قالام جانە تۇلەك
«ەل بولىپ ولەڭ جىردىڭ تاقىرىبى، قاۋىشتى اۋىلىمەن اقىن ۇلى». بۇل ءبىر كەزدەگى مەكتەپ تۇلەگى، ەلدىڭ پەرزەنتى، بەلگىلى قالامگەر، جازۋشىلار وداعىنىڭ مۇشەسى، اقىن سەيىل بورانبايەۆپەن قوجاباقى اۋىلدىق مادەنيەت ءۇيىنىڭ ساحناسىندا وتكەن كەزدەسۋ كەشىنىڭ تاقىرىبى ەدى. بۇل كەزدەسۋ 2000 جىلى اقىن سەيىل بورانبايەۆتىڭ 70 جاسقا تولۋ مەرەيتويىنا بايلانىستى وتكىزىلگەن.
بەلگىلى اقىندار سەيىل بورانبايەۆ، انەس نارىمبەتوۆ، مەشىتباي قۇتتىقوۆتار №25 مەكتەپتىڭ ءبىر كەزگى تۇلەكتەرى ەدى. ولار مەكتەپتىڭ العاشقى تۇلەكتەرىنىڭ قاتارىنان سانالادى.
...سەيىل، انەس، مەشىتباي
جىرداعى شىققان جۇيرىكتەر،
مۇشەسى ەدى وداقتىڭ
ولەڭدە بولعان دارالى.
كوكىرەگى تولى كومبەگە،
تاريحشى ۇستاز ءارى اقىن،
قۇرمەت تۇتتى ورتاسى
اقانجان سىندى اعانى.
اسىل ءسوزدىڭ سىرىنان
شاكىرتكە ءتالىم ۇيرەتكەن
فايزوللاداي اقىندار
بولمىسى بولعان باعالى.
وسى ولەڭدە ايتىلعانداي، مەكتەپتىڭ الدىڭعى بۋىنىنداعى تۇلەكتەردىڭ اراسىنداعى ەلەۋلى ورنى بار جانداردىڭ ءبىرى – تاريحشى ۇستاز، اقىن، زەرتتەۋشى اقانجان كەلىمبەتوۆ، ادەبيەتشى ۇستاز، اقىن فايزوللا وماروۆتاردىڭ ەسىمدەرى دە قۇرمەتپەن اتالادى. بۇلار دا №25 مەكتەپتىڭ ءبىر كەزگى تۇلەكتەرى، قالام يەلەرى، كوپكە بەلگىلى جاندار بولدى.
...نۇرپەرزەنت پەن سەكسەنباي،
جەتىسكەندەي اقىندار
باسپا ءسوز اتتى مايداندا
قولىنان تۇسپەدى قالامى.
رەسپۋبليكالىق باسىلىمداردىڭ ءجۋرناليسى، اقىن نۇرپەرزەنت دومباي، بەلگىلى جۋرناليست سەكسەنباي كۇلىمبەتوۆ، اۋداندىق باسپاسوزدە جاۋاپتى قىزمەتتەر اتقارعان اقىن، بەلگىلى جۋرناليست، «قازالى ءۆالسى» ءانىنىڭ ولەڭىنىڭ اۆتورى جەتىسكەن ماكەنالى، اۋداندىق باسپاسوزدە ۇزاق جىلدار قىزمەت ىستەگەن جۋرناليست راۋشانبەك سەيتەنوۆتەر دە №25 مەكتەپتىڭ ءبىر كەزدەگى شاكىرتتەرى، مەكتەپتەن كەيىنگى ءومىر جولدا قالامدارى قارىمدى بولعان تۇلەكتەرى ەدى.
بەلگىلى تۋىندى «ەلىمنىڭ جۇرەگى – استانا» ءانىنىڭ ولەڭىنىڭ اۆتورى ساراش قوڭىربايەۆا دا جانە قۇرىلىسشى، كاسىپكەر، اقىن نۇربولات بەكەتايەۆتار دا №25 مەكتەپتىڭ ءبىر كەزگى تۇلەكتەرى بولدى.
سونىمەن قاتار اۋىلداعى قۇرىلىس سالاسىنىڭ مامانى، كەيىننەن ەنگەلس كەڭشارىنىڭ كاسىپوداق كوميتەتىنىڭ ءتوراعاسى بولعان جەتكەرباي ىسقاقوۆ تا تالانتتى قالامگەر، اقىنداردىڭ ءبىرى بولدى. ال جوعارى ءبىلىمدى مال دارىگەرى قازىبەك بايمانوۆ جازعان ءومىردىڭ سان-سالاسىنداعى كەمشىلىكتەردى سىنايتىن سىن-سىقاقتار ءبىر كەزدە اۋىل كلۋبىنداعى مادەني ءىس-شارالارعا قىزمەت ەتسە، ولەڭدەرى اۋداندىق باسپاسوزدە جارىق كورىپ تۇردى.
سونىمەن بىرگە جەرگىلىكتى اقىن ءامىرحان قانايەۆ جىرلارى اۋداندىق باسپاسوزدە جارىق كوردى جانە تاعى ءبىر تالانتتى جان مەدەتباي تۇيەبايەۆتىڭ ولەڭدەرى دە اۋداندىق باسپاسوزدە جاريالانىپ تۇرعان ەدى.
كوپ شاكىرتكە العاشقى ۇستاز بولعان نۇعىمان ءابدىرازاقوۆ اقىن كىسى ەدى. 70-80 جىلداردىڭ ىشىندە اۋداندىق گازەتتە ۇستاز ولەڭدەرى ۇزبەي جارىق كورىپ تۇردى.
80-جىلداردىڭ ىشىندە اۋداندىق گازەتكە ماقالالارى ۇزبەي جارىق كورىپ تۇراتىن سول كەزدىڭ كۇنى كەشەگى عانا مەكتەپ تۇلەكتەرى ءلاززات وڭالبايەۆا جانە تارعىن قانييەۆتەردىڭ ءبىرى كەيىننەن ۇستاز بولىپ قىزمەت اتقارسا، ەكىنشىسى كەيىننەن اۋداندىق گازەتتىڭ ءجۋرناليسى بولىپ قىزمەت اتقاردى.
90-جىلداردىڭ اياق شەنىندە №25 مەكتەپتە اسقار سۇلەيمەنوۆ اتىنداعى ادەبيەت ۇيىرمەسى، بارلىبەك سىرتانوۆ اتىنداعى قۇقىقتانۋ ۇيىرمەسى جانە حالىق اقىنى باينازار وتەپوۆ اتىنداعى «جاس قالامگەر» ۇيىرمەلەرى جۇمىس ىستەدى. وسى جولدار اۆتورىنىڭ جەتەكشىلىگىمەن جۇمىس جاساعان ۇيىرمەلەردىڭ ەكى ۇيىرمەگە ورتاق «ار جانە زاڭ» جانە «قۇقىق»، «جاس قالامگەر» قابىرعا گازەتتەرى شىقتى. ۇيىرمە مۇشەلەرى نۇرگۇل سارسەنوۆا، ميرا لەپەسوۆا، گۇلدانا ايداروۆا، بوتا جالماعامبەتوۆا، اقنۇر قۋاتبايەۆا، ت.ب. ولەڭدەرى قابىرعا گازەتتەرىندە جارىق كوردى جانە اۋىل ساحناسىنان وقىلدى. ۇيىرمە مۇشەلەرىنىڭ اراسىندا جىر ءمۇشايراسى وتكىزىلدى، ۇيىرمەنىڭ نەگىزىندە مەكتەپ وقۋشىلارىنىڭ اراسىنان I مەكتەپىشىلىك «ءان-دومبىرا» بايقاۋى ۇيىمداستىرىلدى. وعان اراندى اۋىلىنان كەلىپ وقيتىن جانە قوجاباقى مەكتەبى وقۋشىلارىنىڭ اراسىنان دومبىرامەن ءان سالاتىن 17 وقۋشى قاتىستى.
سەيىلدەي تۇلەگى قاناتتانعان، كوپكە بەلگىلى حالىق اقىندارىنىڭ ءىزى قالعان ولكەدەن قازىردە جاس دارىندار تۇلەۋدە. مەكتەپتىڭ كەيىنگى بۋىن شاكىرتتەرى دينا بوكەباي، ايسۇلۋ جەتكەرگەن جانە راۋشانبەك شاراپات جىرلارى باسپا ءسوز بەتىندە كەڭىنەن جارىق كورىپ ءجۇر.
تومەندە مەكتەپتىڭ مەكتەپتى 1951 جىلى بىتىرگەن تۇلەگى، بەلگىلى اقىن مەشىتباي قۇتتىقوۆتىڭ ءوز سالاسىنا بايلانىستى جازىلعان ءبىر ولەڭى ۇسىنىلىپ وتىر.
مەشىتباي قۇتتىقوۆ – بوزكول اۋىلىنىڭ پەرزەنتى، قوجاباقى مەكتەبىنىڭ تۇلەگى. ادەبيەت فاكۋلتەتىن بىتىرگەن. ىشكى ىستەر سالاسىندا باسشى قىزمەتتەردە ىستەگەن. ولەڭ «ساقشى» گازەتىنەن الىندى. گازەتكە اقىننىڭ پەرزەنتى ۇسىنعان.
تىنىشتىق ساقشىلارى
ءبىر تاۋلىك «ستانسياسىن تىنىشتىقتىڭ»
باسقاردىم،
تەلەفوننان دىبىس كۇتتىم.
ءبىر تاۋلىك شارشادىم مەن،
كەلىستىرىپ،
اراسىن قيانات پەن دۇرىستىقتىڭ.
بەرەدى اداسسا دا ماعان حابار،
بەرەدى تالاسسا دا ماعان حابار.
كوڭىلى ماعان ايتسا،
جاي تابارداي،
ءتارىزدى تاسقىننان دا امان قالار.
جۇگىرەم ادىلەتتى شىراق قىلىپ،
تىڭدايمىن ايسىز تۇندە قۇلاق ءتۇرىپ.
ءبىر سەندە وي-قيالىم،
ءبىر سەن ءۇشىن،
كەلەمىن مەن جانىمدى لاقتىرىپ.
تاعى دا ءبىر تاڭ اتتى كوز الدىمدا،
قيىنى،
قىزىعى مەن ءوز الدىنا.
باستىققا «تىنىشتىق» دەپ باياندادىم،
مەن بۇگىن ەلدەن بۇرىن ءسوز الدىمدا.
ەسىگىن تىنىشتىقتىڭ ايقارا اشىپ،
تاڭمەنەن ارايلانىپ،
تۇردىم تاسىپ،
ازانعى ءتۇتىندى ەندى كورىپ تۇرمىن،
اسىققان اداممەنەن ديدارلاسىپ.
You Might Also Like
-
بۇگىن دۋشانبەدە «قازاقستاننىڭ ءبىلىم كۇنى» كورمەسى اشىلدى. بۇل جايىندا ەلىمىزدىڭ تاجىكستانداعى ەلشىلىگىنىڭ باسپا ءسوز قىزمەتىنەن ءمالىم ەتتى.
-
تەڭدەۋلەر مەن تەڭدەۋلەر جۇيەلەرىن تەرەڭ ءتۇسىنىپ مەڭگەرۋ ماتەماتيكالىق بىلىمدەردى ودان ءارى دامىتۋعا، قورشاعان ورتاداعى سان الۋان قۇبىلىستارعا، تەرەڭ ماعىنالى مودەلدەر جاساۋعا ۇيرەتەدى. ولاي بولسا، ...
