InfoHub Logo

ەكى شەتەلدىك بلوگەر الماتىدا الەۋمەتتىك جەلىدە قازاق قىزدارىن قورلاعانى ءۇشىن 15 تاۋلىككە قاماۋعا الىندى. الايدا، بۇل ءىس ولار ءۇشىن تەك اكىمشىلىك جازامەن اياقتالمايتىنى بەلگىلى بولدى. قازىرگى ۋاقىتتا قازاقستان رەسپۋبليكاسى قىلمىستىق كودەكسىنىڭ 174-بابى، ياعني «الەۋمەتتىك، ۇلتتىق، رۋلىق، ناسىلدىك نەمەسە ءدىني الاۋىزدىقتى قوزدىرۋ» بويىنشا قىلمىستىق ءىس قوزعالىپ، تەرگەۋ باستالدى.

بۇل تۋرالى Infohub.kz اقپارات اگەنتتىگى حابارلايدى.

باس پروكۋروردىڭ ورىنباسارى عالىمجان قويگەلدييەۆتىڭ ايتۋىنشا، بۇل بۇرىنعى اكىمشىلىك ىستەن بولەك، جاڭا قىلمىستىق ءىس بولىپ تابىلادى. اتالمىش باپتىڭ 2-بولىگى بويىنشا، ەگەر بۇل ارەكەتتەر ءبىر توپ اداممەن، الدىن الا ءسوز بايلاسۋ ارقىلى، بىرنەشە رەت جاسالسا، نەمەسە قىزمەت بابىن پايدالانىپ، شەت ەلدىك اقپارات قۇرالدارىن قولدانىپ جاسالسا، وندا 5 جىلدان 10 جىلعا دەيىنگى مەرزىمگە باس بوستاندىعىنان ايىرۋ جازاسى كەسىلۋى مۇمكىن.

ستريمەرلەردىڭ ارەكەتىنە قاتىستى

بۇعان دەيىن ەكى شەتەلدىك ستريمەر تىكەلەي ەفير كەزىندە قازاقستاندىق قىزدار تۋرالى قورلايتىنداي پىكىرلەر ايتقان بولاتىن. بۇل ۇزىندىلەر الەۋمەتتىك جەلىدە تەز تارالىپ، قوعامدا ۇلكەن نارازىلىق تۋدىردى. سوسيال جەلىدەگى تولقۋلاردان كەيىن، جەرگىلىكتى تۇرعىندار بلوگەرلەرمەن كەزدەسىپ، كوپشىلىك الدىندا كەشىرىم سۇراۋدى تالاپ ەتتى. كەيىننەن قۇقىق قورعاۋ ورگاندارى ارالاسىپ، الماتى پوليسياسى تەكسەرۋ جۇرگىزىپ، ەكى شەتەلدىككە ينتەرنەتتە ۇساق بۇزاقىلىق جاساعانى ءۇشىن 15 تاۋلىك اكىمشىلىك قاماققا الۋ جازاسىن تاعايىندادى.

باسقا ستريمەرلەردىڭ رەاكسياسى

بۇل جاعدايدى ستريمەرلەر قاۋىمداستىعى دا بەلسەندى تالقىلادى. كەيبىر بلوگەرلەر سوتتىڭ شەشىمىن قولداسا، ەندى ءبىرى مۇنى قىلمىس دەپ سانامايتىنىن مالىمدەدى. وسى وقيعاعا قاتىسقانداردىڭ ءبىرى وزىنە قاتىستى قۋدالاۋ مەن قورقىتۋدى توقتاتۋدى ءوتىندى.