InfoHub Logo

كەشYou توبىنىڭ تاريحىنا ارنالعان قۇجاتتى فيلم جۇرتشىلىقتىڭ نازارىن اۋدارىپ، بۇرىنعى جانجالداردى قايتا قوزعادى. الايدا، بۇل تالقىلاۋ فيلم شەڭبەرىنەن شىعىپ، ءانشى ءمولدىر اۋەلبەكوۆاعا قارسى جاپپاي قۋدالاۋعا ۇلاسىپ كەتتى.

بۇل تۋرالى Infohub.kz اقپارات اگەنتتىگى حابارلايدى.

جەلىدەگى ارانداتۋ

پروديۋسەر ارمان قارابايەۆتىڭ ايتۋىنشا، باستاپقىدا مادەنيەت يندۋسترياسىنىڭ تاريحى تۋرالى كونسترۋكتيۆتى اڭگىمە بولادى دەپ كۇتىلگەن جوبا، كەرىسىنشە، قوعامداعى اگرەسسيانى وياتقان «جارىلعىش زاتقا» اينالعان. اسىرەسە، ءمولدىر اۋەلبەكوۆانى نىساناعا العان جەلىدەگى قۋدالاۋعا «مەديا ساراپشىلاردىڭ» رەاكسياسى الاڭداۋشىلىق تۋدىرادى.

«بلوگەرلەردىڭ كەيبىر بەينەتالداۋلارىنا قاراپ وتىرساق، سىرت كوزگە وبەكتيۆتى تالداۋ سياقتى كورىنگەنىمەن، شىن مانىندە بۇل – مانيپۋلياسيا جانە جاسىرىن قۋدالاۋ. ءبىزدىڭ يندۋستريادا مۇنى «داعدارىستى پياردى پايدالانۋ» دەپ اتايدى. بۇل وتە سينيكالىق ءادىس: ادامدار ءانشىنى العاشقىدا-اق قاتتى سىنعا العان كەزدە، ونىڭ ۇستىنە جاڭا «تاۋەلسىز تەرگەۋ» نەمەسە «شىنايى تالداۋ» جاساپ جاتقانداي سىلتاۋمەن، ونى ابدەن قورلاپ، حەيت جيناۋعا تىرىسادى»، – دەيدى قارابايەۆ.

ادامدى قورلاۋ – جابايىلىق

قارابايەۆ بۇل ارەكەتتى «ولگەننىڭ ۇستىنە – ولىك مىنگەندەي» دەپ باعالايدى. ول بلوگەرلەردى «تورەشى» رولىنە ەنىپ، پروديۋسەرلەر مەن فيلم اۆتورلارى سياقتى، ءانشىنىڭ تاعدىرىنا الاڭداماي، جاپپاي قۋدالاۋدى كۇشەيتەتىنىن ايتادى.

«بىردەڭەلەردى دالەلدەۋ ءۇشىن ادامنىڭ ادامي ءقادىرىن تاپتاپ، ونىڭ ەڭبەگىن ەلەمەۋگە بولمايدى. اسىرەسە، جىلدار بويى ەل مادەنيەتىنە ۇلەس قوسقان ونەر يەسىن جاي عانا حايپ ءۇشىن جوققا شىعارۋعا تىرىسۋ – دۇرىس ەمەس. ساراپتامالىق ماقالا نەمەسە ساراپشى پىكىرى دەگەن جەلەۋمەن بەرىلگەن قۋدالاۋ، قۋدالاۋ بولىپ قالا بەرەدى»، – دەپ تۇيىندەدى پروديۋسەر.

بۇعان دەيىنگى جاعداي

بۇعان دەيىن بايان الاگوزوۆانىڭ ۇلتتىق قۇندىلىق سانالاتىن، 1970 جىلعى «قىز جىبەك» فيلمىنەن قالعان كامزولدى كيگەنى قوعامدا قىزۋ تالقىلانعان بولاتىن. بۇل جاعداي دا كوپشىلىكتىڭ نارازىلىعىن تۋدىرعان ەدى.