InfoHub Logo

بۇل تۋرالى "استانا جاستارى" رەسۋرستىق ورتالىعىندا جاستارمەن كەزدەسۋ بارىسىندا وتباسى بانكىنىڭ باسقارما ءتوراعاسى ءلاززات يبراگيموۆا ايتىپ بەردى.

ءىس-شارا "دەموگرافيالىق ءوسۋ – ۇلتتىڭ باسەكەلەستىك ارتىقشىلىقتارىنىڭ نەگىزى" تاقىرىبىندا ۇكىمەت ساعاتىن وتكىزۋگە دايىندىق جۇمىستارى اياسىندا وتۋدە. سوندىقتان بۇگىن كەزدەسۋگە قازاقستان رەسپۋبليكاسى پارلامەنتى سەناتىنىڭ دەپۋتاتتارى دا قاتىستى. كەزدەسۋ مودەراتورى – پارلامەنت سەناتىنىڭ دەپۋتاتى نۇرتورە ءجۇسىپ.

وتكەن جىلى وتباسى بانك ("بايتەرەك" حولدينگىنىڭ ەنشىلەس ۇيىمى) 35 جاسقا دەيىنگى 24 705 قازاقستاندىققا قونىس تويىن اتاپ وتۋگە كومەكتەستى. ولارعا تۇرعىن ءۇي قۇرىلىس جيناق جۇيەسى شەڭبەرىندە 414 ملرد تەڭگە سوماسىنا زاەمدار بەرىلگەن. نەگىزىنەن جاس قازاقستاندىقتار ءبىر نەمەسە ەكى بولمەلى پاتەر ساتىپ الدى. مۇنداي تۇرعىن ءۇيدىڭ ورتاشا قۇنى 19،7 ملن تەڭگەگە تەڭ.

بانكتىڭ ستاتيستيكاسى بويىنشا 18-35 جاس ارالىعىنداعى 1،3 ملن قازاقستاندىق باسپاناعا مۇقتاج.

بۇل ماسەلە اسىرەسە وڭىرلەر مەن مونوقالالاردا وتكىر بولىپ تۇر. لايىقتى جۇمىس پەن تۇرعىن ءۇي جاعدايلارىنىڭ بولماۋىنا بايلانىستى حالىق ءىرى قالالارعا قونىس اۋدارادى. سوڭعى 5 جىلدا بۇل ءۇردىس كۇشەيە ءتۇستى. وسىعان بايلانىستى حالىقتىڭ ەڭ كوپ ءوسۋى استانا، الماتى، شىمكەنت قالالارى مەن اقتوبە وبلىسىندا بايقالادى.

جاستاردى قولداۋ جانە وتباسىنىڭ ىشكى كوشى-قونىن ازايتۋ ءۇشىن بانك قالالار مەن وبلىستاردىڭ اكىمدىكتەرىمەن بىرلەسىپ، جاستارعا ارنالعان ارنايى تۇرعىن ءۇي باعدارلاماسىن ىسكە قوستى.

ول ءبىرىنشى رەت الماتىدا 2017 جىلى باستالدى. سول كەزدە "الماتى جاستارى" باعدارلاماسى اياسىندا العاشقى 100 قاتىسۋشى قونىس تويىن اتاپ ءوتتى. سودان كەيىن جوباعا استانا جانە باسقا دا وبلىستار قوسىلدى. جاستار باعدارلاماسىنىڭ ارقاسىندا سوڭعى 7 جىلدىڭ ىشىندە بۇكىل ەل بويىنشا 5400 جاس قازاقستاندىق قونىس تويىن اتاپ وتۋگە مۇمكىندىك الدى. وتباسى بانك جوبانى ىسكە اسىرۋعا 22،5 ملرد تەڭگە، جەرگىلىكتى اكىمدىكتەر 75،4 ملرد تەڭگە ءبولدى. جالپى ەسەپتەگەندە جاستارعا جەڭىلدەتىلگەن نەسيە بەرۋ باعدارلاماسىنىڭ بيۋدجەتى 98 ملرد تەڭگەنى قۇرادى.

جاستار باعدارلامالارى الماتى، استانا، اقتوبە، اتىراۋ، جامبىل، جەتىسۋ، باتىس قازاقستان، قاراعاندى، قوستاناي، قىزىلوردا، ماڭعىستاۋ، الماتى، اباي، ۇلىتاۋ جانە پاۆلودار وبلىستارىندا جۇمىس ىستەپ تۇر.

باعدارلاماعا قازاقستاننىڭ 35 جاسقا دەيىنگى كەز كەلگەن ازاماتى قاتىسا الادى. ەگەر ءبىز وتباسى تۋرالى ايتاتىن بولساق، وندا ەرلى-زايىپتىلاردىڭ بىرەۋى عانا قاتىسا الادى. ءوتىنىم بەرۋ كەزىندەگى رەسمي جۇمىس ءوتىلى ايماققا بايلانىستى 6 ايدان 12 ايعا دەيىن بولۋى كەرەك. سونىمەن قاتار، سوڭعى 5 جىل ىشىندە ادامنىڭ مەنشىگىندە جىلجىمايتىن مۇلىك بولماۋى ءتيىس.

بانك ساتىپ الىناتىن تۇرعىن ءۇي قۇنىن شەكتەمەيدى، جوعارعى شەك تەك قارىز سوماسىنا عانا بەلگىلەنەدى. ايماققا بايلانىستى ول 10 ملن تەڭگەدەن 20 ملن تەڭگەگە دەيىن اۋىتقيدى. ەگەر تاڭدالعان باسپانا قىمباتىراق بولسا، وندا باعدارلاما قاتىسۋشىسى قارىز سوماسى مەن تۇرعىن ءۇي باعاسى اراسىنداعى ايىرماشىلىقتى ءوز ەسەبىنەن تولەيدى.

جاستار باعدارلاماسى بويىنشا باستاپقى جارنا - 10%، ال پايىزدىق مولشەرلەمە - جىلدىق 5%-دان (جتسم - 5،2%-دان باستاپ) باستاپ. يپوتەكانىڭ ماكسيمالدى مەرزىمى - 19 جىلعا دەيىن.

سونداي-اق، جاس قازاقستاندىقتار تۇرعىن ۇيلەردى باعدارلامادان تىس، نارىقتىق شارتتارمەن ساتىپ الۋ ءۇشىن وتباسى بانكىندەگى دەپوزيتتەرىنە بەلسەندى تۇردە قاراجات جينايدى. بانك سالىمشىلارىنىڭ 30%-دان استامى – 35 جاسقا دەيىنگى جاس قازاقستاندىقتار. ولاردىڭ ەڭ ۇنەمشىلدەرى الماتى، استانا جانە شىمكەنتتە تۇرادى.

بيىلعى جىلى وتباسى بانك قازاقستاندىق جاستاردى قولداۋ جونىندەگى جوبالاردى ىسكە اسىرۋىن جالعاستىرادى.

سونداي-اق، بۇل باعىتتاعى جۇمىستى ءتيىمدى ىسكە اسىرۋ ءۇشىن بانك وبلىس اكىمدىكتەرىنە جىل سايىن جانە تۇراقتى تۇردە اۋدان ورتالىقتارىندا، مونوقالالاردا جانە اۋىلداردا جاستاردى تۇرعىن ۇيمەن قامتاماسىز ەتۋ ءۇشىن وڭىرلىك بيۋدجەتكە قاراجات ءبولۋدى الدىن الا قاراستىرۋدى ۇسىنادى.

بيۋدجەتتەن الەۋمەتتىك جۇكتەمەنى ازايتىپ، وڭىرلەردە جۇمىس ىستەيتىن جاستاردى ۇستاپ قالۋ ءۇشىن وتباسى بانك ءىرى كاسىپورىندارعا جىل سايىن "كورپوراتيۆتىك" ءونىم شەڭبەرىندە ىنتىماقتاستىق مۇمكىندىگىن ۇسىنادى.

ستاتيستيكاعا سۇيەنسەك، ەلىمىزدىڭ مونوقالالارىندا شتاتتىق قىزمەتكەرلەر سانى 230 مىڭنان اساتىن، ولاردىڭ قاتارىندا 35 جاسقا دەيىنگى جاستارى بار 47 ءىرى كاسىپورىن جۇمىس ىستەپ تۇر.  

- ءبىز جاس قازاقستاندىقتار مەن ولاردىڭ وتباسىلارىن قولداۋ ماقساتىندا قوسىمشا "9-20" باعدارلاماسىن ازىرلەدىك. ونى ناۋرىز ايىندا ىسكە قوسۋدى جوسپارلاپ وتىرمىز. تۇرعىن ءۇيدىڭ قولجەتىمدىلىگىن باعالاۋ كەزىندە ءقازىر جاستار ءۇشىن قارىز بويىنشا سىياقى مولشەرلەمەسىنەن گورى باستاپقى جارنانىڭ مولشەرى ماڭىزدىراق. ەڭ باستىسى، بۇل جاس وتباسى ومىرىندەگى العاشقى، بىرلەسكەن مەنشىك، بىرىگىپ العان ورتاق جىلجىمايتىن مۇلىك بولادى، - دەپ اتاپ ءوتتى وتباسى بانكىنىڭ باسقارما ءتوراعاسى ءلاززات يبراگيموۆا.