دە مۇلىكتى زاڭداستىرۋ (جىلىستاتۋ)» باپتارى بويىنشا ايىپتار تاعىلدى.

پروكۋرور بلوگەرلەرگە قانشا جىل سۇرادى؟

مەملەكەتتىك ايىپتاۋشى ولجاس قايرۋللايەۆ سوت تالقىلاۋى بارىسىندا ەكى سوتتالۋشىنى دا بارلىق تاعىلعان باپتار بويىنشا كىنالى دەپ تانىپ، ولارعا مينيمالدى قاۋىپسىزدىك مەكەمەسىندە 4 جىل باس بوستاندىعىنان ايىرۋدى، سونداي-اق مۇلىكتەرىن تاركىلەۋدى سۇرادى. بۇل رەتتە ەلميرا تولەگەنوۆانىڭ كامەلەتكە تولماعان بالالارى بار ەكەنىنە بايلانىستى ونىڭ جازاسىن ءبىر جىلعا كەيىنگە قالدىرۋ ۇسىنىلدى.

جانابىلوۆتاردىڭ سوتى

16 ناۋرىزدا استانادا تانىمال بلوگەرلەر ەربولات جانابىلوۆ پەن ەلميرا تولەگەنوۆانىڭ ءىسى بويىنشا باستى سوت وتىرىسى باستالدى. جۇبايلار جۋرناليستەردىڭ سوت تىڭداۋلارى كەزىندە ولاردى بەينەكامەراعا جانە فوتوعا تۇسىرۋىنە قارسى شىقتى.

«مەنىڭ ۇلكەن بالام مەكتەپكە بارادى، ال بالاما ءبىزدىڭ جەكە ومىرىمىزگە قاتىستى سۇراقتار قويادى»، - دەپ ءتۇسىندىردى تولەگەنوۆا جۋرناليستەرگە.

بلوگەرلەردىڭ ادۆوكاتى سوت وتىرىسىن جابىق رەجيمدە وتكىزۋ تۋرالى ءوتىنىشحات ءبىلدىردى، پروكۋرورلار بۇعان قارسىلىق ءبىلدىردى. ناتيجەسىندە سوت ءوتىنىشحاتتى قاناعاتتاندىرۋدان باس تارتتى. سونداي-اق، سوت وتىرىسى كەزىندە جانابىلوۆتىڭ ادۆوكاتى سوتتان ءىستى پروكۋرورعا قايتارۋدى سۇرادى.

بۇعان دەيىن سوتتا پروكۋروردىڭ اعا كومەكشىسى ولجاس قايرۋللايەۆ ايىپتاۋ اكتىسىن وقىپ بەرگەن بولاتىن. وندا جانابىلوۆتار ۇسىنعان سىيلىقتار مەن جۇلدەلەر قاتىسۋشىلاردىڭ اقشاسى ەسەبىنەن الىنعانى، ال جارنامادا جۇلدە قورىنىڭ ۇيىمداستىرۋشىلاردىڭ ءوز قاراجاتى ەسەبىنەن قالىپتاستىرىلعانى تۋرالى اسەر قالدىرعانى كورسەتىلگەن. تەرگەۋ مالىمەتتەرى بويىنشا، بلوگەرلەرگە قاتىستى جوبالار ەسەپشوتتارىنا 247 ميلليون 653 مىڭ تەڭگە تۇسكەن.

22 ساۋىردە استانا سوتىندا بلوگەرلەر ەربولات جانابىلوۆ پەن ەلميرا تولەگەنوۆانىڭ ءىسى بويىنشا سوت تەرگەۋى اياقتالدى. تاراپتاردىڭ پىكىرتالاسى كەزىندە پروكۋرور بلوگەرلەرگە ناقتى مەرزىمدەردى سۇرادى.

ەستەرىڭىزگە سالا كەتەيىك، 14 ساۋىردە سوتتا بلوگەر ەلميرا تولەگەنوۆا كىناسىن ءىشىنارا مويىندادى. بۇعان دەيىن سوتتا بلوگەر ەربولات جانابىلوۆ جاۋاپ بەرگەن بولاتىن. ول سوتتا جىلاپ، كىناسىن ءىشىنارا مويىندادى.

«مەن نەگە تەك ءبىز ەكەنىمىزدى تۇسىنبەيمىن؟ بۇل انالارىمىزعا، اتا-انامىزعا وتە اۋىر تيەدى. مەن تۇسىنبەيمىن: مۇمكىن، ءبىز بىرەۋدىڭ جولىن كەستىك پە؟ مەنىڭ ورنىمدا كەز كەلگەن ادام بولۋى مۇمكىن. بۇگىن ەمەس، ەرتەڭ. مەن ءتىپتى جاۋلارىما دا مۇنداي جاعدايعا تاپ بولىپ، سوت الدىندا تۇرۋدى تىلەمەيمىن»، - دەدى ول.