InfoHub Logo

پەكيندى الاپات نوسەردەن ونداعان ادام قازا تاۋىپ،80 مىڭنان استام تۇرعىن ەۆاكۋاسيالاندى،-دەپ حابارلايدى ينفوحاب.كز.

جۇڭگو استاناسى پەكيندە سوڭعى ونجىلدىقتاعى ەڭ كۇشتى نوسەر جاۋىن سالدارىنان كەمىندە 30 ادام قازا تاپتى. ەڭ كوپ شىعىن ميۋن تاۋلى اۋدانىندا تىركەلدى — مۇندا 28 ادامنىڭ ءمايىتى تابىلعان. تاعى ەكى تۇرعىن يانسين اۋدانىندا قازا تاپتى، دەپ حابارلادى قىتايدىڭ مەملەكەتتىك "سينحۋا" اگەنتتىگى.

قاتتى جاۋىن تەك پەكينمەن شەكتەلمەي، ەلدىڭ باسقا وڭىرلەرىنە دە زاردابىن تيگىزدى. حەبەي پروۆينسياسىندا جاۋعان جاۋىن مەن تاۋ كوشكىندەرى سالدارىنان سەگىز ادام قازا تاۋىپ، ءتورت تۇرعىن ءىز-تۇسسىز جوعالىپ كەتكەن. قۇتقارۋ جۇمىستارى جالعاسىپ جاتىر.

اپاتتى جاعدايعا بايلانىستى پەكين، تيانسزين جانە حەبەي ايماعىنان 80 مىڭنان استام ادام ەۆاكۋاسيالاندى. كوشەلەر مەن اۋىلداردى سۋ باسىپ، كولىك قوزعالىسى توقتادى. جۇزدەگەن ۇشاق پەن پويىز رەيسى كەيىنگە شەگەرىلدى نەمەسە مۇلدەم توقتاتىلدى. تيانسزين قالاسىندا تۇتاس اۋىلدار سۋ استىندا قالدى، ءبىر قاباتتى ۇيلەردىڭ تەك شاتىرلارى عانا كورىنەتىن جاعدايعا جەتكەن.

جۇڭگو مەتەورولوگتارىنىڭ مالىمەتىنشە، 23 شىلدەدەن بەرى ايماققا 573 مم جاۋىن-شاشىن تۇسكەن — بۇل كورسەتكىش بۇكىل جىلدىڭ ورتاشا مولشەرىنە تەڭ. 26 شىلدە كۇنى حۋايچجوۋ سەكىلدى تاۋلى ايماقتاردا تەك ءبىر ساعاتتىڭ ىشىندە 95 مم-دەن استام جاۋىن جاۋعان. بۇل — ءار شارشى مەتر جەرگە 95 ليتر سۋ ءتۇستى دەگەن ءسوز.

مەتەورولوگتار جاۋىن-شاشىننىڭ مۇنداي كولەمى ادەتتەن تىس ەكەنىن اتاپ ءوتتى. ساراپشىلار بۇل جاعدايدى جاھاندىق كليمات وزگەرىسىنىڭ اسەرىمەن بايلانىستىرۋدا. جۇڭگو بيلىگى زارداپ شەككەن وڭىرلەرگە كومەك جەتكىزۋدى ۇيىمداستىرىپ، تاسقىن ءقاۋپى ساقتالىپ وتىرعان اۋدانداردا ساقتىق شارالارىن كۇشەيتتى.

قازىرگى تاڭدا ىزدەستىرۋ-قۇتقارۋ توپتارى جوعالعان ادامداردى ىزدەستىرۋدە، ال ينجەنەرلىك قىزمەتتەر قۇلاعان كوپىرلەر مەن بۇلىنگەن جولداردى قالپىنا كەلتىرۋگە كىرىسكەن. سۋعا باتىپ قالعان اۋىل-ايماقتاردا ىندەت تارالۋىنىڭ الدىن الۋ ءۇشىن سانيتارلىق-دەزينفەكسيالاۋ شارالارى باستالدى.

جاعداي باقىلاۋدا بولعانىمەن، جەرگىلىكتى بيلىك تۇرعىنداردى اسا ساق بولۋعا جانە توتەنشە جاعداي تۋرالى اقپاراتتى ۇنەمى باقىلاپ وتىرۋعا شاقىرۋدا.