InfoHub Logo

قازاقستاندا پاتەرىن ساعاتتاپ، تاۋلىكتەپ نە ايىنا جالعا بەرەتىندەر 2026 جىلدان جاڭا تارتىپكە وتەدى: جالعا بەرۋشى ءوزىن-وزى جۇمىسپەن قامتۋشى (ءوجق) رەتىندە تىركەلىپ، ءار تولەمگە ەلەكتروندى چەك بەرۋى ءتيىس. ەڭ ماڭىزدىسى – زەينەتكەرلەر ءۇشىن سالىقتىق جەڭىلدىك قاراستىرىلعان.

بۇل تۋرالى Infohub.kz اقپارات اگەنتتىگى حابارلايدى.

سوڭعى ايلاردا قۇقىق قورعاۋ جانە سالىق ورگاندارى قىسقا مەرزىمدى جالعا بەرۋدى جەدەل باقىلاۋعا الدى. ەلورداداعى گۇلجاينا ق. ەسىمدى زەينەتكەر پاتەرىن جالعا بەرگەنى ءۇشىن تەكسەرۋلەرگە تاپ بولىپ، كەيىن بۇل ءىستى ۋاقىتشا دوعارعانىن ايتادى. ونىڭ سوزىنشە، پوليسيا جالعا الۋشىنى ۋاقىتشا تىركەۋگە قويماعانى ءۇشىن حاتتاما جاساعان، ال سالىقشىلار كاسىپكەر رەتىندە تىركەلمەدى دەپ ەسكەرتۋ جىبەرگەن.

2026 جىلعى جاڭا رەجيم: كىمدەرگە جانە قانداي شارتپەن

پاۆلودار وبلىسى بويىنشا مەملەكەتتىك كىرىستەر دەپارتامەنتى تۇسىندىرگەندەي، زەينەتكەرلەر دە وزگە جەكە تۇلعالار سياقتى 2026 جىلى ءوجق رەتىندە تىركەلىپ، زاڭدى تۇردە باسپاناسىن جالعا بەرە الادى. بۇل رەجيممەن جەكەمەنشىك تۇرعىن ءۇيدى جالعا بەرۋ جانە باسقا بىرەۋدەن جالعا الىنعان ءۇيدى سۋبارەنداعا بەرۋ رۇقسات ەتىلەدى.

ءوجق رەتىندە جۇمىس ىستەۋدىڭ نەگىزگى تالاپتارى: قازاقستان ازاماتى بولۋ؛ جەكە كاسىپكەر (يپ) رەتىندە تىركەلمەۋ؛ قىزمەت ءتۇرى رۇقسات ەتىلگەن تىزىمگە كىرۋ؛ جالدامالى جۇمىسكەر پايدالانباۋ؛ ايلىق تابىس 300 اەك-تەن اسپاۋ (2026 جىلى – 1 297 500 تەڭگە). بۇل تەتىك سالىق كودەكسىنىڭ 718 جانە 721-باپتارىمەن رەتتەلەدى.

زەينەتكەرلەرگە قانداي جەڭىلدىك بار

ءوجق رەتىندە تىركەلگەن جەكە تۇلعالار جەكە تابىس سالىعىن تولەمەيدى. ال جاسى بويىنشا زەينەتكەرلەر ءۇشىن قوسىمشا ارتىقشىلىق بار: ولار الەۋمەتتىك اۋدارىمدار مەن مىندەتتى مەديسينالىق ساقتاندىرۋ جارنالارىن دا تولەمەيدى. بۇل الەۋمەتتىك كودەكستىڭ 243 جانە 248-باپتارىمەن، سونداي-اق «مىندەتتى الەۋمەتتىك مەديسينالىق ساقتاندىرۋ تۋرالى» زاڭنىڭ 28-بابىمەن بەكىتىلگەن.

ياعني، زەينەتكەر ءوجق رەتىندە پاتەرىن جالعا بەرسە، جتس تە، الەۋمەتتىك تولەمدەر دە سالىنبايدى. ال زەينەتكەر ەمەس ءوجق تۇلعالار ءۇشىن جالپى جۇكتەمە – تابىستىڭ 4%-ى (الەۋمەتتىك اۋدارىمدار – 1%، مىندەتتى زەينەتاقى جارناسى – 1%، جۇمىس بەرۋشىنىڭ مىندەتتى زەينەتاقى جارناسى – 1%، ءمامس جارناسى – 1%).

تىركەلۋ مەن چەك بەرۋ ءتارتىبى

2026 جىلدىڭ 1 قاڭتارىنان باستاپ ءوجق رەجيمىن قولدانۋ «e-Salyq Business» ءموبيلدى قوسىمشاسى ارقىلى ىسكە اسادى. الدىمەن قوسىمشادا ءوجق رەتىندە تىركەلۋ كەرەك، كەيىن ءاربىر جالعا الۋشىعا فيسكالدىق ەلەكتروندى چەك بەرىلەدى. بەرىلگەن العاشقى چەك – وسى رەجيمدى قولدانۋدىڭ باستالعان كۇنى بولىپ ەسەپتەلەدى.

قوسىمشا اي سايىن تولەمدەردى اۆتوماتتى ەسەپتەيدى. تالاپتاردى ساقتاماۋ ايىپپۇلدارعا اكەلۋى مۇمكىن. سونىمەن بىرگە جالعا الۋشىلاردى مەكەنجاي بويىنشا ۋاقىتشا تىركەۋ مىندەتىن دە ەستەن شىعارماعان ءجون.

نەنى ەسكەرۋ كەرەك

ەگەر پاتەردى جالعا بەرۋدى توقتاتساڭىز، مەملەكەتتىك كىرىستەر ورگانىنا حابارلاپ، اقپاراتتى جۇيەدە جاڭارتقان دۇرىس. قۇزىرلى ورگاندار مالىمەتتى ميب ءتوراعاسى مەن كورشىلەر ارقىلى تەكسەرە الادى – بۇل تاجىريبە سوڭعى تەكسەرىستەردە قولدانىلىپ ءجۇر.

جالپى العاندا، 2026 جىلدان ەنگىزىلەتىن ءوجق رەجيمى جالعا بەرۋدى كولەڭكەدەن شىعارىپ، ءتارتىپتى بىرىزدەندىرەدى. زەينەتكەرلەر ءۇشىن بۇل – تابىستى زاڭدى راسىمدەپ، ارتىق تولەمسىز جۇرگىزۋدىڭ ءقاۋىپسىز جولى.