InfoHub Logo

تانىمال اكتەر قايرات ادىلگەرەي، قۇرمانعازى ساعىربايۇلىنا قاتىستى پودكاستتا ايتقان سوزدەرى قوعامدا قىزۋ تالقىعا ءتۇسىپ، كۇيشىنىڭ ۇرپاقتارى نارازىلىق بىلدىرگەننەن كەيىن، كوپشىلىك الدىندا كەشىرىم سۇراپ، تۇسىنىكتەمە بەردى.

بۇل تۋرالى Infohub.kz اقپارات اگەنتتىگى حابارلايدى.

اكتەردىڭ مويىنداعان قاتەلىگى

ونەر يەسى الەۋمەتتىك جەلىدەگى پاراقشاسىندا ۆيدەو جاريالاپ، كۇي اتاسى قۇرمانعازى جايلى سوزدەرىنىڭ قاتە قابىلدانۋىنا سەبەپ بولعان تۇستاردى تارقاتىپ ايتتى. اكتەردىڭ ايتۋىنشا، ونىڭ ماقساتى كۇيشىنىڭ ءارۋاعىن قورلاۋ بولماعان.

“كەيىنگى ەكى كۇندە مەنىڭ بەلگىلى ءبىر پودكاستتا قۇرمانعازى اتامىزعا قاتىستى ايتقان پىكىرىم قاتتى تالقىعا ءتۇسىپ جاتىر. ورال قالاسىنىڭ اقساقال، القابيلەرى جينالىپ، نارازىلىق ءبىلدىرىپ، ءتىپتى سوتقا بەرمەك ەكەن. وسى تۇستا مەن ءوز قاتەلىگىمدى مويىندايمىن”، – دەدى ول.

ادىلگەرەي اتالعان اڭگىمەنى بىرنەشە جىل بۇرىن پودكاست بارىسىندا ايتىپ قالعانىن، ءارى ونى “وتە دورەكى” جەتكىزگەنىن مويىندادى. ول شىراقشىدان ەستىگەن اڭگىمەنى جاستار تىلىندە، دورەكى ەتىپ جەتكىزگەنىن، بۇل ۇلكەن قاتەلىك بولعانىن ايتتى.

ۇرپاقتارىنىڭ تالابى مەن اكتەردىڭ جاۋابى

قايرات ادىلگەرەي قۇرمانعازىنىڭ ۇرپاقتارى كوتەرگەن تالاپتى ورىنداۋعا دايىن ەكەنىن ءبىلدىرىپ، كۇيشىنىڭ جاتقان جەرىنە بارىپ، قۇران باعىشتايتىنىن جەتكىزدى.

“مەن ورالدىق اقساقالداردىڭ تالابىن ورىنداۋعا دايىنمىن، وسى بىرنەشە كۇندە استراحان قالاسىنا بارىپ، قۇران باعىشتاپ، بارلىق ماعلۇماتتى سول جەردە تۇسىندىرەمىن. سىزدەردەن كەشىرىم سۇرايمىن”، – دەدى ول.

داۋدىڭ تۋىنداۋىنا سەبەپ بولعان پىكىر

وقيعانىڭ ءمان-جايى الەۋمەتتىك جەلىدە تاراعان ۇزىندىدەن كەيىن ۋشىعا ءتۇستى. وندا اكتەردىڭ پودكاستتاردىڭ بىرىندە كۇيشى قۇرمانعازى جايلى ايتقان پىكىرى جاريالانعان.

“قۇرمانعازى ساعىربايۇلىن تەك كۇيشى رەتىندە بىلەمىز، ال شىن مانىندە بارىپ شىراقشىدان سۇراساڭ، ول باۋكەسپە، قاراقشى بولعان. تەرىس جولمەن جۇرگەن. دوسى يساتاي ەكەۋى “گوپستوپپەن” اينالىسقان. بايلاردان تارتىپ الىپ، كەدەيلەرگە تاراتقان”، – دەگەن سوزدەرى تاراعان ەدى.

وسىدان كەيىن باتىس ءوڭىرىنىڭ قىزىلقۇرت رۋىنىڭ وكىلدەرى مەن قۇرمانعازىنىڭ ۇرپاقتارى ارنايى مالىمدەمە جاساپ، اكتەردىڭ ءسوزى تاريحي تۇلعانىڭ بەدەلىنە نۇقسان كەلتىرەدى دەپ ەسەپتەيتىنىن ايتتى.

تاريحي دەرەكتەرگە قايشىلىق

مالىمدەمەدە اكتەر ايتقان اقپاراتتاردىڭ تاريحي دەرەكتەرگە سايكەس كەلمەيتىنى اتاپ ءوتىلدى. اتاپ ايتقاندا، قۇرمانعازىنىڭ مازارى اقجار ەمەس، رەسەي فەدەراسياسىنىڭ استراحان وبلىسى التىنجار ەلدىمەكەنىندە ورنالاسقانى، ونداعى شىراقشىنىڭ سوزدەرى اكتەر ايتقانداي بولماعانى ايتىلدى. سونداي-اق، قۇرمانعازىنىڭ دوسى يساتاي ەمەس، رۋلاس ەمشات بولعانى جانە ونىڭ نەگىزگى كاسىبى ۇرلىق پەن قاراقشىلىق ەمەس، كۇيشىلىك ەكەنى العا تارتىلدى.

اقساقالدار اكتەردىڭ سوزىنە قۇقىقتىق باعا بەرىلىپ، ساراپتاما جۇرگىزىلۋى ءۇشىن سوتقا جۇگىنەتىنىن، سونىمەن بىرگە قايرات ادىلگەرەيدىڭ قۇرمانعازىنىڭ باسىنا بارىپ، كەشىرىم سۇراۋىن تالاپ ەتكەنىن مالىمدەدى.