InfoHub Logo

وزبەكستاندىق بلوگەرلەر تاشكەنت پەن الماتىنى سالىستىرىپ، ەكى قالانىڭ ءومىرى تۋرالى ءوز ويلارىن ءبولىستى. بۇل تۋرالى Ulysmedia.kz حابارلادى.

وزبەكستاننان كەلگەن بلوگەر وكسانا ۆلادي ەكى قالانى بىرنەشە باعىت بويىنشا سالىستىردى. ونىڭ ايتۋىنشا، الماتى تۇرعىندارىنىڭ كيىم كيىسى «ءساندى» جانە «باي» كورىنەدى، ال ايەلدەرى «جۋرنال مۇقابالارىنان شىققانداي» اسەر قالدىرادى. الايدا، تاماق جاعىنان تاشكەنت الدا ەكەنىن ايتتى. الماتىدا ازىق-تۇلىك پەن مەيرامحانالار قىمبات، ال تاعامدارىنىڭ ءدامى جاعىنان كەمشىندەۋ كورىنەدى.

تاكسي قىزمەتىنە كەلەتىن بولساق، الماتىدا ول ارزان، سونىمەن قاتار قىمبات جانە ەليتالىق كولىكتەردىڭ سانى كوپ. قالانىڭ وڭتۇستىك استاناسىندا كەپتەلىستەر دە از ەكەنىن اتاپ ءوتتى. بۇل ماسەلە تاشكەنت ءۇشىن بۇرىننان كەلە جاتقان وزەكتى پروبلەما ەكەنىن بلوگەر وكىنىشپەن جەتكىزدى.

تۇرعىن ءۇي باعاسى مەن تابيعاتى

تۇرعىن ءۇي باعاسى بويىنشا، ءبىر بولمەلى پاتەرلەر تاشكەنتتە 40 مىڭ دوللار بولسا، الماتىدا 50 مىڭ دوللارعا دەيىن جەتەدى. الماتىنىڭ باستى ەرەكشەلىگى رەتىندە تاۋلاردىڭ قولجەتىمدىلىگى اتالدى. بار-جوعى 120 تەڭگەگە نەمەسە 25 مىڭ سۇمعا اۆتوبۋسپەن ادەمى تاۋلى ايماقتارعا جەتۋگە بولاتىنى ايتىلدى. بۇل جەرلەردى بلوگەر كۋرشيەۆەلمەن سالىستىردى.

الماتىعا 10/10 باعاسى

«جالپى، قازاقستاندىقتار، سىزدەر كەرەمەتسىزدەر، ءبىزدىڭ باۋىرلارىمىز! العا، قازاقستان! ءبىزدى وسىنداي تاماشا قارسى العاندارىڭىزعا راحمەت. سىزدەرگە ۇلكەن راحمەت! سوندىقتان مەن ارينە كەلۋگە كەڭەس بەرەمىن. وزبەكستاننان جەتۋ وتە وڭاي. مەن الماتىعا 10-نان 10 بالل بەرەمىن»، - دەپ قورىتىندىلادى بلوگەر.

قازاقستانداعى تۋريزم الەۋەتى جوعارى بولعانىمەن، ونى دامىتۋ ءۇشىن كولىك، سەرۆيس جانە ينفراقۇرىلىم جەتىسپەيتىنى ايتىلىپ ءجۇر. دەگەنمەن، سوڭعى جىلدارى جاعداي وزگەرە باستادى. وتكەن جىلى قازاقستان قوناقۇيلەرىندە 10 ميلليوننان استام ادام، ونىڭ ىشىندە ءبىر جارىم ميلليونى شەتەلدىك تۋريستەر بولدى.