InfoHub Logo

- قابىرعا گازەتىنە ولەڭ جازشى، - دەدى بىردە بۇعان قىزدار. - ءبىرىنشى مامىر مەرەكەسىنە ارناپ شىعارۋىمىز كەرەك.

مەكتەپ قابىرعاسىندا جۇرگەندە دە، وسىندا كەلگەلى دە، ولەڭ جازۋ دەگەندى بىلاي قويعاندا، قالام ۇستاي قويايىنشى دەگەن وي ارمان-ماقساتىندا دا بولىپ كورمەگەن ەدى. بۇلاردان ءبىرىنشى كۋرستا شىعارما جۇمىسىن العانى بار. بار بولعانى ءبىر-اق رەت. سول جولى وزدەرىنەن شىعارما جۇمىسىن العان اعايى:

- سەن وسى اڭگىمە جازبايسىڭ با؟ - دەدى.

بۇل جازبايتىندىعىن ايتتى.

- شىعارما جۇمىسىڭا قاراپ وتىرىپ، اڭگىمە جازاتىن بالا شىعار دەپ ويلاپ ەدىم.

وقۋىن ءبىتىرىپ مەكتەپكە ءمۇعالىم بولىپ كەتكەن جىلىنىڭ ەكىنشى جىلىندا مۇنىڭ 1456 جىلدى نەگىزگە الا وتىرىپ، قازاق حاندىعىنىڭ 540 جىلدىعىنا ارناپ ءوزى قىزىعۋشىلىعىمەن جازعان داپتەرىنە كوپشىلىك تە قىزىعۋشىلىق تانىتىپ، جۇمىلا ءجۇرىپ مادەنيەت ءۇيىنىڭ ساحناسىنا قويىپ شىققانى بار. وسى شارادان كەيىن ەكى اي وتكەندە، بىردە مەكتەپ ديرەكتورى پەدسوۆەتتىڭ ۇستىندە 8 ناۋرىز مەرەكەسىنە وراي وتكىزىلەتىن ءىس-شارانىڭ جۇمىستارىنا بايلانىستى ءۇش ادامنىڭ ءبىرى رەتىندە بۇعان دا جۇمىس جۇكتەدى. پەدسوۆەت 8 ناۋرىز مەرەكەسىنە بايلانىستى ەكى جۇمىستى باعدارلاعان ەدى. ءبىرى - ساحنادا وتىلەتىن "قىز سىنى" بايقاۋى، ەكىنشىسى - نازىك جاندى ۇستاز اپايلاردىڭ قۇرمەتىنە ارنالعان داستارقان مازىرىنە ورايلاستىرىلىپ وتكىزىلەتىن مەرەكەلىك ءىس-شارا. ءبىراق وزىنە تاپسىرىلعان وسى ەكى ءىس-شارانىڭ دا باعدارلاماسىن بۇل جازبايتىن بولدى. وزىنە ءاۋ باستا تاپسىرىلعان جۇمىستى جازبايتىن بولعاننان كەيىن، ەندى بۇل 8 ناۋرىز مەرەكەسىنە بايلانىستى قايتسە دە باسقا ءبىر دۇنيە جازسام دەگەن ويدا بولدى. سونداعى دىتتەگەن ويى وسى مەرەكەگە وراي ولەڭ جازىپ كورسەم دەگەن وي ەدى. پاراققا قازاق ارۋلارىنىڭ قۇرمەتىنە ارنالىپ جازىلعان ولەڭى ءتۇستى. وتكەندەگى داپتەردەگى دۇنيەنى وسىنداي جۇمىستاردا تاجىريبە جيناپ قالعان مادەنيەت قىزمەتكەرى بولىپ ىستەيتىن جىگىت: "مىناۋ سەناريي عوي. مۇنى ساحناعا ءوزىم دايىنداپ شىعارامىن"، - دەپ، ءارى قاراي كوپشىلىك بولىپ قاۋمالاسىپ الىپ كەتكەن ەدى. ەندى پاراقتاعى دۇنيەنى مۇعاليما ارىپتەسىنە الىپ بارماق بولدى. سەبەبى بۇل مۇعاليما ارىپتەسى ۇنەمى مەكتەپتەگى ءىس-شارالارعا اتسالىسىپ جۇرەتىن، سولاردى تۇراقتى تۇردە جۇرگىزەتىن جانە كوركەمدەپ جاتقا ولەڭ وقيتىن ۇستاز ەدى.

ارىپتەسى ولەڭدى وقىپ تۇردى. سونان سوڭ: "جاقسى بولدى عوي، مەن ءوزىم ەرتەڭ جۇرگىزگەلى تۇرعان "قىز سىنى" بايقاۋىنىڭ ورتاسىندا كوركەمسوز رەتىندە وقۋعا ولەڭ ىزدەگەلى تۇر ەدىم. ەندى مەن مىنا ولەڭدى وقيمىن"، - دەدى.

ەرتەڭىنە ارىپتەسى "قىز سىنى" بايقاۋىنىڭ ورتاسىندا مۇنىڭ ولەڭىن ءوزىنىڭ ولەڭ وقيتىن مانەرىمەن كوركەمدەپ وقىپ تۇردى. كوپ ۇزاماي ولەڭى اۋداندىق گازەتتىڭ بەتىندە جارىق كوردى.

---