InfoHub Logo

پەتروپاۆلدا ايەلىن جانە بالالارىن قورلاپ، ايەلدەر ءىش كيىمىن كيىپ، بەينەجازبالار تۇسىرگەن ەر ادام مەن ونىڭ ايەلى اتا-انا قۇقىعىنان ايرىلدى. بۇل تۋرالى پەتروپاۆل قالالىق مامانداندىرىلعان اكىمشىلىك قۇقىق بۇزۋشىلىقتار سوتى حابارلادى.

بۇل جانتۇرشىگەرلىك وقيعا وتكەن جىلدىڭ قاراشا ايىندا بەلگىلى بولدى. كوپبالالى اناعا قاتىستى زورلىق-زومبىلىق تۋرالى دابىل حابارلاماسى "نەمولچي.kz" قوعامدىق قورىنىڭ الەۋمەتتىك جەلىدەگى پاراقشاسىندا جاريالاندى. قوردىڭ مالىمەتىنشە، ايەل كۇيەۋىنەن كوپ جىل بويى قورلىق كورىپ، سالدارىنان مۇگەدەك اتانعان.

"ايەل كۇيەۋىنىڭ تاراپىنان كوپ جىل بويى قورلىق كوردى. ول ايەلىنە وپەراسيا جاساتىپ، ءتىپتى باسىن دا جارتتى. ءبىراق بۇل ونى توقتاتپادى، ايەلىن ۇرىپ-سوعا بەردى. ايەل ەسىنەن تانىپ، قۇلاي بەردى. اقىرى اياعىنان تۇرا الماي قالدى"، - دەلىنگەن "نەمولچي.kz" جازباسىندا.

قوردىڭ حابارلاۋىنشا، ايەل اناسىنىڭ ۇيىنە قاشىپ كەتكەنىمەن، بەس كامەلەتكە تولماعان بالاسى اكەسىمەن قالعان. وتاعاسى بالالارىنا دا اگرەسسيۆتى قارىم-قاتىناس تانىتقان. مۇنى راستايتىن TikTok جەلىسىنە سالعان بەينەجازبالارى دا بار. وندا ول ايەلدەردىڭ ءىش كيىمىن كيىپ تۇسكەن.

ارەست، ەسەپكە الۋ جانە سوت

بۇل جاعدايعا پوليسيا نازار اۋدارىپ، قامقورشىلىق ورگاندارىمەن بىرلەسىپ، وتباسىنىڭ تۇرعىلىقتى جەرىنە باردى. ايەلدىڭ ارىزى بويىنشا، كۇيەۋىنە قاتىستى وتباسىلىق-تۇرمىستىق قاتىناستار سالاسىنداعى قۇقىققا قارسى ارەكەتتەرى ءۇشىن اكىمشىلىك ءىس قوزعالدى.

ناتيجەسىندە، پەتروپاۆل قالالىق مامانداندىرىلعان اكىمشىلىك قۇقىق بۇزۋشىلىقتار سوتى كىنالى دەپ تانىپ، وعان بەس تاۋلىككە اكىمشىلىك قاماققا الۋ جازاسىن تاعايىندادى. سونىمەن قاتار، سوت ونىڭ ايەلى مەن بالالارىنىڭ جانىنا رۇقساتسىز بارۋىنا 12 اي بويى تىيىم سالدى.

پوليسيا اتا-انانى ارنايى ەسەپكە الدى. كەيىننەن پەتروپاۆل قالالىق ءبىلىم ءبولىمى بالالاردى اتا-انالارىمەن قالدىرۋ ءقاۋىپتى دەپ شەشىپ، اكەسى مەن اناسىن سوتقا بەردى. ەكەۋى دە جۇمىس ىستەمەگەندىكتەن، بالا تاربيەسىنە قاجەتتى مىندەتتەردى ورىنداي الماعان.

سوت وتىرىسى جابىق رەجيمدە ءوتىپ، ءۇش ايعا سوزىلدى. قورىتىندىسىندا، سوت ەرلى-زايىپتىلاردى بەس بالاسىنان اتا-انا قۇقىعىنان ايرۋ تۋرالى شەشىم قابىلدادى. الايدا، بەلگىلى ءبىر شارتتار ورىندالسا، التى ايدان كەيىن ولار قۇقىقتارىن قالپىنا كەلتىرۋگە مۇمكىندىك الادى.

قازىرگى تاڭدا بەس بالا دا قيىن ومىرلىك جاعدايعا تاپ بولعان بالالاردى قولداۋ ورتالىعىندا تاربيەلەنۋدە.

بۇل تۋرالى Infohub.kz اقپارات اگەنتتىگى حابارلايدى.