InfoHub Logo

رەسەي پرەزيدەنتى ۆلاديمير پۋتين قازاقستانمەن اراداعى قارىم-قاتىناسقا قاتىستى پىكىر ءبىلدىردى. ونىڭ ايتۋىنشا، ەكى ەل اراسىنداعى كەلىسسوزدەر ءاردايىم كۇردەلى وتەدى.

بۇل تۋرالى Infohub.kz اقپارات اگەنتتىگى حابارلايدى.

ءماجىلىس كەزىندە قازاقستان ترك پرەزيدەنتى راۋشان قاجىبايەۆا رەسەي باسشىسىنان ەكى ەل اراسىنداعى دوستىق پەن ىنتىماقتاستىققا نەگىزدەلگەن بىرلەسكەن مالىمدەمەنىڭ ماڭىزدىلىعىن باعالاۋدى سۇرادى. پۋتين ەكى ەل اراسىنداعى ىنتىماقتاستىق دامىپ كەلە جاتقانىن، الايدا كوپتەگەن ماسەلەلەر بويىنشا كەلىسسوزدەردىڭ وڭاي بولمايتىنىن اتاپ ءوتتى.

كۇردەلى كەلىسسوزدەر

«ءبىزدىڭ قازاقستاندىق دوستارىمىز، ارىپتەستەرىمىز – وڭاي ارىپتەستەر ەمەس. بىزدە ءاربىر ماسەلە بويىنشا وتە وتكىر پىكىرتالاس بولىپ تۇرادى. بۇل قارجىلىق ءوزارا قارىم-قاتىناسقا، ونەركاسىپتەگى بايلانىستارعا، ينۆەستيسيالىق قىزمەت شارتتارىنا، ءىرى جوبالارعا قاتىستى. ءبىراق ەكى تاراپ تا تەك قانا جاراساتىن ەمەس، ورتاق ماقساتتارعا جەتۋگە ىقپال ەتەتىن كومپروميسس تابۋعا ۇمتىلادى»، – دەدى پۋتين.

سونىمەن قاتار، رەسەي پرەزيدەنتى رەسەي مەن قازاقستاندى عاسىرلار بويى قالىپتاسقان قارىم-قاتىناس، كووپەراسيا، كولىك بايلانىستارى جانە ورتاق ءبىلىم بەرۋ كەڭىستىگى بايلانىستىراتىنىن ايتتى. ول قاسىم-جومارت توقايەۆقا ورىس ءتىلىن قولداۋ جونىندەگى حالىقارالىق ۇيىم قۇرۋ باستاماسى ءۇشىن تاعى دا العىس ءبىلدىردى.

اەس قۇرىلىسى جانە جولبارىستار

رەسەي پرەزيدەنتى قازاقستاندا اەس سالۋ جوباسى تۋرالى دا پىكىر ءبىلدىردى. ونىڭ ايتۋىنشا، بۇل جوبا قازاقستانعا ءوز ەنەرگەتيكالىق جۇيەسىن، سونداي-اق عىلىمي جانە وندىرىستىك بازاسىن دامىتۋعا كومەكتەسەدى.

«ەڭ باستىسى – قازاقستاندا اتوم ەلەكتر ستانسياسىنىڭ بلوكتارى سالىناتىنى ەمەس. ەڭ باستىسى – جاڭا سالانىڭ قۇرىلاتىنى. بۇل كادر دايارلاۋعا، عىلىمي جانە وندىرىستىك قىزمەتكە قاتىستى. مۇنىڭ ءبارى بىرلەسكەن جۇمىس. بۇل باعىت ءبى ءۇشىن دە، قازاقستان ءۇشىن دە وتە ماڭىزدى»، – دەپ اتاپ ءوتتى ول.

سونىمەن قاتار، راۋشان قاجىبايەۆا رەسەي پرەزيدەنتىنەن جولبارىس پوپۋلياسياسىن قالپىنا كەلتىرۋ جوباسى تۋرالى سۇرادى. بۇل تاقىرىپ قازىرگى ۋاقىتتا قازاقستاندا وزەكتى ماسەلەلەردىڭ ءبىرى بولىپ وتىر.

پۋتين بۇل جوبانى تابيعاتتى قالپىنا كەلتىرۋ جانە سيرەك كەزدەسەتىن جانۋارلار تۇرلەرىن ساقتاۋ جۇمىسىنىڭ ءبىر بولىگى دەپ اتادى. ول رەسەيدىڭ باسقا ەلدەرمەن وسىنداي باعدارلامالارعا قاتىسقانىن ەسكە سالدى. اتاپ ايتقاندا، تاجىكستان رەسەيگە قار بارىستارىن بەرگەن.

«مىسالى، تاجىكستاننان بىزگە قار بارىستارىن بەردى، بۇل ءۇشىن ءبىز تاجىكستاندىق دوستارىمىزعا وتە ريزامىز. ءبىز امۋر جولبارىستارىنىڭ پوپۋلياسياسىن ساقتاۋ ءۇشىن كوپ جۇمىس جاسادىق. بۇل، ايتپاقشى، الەمدەگى ەڭ ءىرى جولبارىستار. ولاردان ۇلكەنى جوق. بۇرىن قازاقستاندا دا وسىنداي جولبارىستار بولعان»، – دەدى پۋتين.

ەگەر رەسەي قازاقستانعا جولبارىس پوپۋلياسياسىن قالپىنا كەلتىرۋگە كومەكتەسە الاتىن بولسا، ول بۇل ءىستى اتقاراتىنىن ايتتى. سونداي-اق، رەسەيدە بۇعان دەيىن وسى جانۋارلاردى ساقتاۋعا ارنالعان حالىقارالىق «جولبارىس ءسامميتىنىڭ» وتكەنىن ەسكە سالدى.