InfoHub Logo

پەتروپاۆلدا 66 جاستاعى زەينەتكەر اس ءىشۋ كەزىندە جىلقى ەتىندەگى وتكىر سۇيەكتى بايقاماي جۇتىپ قويىپ، ومىرىنە قاتەر توندىرگەن. جەدەل تۇردە اۋرۋحاناعا جەتكىزىلگەن ەر ادامعا دارىگەرلەر شۇعىل وتا جاساپ، اجال اۋزىنان امان الىپ قالدى.

بۇل تۋرالى Infohub.kz اقپارات اگەنتتىگى حابارلايدى.

ناۋقاس كەشكى اس كەزىندە جىلقى ەتىن جەپ وتىرىپ، سۇيەكتى جۇتىپ العانىن ايتقان. العاشىندا وزىنەن-وزى ءوتىپ كەتەدى دەپ ويلاعانىمەن، كەيىننەن كەۋدە تۇسى مەن موينى قاتتى اۋىرىپ، جۇرەنى اينىعان. ۋاقىت وزدىرماي جەدەل مەديسينالىق جاردەمگە جۇگىنگەن.

وڭەشتىڭ تەسىلۋ ءقاۋپى بولعان

كوپبەيىندى قالالىق اۋرۋحاناعا جەتكىزىلگەن ناۋقاستى تەكسەرگەندە، سۇيەكتىڭ وڭەشتىڭ شىرىشتى قابىعىنا ەكى جاعىنان كىرىپ كەتكەنى انىقتالدى. بۇل جاعداي وتە ءقاۋىپتى بولعاندىقتان، دارىگەرلەر دەرەۋ وپەراسيالىق بولمەگە كىرىسىپ، جالپى ناركوزبەن كۇردەلى وتا جاسادى. حيرۋرگ-ەندوسكوپيست كونستانتين زىريانوۆتىڭ باسشىلىعىمەن سۇيەك ءساتتى الىنىپ، ناۋقاستىڭ ءومىرى قۇتقارىلدى.

ماماندار ەسكەرتەدى

مەديسينا ماماندارى مۇنداي جاعدايلاردىڭ وتە ءقاۋىپتى ەكەنىن ايتادى. ءبىر قاتە قيمىل وڭەشتىڭ جىرتىلۋىنا نەمەسە قان كەتۋگە اكەلۋى مۇمكىن. ەگەر ناۋقاس دەر كەزىندە مەديسينالىق كومەككە جۇگىنبەسە، وڭەشتىڭ تەسىلۋى، اۋىر ينفەكسيا نەمەسە سەپسيس سياقتى اسقىنۋلارعا ۇشىراۋى ىقتيمال ەدى.

قازىرگى تاڭدا پەتروپاۆل تۇرعىنى حيرۋرگيا بولىمىندە ەم قابىلداپ، جاعدايى ورتاشا اۋىرلىقتا، تۇراقتى دەپ باعالانۋدا. دارىگەرلەردىڭ باقىلاۋىندا قالپىنا كەلۋ كەزەڭىن جالعاستىرۋدا.

ماماندار حالىققا تاماقتى اسىقپاي، مۇقيات شايناپ جەۋگە كەڭەس بەرەدى. اسىرەسە، سۇيەگى بار تاعامداردى تۇتىنعاندا ەرەكشە ساق بولۋ قاجەت. كەۋدە نەمەسە مويىن تۇسىندا قاتتى اۋىرسىنۋ سەزىلسە نەمەسە تاماقتا بوگدە زات تۇرعانداي اسەر پايدا بولسا، دەرەۋ دارىگەرگە قارالۋ ماڭىزدى.