وكىنىشتى كوپ ءومىر كەتكەن ءوتىپ،
وتكىزدىك ءبىر نارسەگە بولماي جەتىك.
ويشىلدىڭ مەن دە ساندى ءبىرىمىن دەپ،
تالاپ، ويسىز، ماقتاندى قالدىم كۇتىپ.

ۇلگىسىز جۇرتتى ۇيرەتىپ، قالدىق كەيىن،
كوپ ناداندار وزىنە تارتار بەيىم.
ارىلماس ادەت بولدى كۇلكىشىلدىك،
ىرجاڭ-قىلجاڭ يت مىنەز دەگەندەيىن.

تۋرا ءتىلدى كىسىنى دەيمىز ورىس،
جيرەنىپ، جىلماڭدىقتى دەمەس بۇرىس.
جىلپىلداقتان ايرىلىپ، سەنىسە الماي،
ادامدىقتى جوعالتار اقىر بۇل ءىس.

سەنىمى جوق سەرمەندە1 سىردى بۇزدى،
انىق تازا كورمەيمىز دوسىمىزدى.
قىلت ەتپەگە كوڭىلدىڭ كەشۋى جوق،
جۇرەگىندە جاتادى وكپە سىزى.

دوس-اسىقتىڭ بولمايدى بوتەندىگى،
قوسىلعان بوساسپايدى جۇرەك جىگى.
ءبىزدىڭ دوسپىز، اسىقپىز دەگەنىمىز –
جالعاندىقتان جاسالعان كوڭىل جۇگى.

سەنىسكەن دوسىم دا جوق، اسىعىم دا،
اقىرى ولەڭ قىلدىم، جاسىدىم دا.
كورمەگەن كوپ دۇنيە كول كورىندى،
كىرلەمەگەن كوڭىلدىڭ اشىعىندا.

قۇداي بەرگەن بۇل دوستىق – كاننىڭ2 ءبىرى،
مۇڭداسقاندا قالمايدى كوڭىل كىرى.
قولدان دوستىق جاساپ ەم بولار-بولماس،
يتمۇرىنداي ناداننىڭ جىرتتى ءبىرى.

سول دوستى سايا تاپپاي ىزدەيدى جان،
جوقتايدى كۇڭىرەنىپ، قوزعالىپ قان.
جاۋ جابىلسا بۇزىلماس جان كورمەدىم،
ارتىق جولداس تاپپادىم تاتۋلىقتان.


1 سەندەلىپ بوسقا جۇرگەن ادام. نەگىزگى پارسىنىڭ شاھربانت دەگەن سوزىنەن شىققان.
2 كان (ارابشا) – كەن، كەنىش (رۋدنيك). اۋىسپالى ماعىنادا: مەيىرىمدىلىك باستاۋى، قايىرىمدىلىق، ىزگىلىك؛ نەگىزگى ماعىناسىندا قۇدايدىڭ ەپيتەتى.

---