InfoHub Logo

ءانشى قاراقات ءابىلدينا مارقۇم اكەسىنىڭ رۋحىنا ارناپ اۋىزاشار بەرىپ، الەۋمەتتىك جەلىدە قىزۋ تالقىعا ءتۇستى.

بۇل تۋرالى Infohub.kz اقپارات اگەنتتىگى حابارلايدى.

ءانشى اكەسىنىڭ ومىردەن وتكەنىنە 20 جىلعا جۋىق ۋاقىت بولعانىن ايتىپ، رامازان ايىندا داستارحان جايىپ، قۇران باعىشتاعانىن جەتكىزدى. ول اكەسىنىڭ بيىل 90 جاسقا تولار ەدى دەي كەلە، ونىڭ تاربيەسى مەن قالدىرعان ءىزى ماڭگى جادىمىزدا قالاتىنىن اتاپ ءوتتى. اۋىزاشارعا ونەردەگى ارىپتەستەرى مەن بەكبولات تىلەۋحان دا قاتىسىپ، داستارحان باسىندا ءان ايتىلىپ، كەي قوناقتارعا شاپان جابىلعان.

جەلى قولدانۋشىلارىنىڭ نارازىلىعى

الايدا، بۇل جاعداي كوپشىلىكتىڭ نارازىلىعىن تۋدىردى. جەلىدەگى كەيبىر پايدالانۋشىلار ەسكە الۋ داستارحانىنىڭ «توي سەكىلدى» ءوتۋىن سىنعا الىپ، «بۇل نە سۇمدىق، توي ەمەس قوي»، «ەسكە الۋدان دا شوۋ جاسايتىن بولعان»، «اس ەمەس ديسكوتەكا» دەگەن سياقتى پىكىرلەر قالدىردى.

ءانشىنىڭ جاۋابى

وسى سىن-پىكىرلەردەن كەيىن قاراقات ءابىلدينا الەۋمەتتىك جەلىدەگى پاراقشاسىندا ءوزىن ءسوز ەتكەندەرگە جاۋاپ بەرىپ، سابىر ساقتاۋعا شاقىردى. ول: «سەن جايلى عايبات ايتىلسا - رەنجىمە. سەبەبى ادامدار سوزىمەن سىنايدى، ال اللا نيەتپەن ولشەيدى. ارتتان ايتىلعان ءاربىر ءسوز سەنىڭ ەمەس، ايتقاننىڭ موينىنداعى امانات. ەگەر سەن ءۇنسىز سابىر ەتسەڭ، راببىڭ سەن ءۇشىن ءادىل ۇكىم بەرەدى. عايبات سەنى تومەندەتپەيدى، ەگەر جۇرەگىڭ تازا بولسا. كەرىسىنشە، ول ساعان - ساۋاپ، ال ايتقانعا - اۋىر جۇك»، - دەپ جازدى.