InfoHub Logo

پەريزات قايرات 10 جىلعا سوتتالدى: قايىرىمدىلىق قارجىسىن جىمقىرۋ ءىسى بويىنشا ۇكىم شىقتى،-دەپ جازادى ينفوحاب ءتىلشىسى.

استانا. 25 شىلدە. استانانىڭ قىلمىستىق ىستەر جونىندەگى اۋدانارالىق ارناۋلى سوتى قوعامدا كەڭ رەزونانس تۋدىرعان «Biz Birgemiz Qazaqstan» قايىرىمدىلىق قورىنىڭ بۇرىنعى جەتەكشىسى پەريزات قايرات پەن ونىڭ اناسى عايني الاشبايەۆاعا قاتىستى ۇكىم شىعاردى.

پەريزات قايرات 10 جىلعا، ال ونىڭ اناسى عايني الاشبايەۆا 7 جىلعا باس بوستاندىعىنان ايىرىلدى. سونىمەن قاتار، ەكەۋى 50 جابىرلەنۋشىگە جالپى 1،5 ملرد تەڭگە وتەماقى تولەۋگە مىندەتتەلدى.

سوت ولاردى قايىرىمدىلىققا دەپ جينالعان 3،5 ميلليارد تەڭگەدەن استام قارجىنى جىمقىردى دەپ تانىدى. بۇل – ەل تاريحىنداعى ەڭ اۋقىمدى قايىرىمدىلىق قارجىسىن تەرىس ماقساتتا پايدالانۋ فاكتىلەرىنىڭ ءبىرى.

قىلمىستىق سحەما قالاي جۇمىس ىستەدى؟

2024 جىلدىڭ كوكتەمىندە ەل اۋماعىندا بولعان تاسقىننان كەيىن پەريزات قايرات باستاعان ۇيىم گۋمانيتارلىق كومەك جيناپ، حالىقتىڭ سەنىمىنە يە بولعان ەدى. ءبىراق قاراشا ايىندا پەريزات قايرات قاماۋعا الىنىپ، وعان تاسقىننان زارداپ شەككەندەرگە ارنالعان 1،5 ملرد تەڭگەنى جىمقىردى دەگەن العاشقى ايىپ تاعىلدى.

تەرگەۋ بارىسىندا بەلگىلى بولعانداي، ول اقشاعا استاناداعى ەليتالىق تۇرعىن ءۇي كەشەندەرىنەن بىرنەشە پاتەر، قىمبات كولىكتەر – Mercedes-Benz S450، Lexus LX-600، Haval H6 GT جانە Mercedes-EQE 500 4Matic، سونداي-اق ءسان-سالتاناتتى بۇيىمدار ساتىپ الىنعان.

كەيىننەن قايراتقا پالەستينا حالقىنا كومەككە دەپ جينالعان 200 ميلليون تەڭگەنى جىمقىردى دەگەن قوسىمشا ايىپ تاعىلدى. بۇل قارجىنىڭ ءبىر بولىگى "Rebel Flowers" اتتى گۇل دۇكەنىن ساتىپ الۋ ارقىلى زاڭداستىرىلعانى انىقتالدى.

پروكۋروردىڭ سوزىنشە، ايىپتالۋشىلار جىمقىرعان اقشانىڭ ءبىر بولىگىن ءۇشىنشى تۇلعالارعا، تۋىستارىنا راسىمدەپ، زاڭداستىرۋ ارەكەتىن دە جاساعان.

سوت پروسەسى 2025 جىلدىڭ 9 شىلدەسىندە باستالىپ، بىرنەشە اپتاعا سوزىلدى. ايىپكەرلەر – 34 جاستاعى پەريزات قايرات پەن 62 جاستاعى اناسى وزدەرىنە تاعىلعان ايىپتاردى تولىقتاي مويىنداعان جوق.

پەريزات قايرات سوتتا سويلەگەن سوزىندە:

"بۇل كەلتىرگەندەرى نەگىزسىز دەپ ەسەپتەيمىن. تەرگەۋشىلەردىڭ قيالى ءۇشىن مەن جاۋاپتى ەمەسپىن. بولاشاقتا ناقتى دالەلدەرمەن ءوزىمدى قورعايمىن،" – دەدى.

ونىڭ ادۆوكاتتارى ءىستىڭ كوپتەگەن تۇستارىن اشىق قاراۋعا قارسى بولىپ، ايىپتالۋشىلاردىڭ سوتتا جاۋاپ بەرگەن بولىگى جابىق تۇردە تىڭدالدى. سۋديا سابىرجان كارىموۆ بۇل شەشىمدى جەكە تۇلعالاردىڭ جەكە مالىمەتتەرى قارالىپ جاتقانىمەن ءتۇسىندىردى.

سونداي-اق ۇكىم جاريالانعان كۇنى دە جۋرناليستەر سوت زالىنا كىرگىزىلمەي، بولەك بولمەدەگى مونيتوردان باقىلاۋعا ءماجبۇر بولدى. ال سوڭعى سوزدەرىن ايتۋعا ارنالعان وتىرىسقا ب ا ق وكىلدەرى مۇلدە قاتىستىرىلعان جوق.

قاماۋداعى قىسىم تۋرالى شاعىم جانە تەكسەرۋ

سوتقا دەيىنگى تەرگەۋ كەزىندە پەريزات قايرات ءوزىن تەرگەۋ يزولياتورىندا قىسىم كوردى دەپ مالىمدەگەن. ونىڭ ايتۋىنشا، مەكەمە قىزمەتكەرى كامەرانىڭ ەسىگىن كۇشتەپ جاۋىپ، ونى ەسىككە قىسىپ، جاراقات سالعان.

بۇل شاعىم پروكۋراتۋراعا جولدانىپ، استانا قالاسى پوليسيا دەپارتامەنتى سوتقا دەيىنگى تەرگەۋ امالدارىن جۇرگىزدى. دەگەنمەن بەينەباقىلاۋ جازبالارىن قاراپ، كۋاگەرلەردەن جاۋاپ العان تەرگەۋشىلەر قايراتتىڭ مالىمدەمەسى راستالماعانىن مالىمدەدى.

پەريزات قايراتقا قاتىستى تەرگەۋ مەن سوت پروسەسى قوعامدا ۇلكەن رەزونانس تۋدىردى. قايىرىمدىلىق اتاۋىن جامىلىپ، الاياقتىق جاساۋ — جۇرتشىلىقتىڭ سەنىمىنە زور سوققى بولدى. وسى وقيعا اياسىندا قازاقستان بيلىگى "قايىرىمدىلىق قىزمەت تۋرالى" زاڭعا وزگەرىستەر ەنگىزۋدى ۇسىندى.

ۇسىنىلىپ وتىرعان تۇزەتۋلەرگە:

• قايىرىمدىلىق قورلارىن اككرەديتاسيادان وتكىزۋ؛
• توتەنشە جاعداي كەزىندە تەك اكىمدىك بەلگىلەگەن ۇيىمدارعا عانا قاراجات جيناۋعا رۇقسات بەرۋ؛
• رۇقساتسىز قاراجات جيناعان جەكە تۇلعالارعا ايىپپۇل سالۋ سىندى نورمالار كىرەدى.

پەريزات قايرات ءىسى — تەك سوت پروسەسى عانا ەمەس، مەملەكەتتىك سەنىم مەن قايىرىمدىلىق جۇيەسىنىڭ بولاشاعىنا قاتىستى ماڭىزدى ماسەلە. بۇل ۇكىممەن بىرگە بيلىككە دە، قوعامعا دا ۇلكەن ساباق بەرىلدى: قايىرىمدىلىق جەلەۋىمەن جۇرگىزىلەتىن كەز كەلگەن ارەكەت ەندى قاتاڭ باقىلاۋعا الىنباق.