InfoHub Logo

قازاقستان پرەزيدەنتى قاسىم-جومارت توقايەۆ پەن تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ تۇركىستان قالاسىنداعى ءبىرقاتار تاريحي جانە مادەني ورىندارعا باردى.

مەملەكەت باسشىلارى الدىمەن «كۇلتوبە» قالاشىعىن مۋزەيگە اينالدىرۋ بارىسىمەن تانىسىپ، كونە شاھاردى ساقتاۋ جانە اباتتاندىرۋ جوباسى بويىنشا اقپارات الدى. جالپى اۋماعى 27 گەكتاردى قۇرايتىن ارحەولوگيالىق قازبا جۇمىستارى اياقتالعان. سونىمەن قاتار، تاياۋ ۋاقىتتا اشىلاتىن «قولونەرشىلەر قالاشىعىنىڭ» تۇجىرىمداماسى تانىستىرىلدى. بۇل اۋماقتا شەبەرحانالار، ۇلتتىق تاعامدار ۇسىناتىن ورىندار، شىعىس بازارى مەن شاعىن قوناقۇيلەر ورنالاساتىن بولادى. ايتا كەتەيىك، بيىل 25 ناۋرىزدا تۇركىستانعا World Craft Council حالىقارالىق ۇيىمى «قولونەرشىلەر قالاسى» مارتەبەسىن بەرگەن.

ساپار اياسىندا قاسىم-جومارت توقايەۆ پەن گۋربانگۋلى بەردىمۇحامەدوۆ قوجا احمەت ياساۋي كەسەنەسىندەگى تاريحي جادىگەرلەرمەن تانىستى.

كەيىن تاراپتار «ازىرەت سۇلتان» مۋزەي-قورىعى اۋماعىنداعى «ەتنواۋىل» ۇلتتىق-مادەني كەشەنىنە باردى. وندا شىعىس بازارىن ارالاپ، ءداندى داقىلداردىڭ سۇرىپتارىن كورىپ شىقتى. قوناقتارعا ۇلتتىق تاعامدار، اعاش وڭدەۋ، كىلەم توقۋ، كيىز باسۋ، قىش پەن زەرگەرلىك بۇيىمدار جاساۋ سىندى قولونەر شەبەرلەرىنىڭ جۇمىستارى كورسەتىلدى. سونداي-اق، قازاق حالقىنىڭ ءسالت-داستۇرىن تانىتاتىن تەاترلاندىرىلعان قويىلىم ۇسىنىلىپ، تازى مەن قىران قۇستار تانىستىرىلدى.