InfoHub Logo

قايرات بورانبايەۆ تاريحي جەڭىستەن كەيىن جەلىدە جازبا جاريالادى
"قايرات" فك باقىلاۋ كەڭەسىنىڭ ءتوراعاسى قايرات بورانبايەۆ الەۋمەتتىك جەلىدە تاريحي جەتىستىككە قاتىستى پىكىر ءبىلدىردى، دەپ حابارلايدى Infohub.kz.

بورانبايەۆ ءوز جازباسىندا كوماندانىڭ جىلدار بويى ەڭبەكتەنىپ، ءدال وسى ساتكە جەتۋدى ماقسات ەتكەنىن باسا ايتتى. ول قازاقستان فۋتبولىنىڭ دا چەمپيوندار ليگاسىنىڭ ءانۇرانى شىرقالاتىن دەڭگەيگە كوتەرىلە الاتىنىن دالەلدەگەنىن جازدى.
«اكادەمياداعى جۇيەلى جۇمىس، ينفراقۇرىلىمعا سالىنعان قارجى، ءوز تاربيەلەنۋشىلەرىمىزگە قولداۋ — ءبارى ۇزاقمەرزىمدى ناتيجە بەردى. شەتەلدەن دايىن شەشىم ىزدەۋدىڭ قاجەتى جوق: ەلدە ءوز كومانداڭدى، ءوز فۋتبول مەكتەبىڭدى قالىپتاستىرۋعا بولادى»، - دەپ جازدى ول.
قايرات بورانبايەۆ بۇل جەڭىس ايانباي ەڭبەك ەتكەن جۇزدەگەن جاننىڭ — باپكەرلەردىڭ، دارىگەرلەردىڭ، تالداۋشىلاردىڭ، تاربيەشىلەردىڭ، ويىنشىلاردىڭ جەڭىسى ەكەنىن اتاپ ءوتتى.

«بۇل جولدا سەنىم دە، كۇش تە، ارمان دا بار. ءبىز مۇنى جانكۇيەرلەر ءۇشىن جاسادىق. قالا ءۇشىن. ەلىمىز ءۇشىن. سەبەبى قازاقستاننىڭ فۋتبولدىق الەۋەتى بار. الماتىعا ەۋروپالىق الپاۋىت كلۋبتاردىڭ كەلۋى ءۇشىن. ءبىزدىڭ بالالاردىڭ ءوز ارمانى بولۋى ءۇشىن. قازاقستاندا ماقتان تۇتاتىن كوماندا بار ەكەنىن دالەلدەۋ ءۇشىن»، - دەپ قوستى بورانبايەۆ.