InfoHub Logo

اتىراۋ وبلىسىنداعى قاراباليندەر وتباسىنىڭ قازاسىنا قاتىستى ءىس بويىنشا سوتتا مارقۇم ماقسوت ءقاراباليننىڭ جيەنى فاريزات كەنجەعالييەۆا جاۋاپ بەردى. ول تەرگەۋ كەزىندە انىقتالماعان، وزىندە كۇمان تۋدىرعان بىرنەشە جايتتى سوتقا جەتكىزدى.

بۇل تۋرالى Infohub.kz اقپارات اگەنتتىگى حابارلايدى.

ۇيگە ەكىنشى كىلتتىڭ پايدا بولۋى

فاريزات كەنجەعالييەۆانىڭ ايتۋىنشا، تەرگەۋ اياقتالعان سوڭ مارقۇمداردىڭ ءۇيىنىڭ كىلتى وزىنە بەرىلگەن. ول ۇيگە كۇندەلىكتى بارىپ، جاعدايىن باقىلاپ وتىرعان. الايدا ءبىر كۇنى ۇيدەن بۇرىن-سوڭدى كەزدەسپەگەن ەكىنشى كىلتتىڭ تابىلۋى ونىڭ كۇدىگىن كۇشەيتىپ، ءىستىڭ ءمان-جايىن تەرەڭىرەك زەرتتەۋگە يتەرمەلەگەن.

«تەرگەۋ اياقتالعان سوڭ كىلتتى ماعان تاپسىردى. مەن كۇن سايىن سول ۇيگە بارىپ ءجۇردىم. ءبىر كۇنى تۇستەن كەيىن ەكىنشى كىلت پايدا بولدى. ونى كىم اكەلدى؟ بۇرىن ونداي كىلت مۇلدە بولماعان. بارلىعى ءبىر عانا كىلتپەن كىرىپ-شىعاتىن. پوليسەيلەردىڭ ءوزى العاشىندا ۇيگە ەسىكتى بۇزىپ كىرىپ، كىلتتى ىشىنەن تاپقان ەدى»، – دەدى كۋاگەر سوتتا.

قوناق كۇتۋگە دايىندىق بەلگىلەرى

كۋاگەردىڭ سوزىنشە، قايعىلى جاعداي بولعان ۇيدە قوناق كۇتۋگە دايىندىق جۇرگىزىلگەندەي اسەر قالدىرعان. سەبەبى مارقۇم ناۋرىز مۇقانعالييەۆ تۋىستارىنا كۇيەۋبالاسىنىڭ وتباسىمەن بىرگە قوناققا كەلەتىنىن حابارلاعان.

«اعام مال سويىپ، ەت دايىنداپ قويعان. قوناق كۇتۋگە قامدانعان. وسىنداي جاعدايعا قالاي بارعانىن ءالى كۇنگە دەيىن تۇسىنە المايمىن»، – دەدى ول.

ءۇيدىڭ تازالىعى مەن رەتتىلىگى

فاريزات كەنجەعالييەۆانىڭ ايتۋىنشا، وتباسى جوعالعاننان كەيىن ءۇيدىڭ ءىشى ەرەكشە تازالىعىمەن كوزگە تۇسكەن.

«ۇيگە كىرگەندە ءبارى رەت-رەتىمەن تۇرعانىن كوردىك. ءۇي يەلەرى از عانا ۋاقىتقا شىعىپ كەتكەندەي اسەر قالدىردى. بارلىق ىدىس جۋىلعان، ءۇي جينالعان. سويىلعان ەتتىڭ ءبىر بولىگى توڭازىتقىشقا سالىنىپ قويىلعان»، – دەدى فاريزات كەنجەعالييەۆا.

تەلەفون ارقىلى الداۋ ارەكەتى

سونىمەن قاتار، كۋاگەر سۇلتان سارسەمالييەۆتىڭ مارقۇم ناۋرىزدىڭ تەلەفونىن پايدالانىپ، تۋىستارىمەن حات-حابار الماسقان بولۋى مۇمكىن ەكەنىن ايتتى. ونىڭ پىكىرىنشە، بۇل ارەكەت ارقىلى جاقىندارىنىڭ كۇدىگىن سەيىلتىپ، ولاردى اداستىرۋعا تىرىسقان.

«مەن العاشقى كۇننەن باستاپ اعامنىڭ ۇيىندە بولدىم. اعام مەن جەڭگەمنىڭ ءمايىتى تابىلعان كەزدە دە سول جەردە ءجۇردىم»، – دەدى كۋاگەر.