InfoHub Logo

2016 جىلعى 6 جەلتوقساندا ەكونوميكالىق ىنتىماقتاستىق جانە دامۋ ۇيىمى (ەىدۇ) 15 جاستاعى ءبىلىم الۋشىلاردىڭ وقۋ جەتىستىكتەرىن باعالايتىن PISA-2015 حالىقارالىق زەرتتەۋىنىڭ ناتيجەسىن رەسمي تۇردە جاريالادى (نەگىزگى باعىتى - جاراتىلىستانۋ). بۇل تۋرالى ق ر بعم باسپا ءسوز قىزمەتى حابارلايدى.

PISA-2015 زەرتتەۋىنە بارلىعى الەمنىڭ 72 ەلىنىڭ 500 000-نان استام 15 جاستاعى ءبىلىم الۋشىلارى قاتىستى.

قازاقستاننىڭ اتىنان ەلىمىزدىڭ 16 ءوڭىرىنىڭ 5 780 15 جاستاعى وقۋشىلارى مەن ستۋدەنتتەرى قاتىستى (189 مەكتەپ جانە 27 كوللەدج).

ەىدۇ ەلدەردى جيناعان ۇپايلارى بويىنشا رەيتينگكە بولمەيدى. ەىدۇ نەگىزگى ماقساتى ەلدەردىڭ ءبىلىم بەرۋ جۇيەلەرىنىڭ ءۇردىسىن كورسەتۋ.

PISA-2012 زەرتتەۋمەن سالىستىرعاندا قازاقستاندىق قاتىسۋشىلاردىڭ بارلىق باعىتتار بويىنشا كورسەتكىشتەرى جوعارىلادى. ماتەماتيكا بويىنشا ناتيجەلەردىڭ ءوسىمى 28، ال جاراتىلىستانۋ بويىنشا 31 ۇپايدى قۇرادى.

ماتەماتيكا جانە جاراتىلىستانۋ سالاسىندا ءوسۋ ءۇردىسى جوعارى دەڭگەيدە. 2012 جىلعى ءۇردىس 2009 جىلمەن سالىستىرعاندا سايكەسىنشە 27 جانە 25 ۇپايلاردى قۇرادى.

PISA-2015 زەرتتەۋىندە 15 جاستاعى ءبىلىم الۋشىلار ۇپايلارى ءوسىمىنىڭ ەڭ جوعارعى كورسەتكىشىن وقۋ ساۋاتتىلىعى بويىنشا كورسەتتى (+34).

بۇل ەلباسىنىڭ تاپسىرماسى بويىنشا ىسكە اسىرىلعان "وقۋشىلاردىڭ فۋنكسيونالدىق ساۋاتتىلىعىن دامىتۋ جونىندەگى ۇلتتىق ic-قيمىل جوسپارىنىڭ" جانە مەكتەپتەگى ءبىلىم بەرۋدىڭ جاڭارتىلعان مازمۇنىنا وتۋگە ارنالعان ءىس-شارالار ارقاسىندا مۇمكىن بولدى.

وسىلايشا، ءبىلىم بەرۋدى جانە عىلىمدى دامىتۋدىڭ مەملەكەتتىك باعدارلاماسىنىڭ، ءبىلىم جانە عىلىم مينيسترلىگىنىڭ 2014-2018 جىلدارعا ارنالعان ستراتەگيالىق جوسپارىنىڭ بولجامدى كورسەتكىشتەرى كورسەتىلگەن ماتەماتيكا بويىنشا 440 ۇپاي (ناقتى 460)، جاراتىلىستانۋ بويىنشا 430 (456)، وقۋ ساۋاتتىلىعى بويىنشا 400 (427) نىسانالى ينديكاتورلارىنا قول جەتكىزىلدى.

سونداي-اق، PISA-2015 جوباسىنا العاش رەت نازاربايەۆ زياتكەرلىك مەكتەپتەرىنىڭ بارلىق 15 جاستاعى وقۋشىلارى قاتىستى (2 061 ادام). نازاربايەۆ زياتكەرلىك مەكتەپتەرىنىڭ وقۋشىلارىنىڭ كورسەتكىشتەرى ماتەماتيكا جانە جاراتىلىستانۋ عىلىمدارى بويىنشا جەتەكشى ءبىلىم بەرۋ جۇيەلەرىنىڭ (سينگاپۋر، گونكونگ، ماكاو، قىتايلىق تايبەي، جاپونيا جانە ت.ب.) ءبىرىنشى وندىعىنا كىرەدى.

PISA-2015 زەرتتەۋىندە قازاقستاننىڭ ناتيجەلەرى جابىق سۇراقتار بويىنشا كورسەتىلگەن. تولىق جانە تەرەڭ تالداۋ، ناقتى شەشىمدەر مەن ۇسىنىستار 2017 جىلعى ۇلتتىق ەسەپتە ايقىندالاتىن بولادى.

انىقتاما ءۇشىن:

TIMSS جانە PISA زەرتتەۋلەرىنىڭ نەگىزگى ايىرماشىلىقتارى زەرتتەۋدىڭ ىرىكتەمەسى مەن ءادىسناماسىنا بايلانىستى.

TIMSS زەرتتەۋىنە 4 جانە 8 سىنىپ وقۋشىلارى قاتىسادى. ال PISA زەرتتەۋىنە تەك 15 جاستاعى مەكتەپ (7-12 سىنىپتار) جانە كوللەدجدەردىڭ ءبىلىم الۋشىلارى قاتىسادى.

TIMSS اكادەميالىق ءبىلىمدى باعالايدى (نە؟ قايدا؟ قاشان؟)، TIMSS زەرتتەۋى تاپسىرمالارىنىڭ 80%-ى ءبىلىمدى كورسەتۋگە باعىتتالعان.

PISA زەرتتەۋى فۋنكسيونالدىق قابىلەتتى باعالايدى - ءارتۇرلى ومىرلىك جاعدايلاردا ءبىلىمدى ءتيىمدى پايدالانۋ، لوگيكالىق ويلاۋ جانە نەگىزگى قورىتىندى جاساۋ (نەگە؟ نە ءۇشىن؟ قالاي؟)، اقپاراتتىق كەستەلەر مەن دياگرامالاردى جانە ت.ب. ءتۇسىندىرۋ قابىلەتى. PISA زەرتتەۋى سۇراقتارىنىڭ 70%-ى ءبىلىمدى پايدالانا الۋ قابىلەتىن باعالايدى.

---