ونلاين-الاياقتىقپەن كۇرەسۋ ءۇشىن بانكتەرگە جاڭا تالاپتار ەنگىزىلەدى،-دەپ حابارلايدى Arysinfo.kz.

قازاقستاندا ونلاين-الاياقتىقپەن كۇرەس شارالارى كۇشەيتىلەدى. قارجى نارىعىن رەتتەۋ جانە دامىتۋ اگەنتتىگى جاڭا تالاپتار دايىنداپ، بانكتەردىڭ قاشىقتان قىزمەت كورسەتۋ پروسەسىن قاتاڭ باقىلاۋعا الۋدى كوزدەۋدە.

جوبا، اسىرەسە، دروپپەرلىك سحەمالارعا تارتىلۋ ءقاۋپى بار كليەنتتەردى باقىلاۋدى كۇشەيتۋگە باعىتتالعان. سونىمەن قاتار، قازاقستان رەزيدەنتى بولىپ تابىلمايتىن، جوعارى تاۋەكەلدى كليەنتتەرگە قاتىستى شارالار ەنگىزىلمەك.

بانكتەرگە قويىلاتىن نەگىزگى تالاپتار: كليەنتتى ەكى فاكتورلى سايكەستەندىرۋ (پاسپورتتىڭ فوتوسى ارقىلى بيومەتريانى پايدالانۋ)، "ءبىر قولعا – ءبىر تولەم كارتاسى" قاعيداتىن باقىلاۋ، قازاقستان اۋماعىندا بولۋدىڭ زاڭدىلىعىن تەكسەرۋ، كارتا شىعارىلعاننان كەيىنگى العاشقى ءۇش ايداعى بارلىق كىرىس جانە شىعىس ترانزاكسيالارىن مۇقيات باقىلاۋ.

بۇل شارالار الاياقتىق وپەراسيالاردىڭ الدىن الۋ جانە قارجىلىق قاۋىپسىزدىكتى كۇشەيتۋ ماقساتىندا قابىلدانۋدا.