InfoHub Logo

استاناداعى «كوركەم-3» تۇرعىن ءۇي كەشەنىندە بولعان جويقىن ءورت تەك ءبىر وتباسىنىڭ ەمەس، بۇل تۋرالى ەستىگەن ءار ادامنىڭ جۇرەگىنە اۋىر ءتيدى. قايعىلى وقيعا كەزىندە كورشىلەرىن قۇتقارۋعا تىرىسقان كۋاگەر اشا سول تۇندە بولعان جانتۇرشىگەرلىك جاعدايدى بايانداپ بەردى.

بۇل تۋرالى Infohub.kz اقپارات اگەنتتىگى حابارلايدى.

اشانىڭ ايتۋىنشا، ول سول كۇنى ترەنينگتەن كەيىن ارىپتەستەرىمەن كەزدەسىپ، ۇيىنە كەش ءارى شارشاپ ورالعان. ۇيقىعا كەتكەنىمەن، ءتۇن ورتاسىندا بەلگىسىز دىبىستان شوشىپ ويانادى.

تۇنگى ساعات 01:17 شاماسىندا تىنىشتىقتى بۇزعان ءالسىز سىتىر دىبىستى ەستىگەن ول العاشىندا روزەتكادان اقاۋ شىققان بولار دەپ ويلاعان. ۇيقىلى-وياۋ كۇيدە بارلىق ەلەكتر قۇرالدارىن روزەتكادان اجىراتا باستايدى. الايدا ەشقانداي اقاۋ بايقالمايدى. سول ساتتە پاتەر ءىشىن قويۋ ءتۇتىن جايلاپ بارا جاتقانىن سەزەدى. ەڭ قورقىنىشتىسى — قابىرعانىڭ ارعى جاعىنان ارەڭ ەستىلگەن «اللا، اللا...» دەگەن ىڭىرسىعان داۋىس ەدى.

ول دەرەۋ دالىزگە جۇگىرىپ شىققاندا، بۇكىل پودەزدى قارا ءتۇتىن باسىپ قالعانىن كورەدى. جاعدايدىڭ كۇردەلى ەكەنىن تۇسىنگەن اشا ورتەنىپ جاتقان پاتەردىڭ ەسىگىن قاعىپ، كومەك سۇراي باستايدى. ءبىراق ىشتەن ەش جاۋاپ بولمايدى.

قورقىنىشىنا قاراماستان، ول باسقا كورشىلەردىڭ ەسىكتەرىن توقتاۋسىز قاعىپ، ءبارىن وياتۋعا تىرىسادى. الايدا ءيىس تيگەندىكتەن، كوپشىلىگى بىردەن ەسىن جيا الماي، ەسىك اشۋعا اسىقپاعان.

ءبىر كەزدە كورشىلەردىڭ ءبىرى — ەرلى-زايىپتىلار ەسىكتى اشىپ، نە بولعانىن سۇرايدى. اشا ولارعا جاعدايدىڭ قانشالىقتى ءقاۋىپتى ەكەنىن ءتۇسىندىرىپ، كورشى پاتەردە ادامداردىڭ قالىپ قويعانىن ايتىپ، كومەككە شاقىرادى. بىرتىندەپ باسقا تۇرعىندار دا شىعا باستايدى. دەگەنمەن، ولاردىڭ ارەكەتى باياۋ بولعان، كوپشىلىگى ابدىراپ قالعان.

اشا سول ساتتە ەر ادامداردان ارەكەت ەتۋدى سۇراپ، ەسىكتى بۇزۋعا ۇندەيدى. ءبىراق ولاردىڭ قولىندا قاجەتتى قۇرال بولماعان. سوعان قاراماستان، ولار ورتەنىپ جاتقان پاتەردىڭ ەسىگىنە جاقىنداي باستايدى.

كەيىن بەلگىلى بولعانداي، تۇرعىنداردىڭ كوبى ۇيقىدا بولعان ءارى ءتۇتىننىڭ اسەرىنەن ەسىن تولىق جيناي الماعان. وسى ۋاقىتتا اشا قايتادان 101 قىزمەتىنە حابارلاسىپ، ءورت تۋرالى ناقتى مالىمەت بەرەدى. ال قابىرعانىڭ ار جاعىنان شىققان ءالسىز داۋىستار ءبىر ءسات تە تولاستاماعان.

ءورت سوندىرۋشىلەر وقيعا ورنىنا جەدەل جەتىپ، جالىندى اۋىزدىقتاۋعا كىرىسكەن. ءبىراق بۇل ءتۇن كوپتەگەن ادام ءۇشىن ۇمىتىلماس قايعى مەن ۇرەيگە تولى بولىپ قالدى.

ودان كەيىن اشا جانىپ كەتكەن كورشى پاتەردىڭ وتاعاسىن كورىپ قالعانىن ايتىپ بەردى.

"جىلاپ كەلە جاتىپ، كولىگىمنىڭ ارتىندا، بورديۋردە وتىرعان ەر ادامدى كوردىم، ونى باسقا ادامدار قورشاپ الىپتى. جاقىنىراق بارعاندا ونىڭ كورشى ايەلدىڭ كۇيەۋى ەكەنىن تانىدىم، ونىڭ جاعدايى وتە مۇشكىل ەدى. كەنەتتەن ونىڭ دەنساۋلىعى سىر بەرىپ، جەدەل جاردەم كولىگى كەلىپ، ونى تەكسەرە باستادى. جانىندا ونىڭ جانە ايەلىنىڭ تۋىستارى بولدى. ولاردىڭ سول ساتتە نە سەزىنگەنىن ەلەستەتۋدىڭ ءوزى قورقىنىشتى. بىزگە ءمان-جايدى تولىق انىقتاۋ ءۇشىن اڭگىمەلەسۋگە شاقىراتىندارىن حابارلادى. مەن مۇندا بولعان وقيعانىڭ ءبارىن جازعان جوقپىن، ءبىراق وسىنىڭ ءوزىن جازىپ وتىرىپ، جۇرەگىم قايتادان سىزداپ، كوزىمە جاس كەلدى..."، - دەيدى ول.

ايتا كەتەيىك، ءورت 12 ساۋىرگە قاراعان ءتۇنى تۇركىستان كوشەسىندە ورنالاسقان 21 قاباتتى تۇرعىن ۇيدە بولعان. ءورت 15-قاباتتاعى پاتەردەن شىققان. سول ساتتە پاتەردە وتباسى بولعان.