InfoHub Logo

قازاق ءتىلىنىڭ اۋەزدى ءۇنى الەمنىڭ تۇكپىر-تۇكپىرىنە، جاپونيا مەن پورتۋگاليادان باستاپ اقش پەن چيليگە دەيىن جەتتى. بۇل جەتىستىكتىڭ باستى سەبەبى – قازاقستاننان شىققان جاس ارتىستەر. ولاردىڭ اندەرى TikTok-تا ۆيرۋس بولىپ تاراپ، الەمدىك جۇلدىزداردىڭ ستوريسcتەرىنە شىعىپ، شەتەلدىكتەردى قازاق ءتىلىن ۇيرەنۋگە، دومبىرا تارتۋعا جانە الماتىعا بيلەت ساتىپ الۋعا يتەرمەلەۋدە. "جۇلدىز FM" راديوسىمەن بىرگە "Infohub.kz" شەتەلدىكتەردى قازاق سوزدەرىن جاتتاۋعا ءماجبۇر ەتكەن التى ءارتىستى باياندايدى.

بۇل تۋرالى Infohub.kz اقپارات اگەنتتىگى حابارلايدى.

Dudeontheguitar

نۇربەك ەلەمەس، ياعني dudeontheguitar، قازاقستاننان تىس جەرلەردە دە تىڭدارمانداردىڭ جۇرەگىنەن ورىن تاپقان ارتىستەردىڭ ءبىرى. ونىڭ Dododowson-مەن بىرگە جازعان «Barajatr» ءانى الەمنىڭ ءار ەلىندەگى تىڭدارمانداردىڭ نازارىن اۋدارىپ، الەۋمەتتىك جەلىلەردە تەز ارادا تانىمال بولدى.

قازىرگى الەمدەگى ۋاقىت پەن تاڭداۋ تاقىرىبىنا ارنالعان بۇل ءاندى بلوگەر A1234 قولداپ، ءارتىستىڭ "جۇلدىزدى ءساتى" دەپ اتادى.

"Dudeontheguitar-دى 2023 جىلدان بەرى باقىلاپ كەلەمىن، ءار جاڭا تۋىندىسى شىققان سايىن مەنى ودان ءارى شابىتتاندىرادى. Dododowson-مەن بىرگە جاساعان بۇل ءانى ونىڭ جۇلدىزدى ءساتى سياقتى! قازاقستان ءاردايىم ىستىق ەنەرگيا بەرەدى"، - دەپ جازدى بلوگەر A1234 ءوز پاراقشاسىندا.

جەلىدەگى پىكىرلەردە شەتەلدىك تىڭدارماندار قازاقشا ءبىر ءسوز تۇسىنبەسە دە، ءاننىڭ العاشقى سەكۋندتارىنان-اق باۋراپ الاتىنىن مويىندادى.

"بۇل قازاقستاننىڭ Tyler، The Creator-ى عوي!"، "قازاقستاننىڭ مۋزىكالىق ساحناسى ويلاعاننان الدەقايدا جاندى. Dudeontheguitar ماعان Winona Forever جانە Oscar Jerome سياقتى باتىستىق يندي-توپتاردى ەسكە سالادى"، "بۇل ءان ماعان قالاي ۇسىنىلعانىن بىلمەيمىن، ءبىراق ءانى تاماشا، ماعان ۇنايدى"، - دەپ جازدى جەلى قولدانۋشىلارى.

Ayau

ءانشى Ayau (اياۋلىم قۇسايىن) 2022 جىلى «sensiz؟» انىمەن دەبيۋت جاسادى، ال ەكىنشى ءانى «sybyrlaiyn <3» مۋزىكالىق رەيتينگتەردى باعىندىردى. بۇل كومپوزيسيا Apple Music Kazakhstan جانە Spotify-داعى Viral 50 Kazakhstan چارتتارىندا اپتالاپ تۇرىپ، كەيىن TikTok-تا تانىمال بولدى.

بۇگىندە Ayau-دىڭ اندەرىن الەمدىك جۇلدىزداردىڭ جازبالارىندا ءجيى ەستۋگە بولادى. مىسالى، امەريكاندىق اكتريسا سيدني سۋيني Instagram-داعى ستوريسcىندە «kõzder» انىنە تۇسىرىلگەن ۆيدەونى جاريالادى. بۇل ءان – جانجالدار مەن رەنىشتەرگە قاراماستان، سەزىمدەردىڭ ادال قالاتىنى تۋرالى باياندايدى.

بۇعان دەيىن ەۆا لونگوريا دا Ayau-دىڭ مۋزىكاسىمەن ۆيدەو جاريالاعان بولاتىن. اكتريسا M’Dee جانە Shiza-مەن بىرگە جازىلعان «basqany» كومپوزيسياسىن پايدالاندى. سونىمەن قاتار، قازاقستاندىق ءانشىنىڭ اندەرى مودەل سورا پاك، K-pop توبى Kep1er مۇشەسى حيۋنين باحييە جانە جاپوندىق بيۋتي-بلوگەر Sanomai جازبالارىندا دا كورىندى.

جاپونيادان كەلگەن 24 جاستاعى ستۋدەنت رەي، ءانشىنىڭ قايىرىمدىلىق كونسەرتى ءۇشىن قازاقستانعا العاش رەت ۇشىپ كەلدى.

"قازاقستاندىق پوپ-مۋزىكا ەرەكشە جانە قىزىقتى، سەبەبى كوپتەگەن ارتىستەردىڭ وزدەرىنىڭ قولتاڭباسى بار، ونى باسقا ارتىستەر ەشقاشان كوشىرە المايدى. سونىمەن قاتار، ولاردىڭ اندەرى ەسكىرگەن ەمەس، باتىستىق مۋزىكالىق تەندەنسيالاردان قالمايدى. قازاقستاندىق ارتىستەردىڭ كومپوزيسيالارىنداعى تەپە-تەڭدىكتى باعالايمىن. ال ءداستۇرلى اسپاپتاردى اندەرىندە قولدانۋى، مەنىڭ ويىمشا، وتە تالعامپاز جانە كەرەمەت"، - دەپ اتاپ ءوتتى ول.

امەريكالىق اكتەر يەن ارميتيدج، "شەلدوننىڭ بالالىق شاعى" سەريالىندا باستى ءرولدى سومداعان، ءانشىنىڭ AYAULYM البومىن ءوزىنىڭ سۇيىكتى شىعارىلىمدارىنىڭ قاتارىنا قوسقان. كەيىن ول «kel kel :)» ءانىنىڭ قايىرماسىن ورىنداپ، بۇل ونىڭ سۇيىكتى كومپوزيسيالارىنىڭ ءبىرى ەكەنىن ايتقان ۆيدەو جازدى.

ديماش قۇدايبەرگەن

ديماش قۇدايبەرگەن الدەقاشان الەمدىك دەڭگەيدەگى مۋزىكانت رەتىندە تانىلعان. كوپتەگەن شەتەلدىك تىڭدارماندار ءۇشىن ونىڭ ەسىمى قازاق تىلىمەن جانە مۋزىكاسىمەن تانىسۋعا سەبەپ بولدى.

وتكەن جىلدىڭ كۇزىندە ءانشى نيۋ-يوركتەگى اتى اڭىزعا اينالعان Madison Square Garden ارەناسىندا جەكە كونسەرتىن وتكىزىپ، بۇل ساحنادا جەكە شوۋ كورسەتكەن العاشقى قازاقستاندىق ءارتىس اتاندى.

كونسەرت كەزىندە ديماش قازاقستاننىڭ ءانۇرانىن ورىنداپ، دومبىرادا ويناپ، الەمگە قازاق مادەنيەتىن تانىستىرۋدى ءوز ميسسياسى سانايتىنىن تاعى دا ەسكە سالدى.

"مەن قازاقپىن. ۇيدە دە، كورشى ەلدەردە دە، باسقا قۇرلىقتاردا دا جۇرگەنىمدە، ءبىزدىڭ مادەنيەتىمىزدى الەمگە ءاردايىم جەتكىزىپ، بولىسەتىن بولامىن"، - دەپ اتاپ ءوتتى ءارتىس.

بۇل سوزدەر تىڭدارمانداردىڭ جۇرەگىنەن جول تاپتى. مىسالى، سولتۇستىك پورتۋگاليادان كەلگەن ءانشى لارا الەيشو ءۇشىن قازاقستانمەن تانىستىعى YouTube-تاعى ديماش بەينەباياندارىنان باستالعان.

"ول مۋزىكالىق فەنومەن، وعان تەڭدەس جوق"، - دەدى لارا.

شابىتتانعان لارا ءتىلدى ءوز بەتىنشە ۇيرەنىپ، قازاق اندەرىن ورىنداي باستادى.

چيليدە دە وسىنداي جاعداي بولدى. و'حيگگينس ايماعىنىڭ تۇرعىنى ماريا مۋنوس ديماش دومبىرادا ويناعانىن كورىپ، وعان "عاشىق بولعانىن" مويىندايدى. اسپاپ وعان سونشالىقتى ۇناعاندىقتان، ول ەكى جىل بويى بەينەساباقتار مەن ارنايى باعدارلامالار ارقىلى ءوز بەتىنشە ۇيرەنىپ كەلەدى.

"ديماشتىڭ ارقاسىندا دومبىراعا اۋەس بولدىم. وسى الەممەن تانىستىرعانىڭىزعا راحمەت"، - دەدى ول.

Yenlik

ەڭلىك قۇراقبەك، ياعني Yenlik، YouTube-تاعى ەڭ تانىمال مۋزىكالىق پلاتفورمالاردىڭ ءبىرى – Colors حالىقارالىق جوباسىنا شاقىرىلعان العاشقى قازاقستاندىق ءارتىس بولدى.

بۇعان دەيىن بۇل پلاتفورمادا Billie Eilish، Drake، Doja Cat، Tyla جانە ونداعان الەمدىك ارتىستەر ونەر كورسەتكەن.

ءانشىنىڭ ايتۋىنشا، جوباعا قاتىسۋ ونىڭ كوپتەن بەرگى ارمانى بولعان.

"شاقىرۋ كەلگەندە، مەن وتە قۋانىپ، جىلاپ جىبەردىم"، - دەدى Yenlik.

ءارتىس ءوزىنىڭ شىعارماشىلىعىنا دەگەن قىزىعۋشىلىقتى قازاق تىلىندە ءان ايتۋىمەن جانە وزىندىك دىبىستالۋىمەن بايلانىستىرادى.

Yenlikء-تىڭ اندەرى ۇنەمى TikTok-تا تانىمال بولىپ جاتادى. وتكەن جىلى شىققان BIPL البومىنداعى «Meili» جانە «16 Qyz» اندەرى جەلى قولدانۋشىلارى اراسىندا ترەندكە اينالدى.

Sadraddin

سادراددين بولات – سوڭعى جىلدارداعى ەڭ كوپ تالقىلاناتىن جاس ورىنداۋشىلاردىڭ ءبىرى. ول مىڭداعان كورەرمەندى جيناپ، تۇركيا مەن ءازىربايجاندا تانىمالدىلىققا يە بولدى.

مۋزىكانت جانرلار مەن تىلدەردى بەلسەندى تۇردە زەرتتەيدى: قازاق جانە تۇرىك تىلدەرىندە ورىنداعان "Melodrama" ءانى YouTube-تا 91 ميلليوننان استام قارالىم جينادى. "Telefon" جانە "انا" سياقتى باسقا دا اندەرى تانىمالدىلىققا يە.

Ninety One

Ninety One توبى قازاقستاننان تىس جەرلەردە الدەقاشان تانىمال. ولاردىڭ شىعارماشىلىعى بۇكىل الەمدە مىڭداعان تىڭدارمانداردى شابىتتاندىرادى، ال كەيبىر شەتەلدىكتەر ءۇشىن توپتىڭ اندەرى قازاق ءتىلىن ۇيرەنۋگە كومەكتەسەدى.

تارازدا اعىلشىن تىلىنەن ساباق بەرگەن امەريكالىق ەۆان اللەن، Ninety One توبىنىڭ ارقاسىندا قازاق ءتىلىن ۇيرەنە باستاعانىن مويىندادى.

"مەن ولاردىڭ اندەرىن تىڭداپ، ءار ءسوزدى، ينتوناسيانى قايتالادىم"، - دەدى ول.

ەۆاننىڭ ايتۋىنشا، ورىس ءتىلىن بىلمەگەندىكتەن، ءتىلدى ۇيرەنۋگە ارنالعان ماتەريالداردى تابۋ وعان وڭاي بولماعان. سوندىقتان Ninety One اندەرى ونىڭ وقۋ قۇرالىنا اينالعان. ءقازىر امەريكالىق جىگىت توپتىڭ اندەرىنىڭ ماتىندەرىن تولىق بىلەدى.

بۇل ارتىستەردىڭ تاريحى قازاق ءتىلىنىڭ ەلىمىزدەن تىس جەرلەردە جيىرەك ەستىلىپ، ءارتۇرلى مادەنيەت وكىلدەرىنىڭ قىزىعۋشىلىعىن تۋدىرىپ جاتقانىن كورسەتەدى.

كەيبىرەۋلەر ءان سوزدەرىن جاتتايدى، كەيبىرەۋلەر العاش رەت دومبىرا ۇستايدى، ال كەيبىرەۋلەر سۇيىكتى ءارتىسى ءۇشىن قازاقستانعا بيلەت ساتىپ الادى. مىنە، بۇگىنگى قازاقستاندىق جاڭا ساحنانىڭ كۇشى وسىندا – ول مىڭداعان ادامداردىڭ جۇرەگىنە تۇسىنىكتى بولىپ قالا بەرەدى.

بۇل ارتىستەردىڭ اندەرىن "جۇلدىز FM" ەفيرىنەن تىڭداي الاسىزدار – "سۇيىكتى اندەر. تاڭداۋلى مۋزىكا".