InfoHub Logo

بەيجىڭ وليمپياداسىنىڭ چەمپيونى، قازاقستاندىق بوكسشى باقتيار سارسەكبايەۆ يتاليادا ءوتىپ جاتقان قىسقى وليمپيادا ويىندارىندا التىننان القا تاققان مانەرلەپ سىرعاناۋشى ميحايل شايدوروۆتى ەرەكشە قۇتتىقتادى. ول جاس سپورتشىعا ارناعان جىلى لەبىزىن ءبىلدىرىپ، الداعى جولىنا اقىل-كەڭەسىن ايتتى.

بۇل تۋرالى Infohub.kz اقپارات اگەنتتىگى حابارلايدى.

شىنايى قۇتتىقتاۋ

«جارادىڭ، ميشا! وليمپيادا چەمپيونى اتانۋ وڭاي ەمەس ەكەنىن، قيىن دا اۋىر جولدان وتپەي، التىن مەدالدى جەڭىپ الۋ مۇمكىن ەمەستىگىن دالەلدەدىڭ! سەن وتكەن جولدان مەن دە، باسقا دا وليمپ شىڭىن باعىندىرعان اعالارىڭ دا وتكەن. تالاي رەت كوكىرەگىمنەن يتەرىپ، اياعىمنان شالعاندار بولدى. سىنىپ كەتەتىندەي كەزدەر دە جەتكىلىكتى بولدى، ءبىراق سول قيىندىقتارعا سىنباي، ارمانىما جەتتىم»، - دەپ جازدى باقتيار سارسەكبايەۆ.

سپورتتاعى قيىندىقتار مەن قولداۋ

ول ءوزىنىڭ سپورتتىق جولىندا كەزدەسكەن قيىندىقتاردى ەسكە الىپ، ميحايل شايدوروۆتىڭ دا وسىنداي كەزەڭدەردى باستان كەشكەنىن ايتتى. «سەنىڭ دە 5 جىل بۇرىن كورگەنىڭدى كەيبىرەۋلەر جارىسا جازىپ جاتىر. ءبارىمىزدىڭ باسىمىزدان وتكەن... سول كەزدەگى باسشىلاردان دا قايىر كورگەن جوقپىز. ءبىراق اللاعا شۇكىر، زامان وزگەرىپ، سپورتقا دەگەن كوزقاراس جاقساردى. قازاق سپورتى ەڭسەسىن كوتەرىپ، ءاربىر جارىستان جاقسى جاڭالىقتارمەن ورالىپ ءجۇرمىز»، - دەپ تولىقتىردى وليمپيادا چەمپيونى.

جاس چەمپيونعا اقىل-كەڭەس

باقتيار سارسەكبايەۆ ميحايل شايدوروۆتىڭ وليمپيادا شىڭىن باعىندىرۋىنا كوپ ادامنىڭ سەپتىگى تيگەنىن اتاپ ءوتتى. «ءالى جاسسىڭ عوي، الدا ءالى الار اسۋىڭ كوپ. كەلەسى وليمپيادا التىنىن دا سىيلارسىڭ بىزگە! ميشاباي، ماكە، بۇگىن – سەنىڭ كۇنىڭ، سەنىڭ ەكىنشى تۋىلعان كۇنىڭ. بۇل كۇن قايتىپ كەلمەيدى، ۇزاققا دا سوزىلمايدى. قازىرگى كوككە كوتەرگەن حالىق، ءسال شالىسساڭ، جۇندەي تۇتەدى. باۋىرىم، اڭقىلداعان ءتۇرىڭدى كورىپ، جۇرەگىم ەزىلىپ قۋاندىم، وسى قالپىڭدا قال! ەشكىمنىڭ جەتەگىندە كەتپە! ءتۇن بالاسى ۇيقى كورمەي، سەنىڭ تىلەۋىڭدى تىلەگەن حالقىڭنىڭ قۋانىشىن سۋ سەپكەندەي ەتكىسى كەلگەندەردەن اۋلاق بول! قوش كەلدىڭ ماكە، قاتارىمىزعا!»، - دەپ جازباسىن اياقتادى.