قازاقتىڭ قانداي ەدى ءماعيشاتى،
ءبىر كۇندە كوشىپ قونعان راحاتى.
قايعى جوق، حاسىرەت جوق، قىز-بوزبالا،
تۇزەگەن باسەكەمەن سالتاناتى.
كەتۋشى ەد كوشباسشىلار ىلگەرى وزىپ،
جاراسىپ ءوز فورىمىنشا ساياساتى.
جارىسىپ جاس بالالار ءجۇرۋشى ەدى
جاراتقان ۇكى تاعىپ جۇيرىك اتى.
جايلاۋعا شىعا ايعىر سۋىتۋشى ەدى،
ىستىقتىڭ قالمايدى دەپ زاراراتى.
ءتىزىلىپ كول جاعالاي قونۋشى ەدى،
جاراسىپ اق ۇيلەردىڭ قيافاتى.
كوكوراي شالعىندارعا بيە بايلاپ،
بايلىقتىڭ كورىنۋشى ەدى عالاماتى
جان-جانۋار راحاتپەن ءبىر جاساۋشى ەد،
كىرگەندەي بولمەسىنە جەر ءجانناتى.
ىشكەن ماس، جەگەن توق بوپ ءجۇرۋشى ەدى،
تۇزەلىپ بوزبالالىق ساياحاتى.
بۇلدىرگەن، شيە تەرە كەتۋشى ەدى،
قىز-كەلىنشەك مىرزالاردىڭ جاماعاتى.
كەڭەيىپ جۇرتتىڭ فيعىلى ول ۋاقىتتا
ناشارعا ءتيۋشى ەدى شارافاتى.
ۇل تۋىپ، كەلىن تۇسسە، قىز ۇزاتىپ،
توي بولىپ ات شابۋشى ەد ءبىر ءعاداتى.
بەك عاجاپ مارقۇمدارعا اس بەرۋشى ەد،
فاش بولسا حالىق ىشىندە ينافاتى.
باۋىزداتىپ باعلاندى، قۇلىن سويىپ،
ىشسە قىمىز، كەلۋشى ەدى ءسوزدىڭ شارتى.
قانىكەي، وسى ايتقاننىڭ ءبىرى بار ما،
ايتىلسا ءسوزدىڭ كامىل حاقيقاتى.
بۇل كۇندە بۇلاردى ويلاپ قايعى دا ءجۇر،
بار بولعان دانىشپاندار فاراساتى.
وقىعان پايدا بەرەر جاستارىمىز،
ءھار ىستەن بولسا ماگەر ماعلۇماتى.
* * *
ۇيرەنگەن حالىقپىز عوي كەمشىلىككە،
تالپىنىپ ۇمتىلمايتىن كەڭشىلىككە.
وسىنداي بىلىنگەن سوڭ مىنەزىمىز
كىم دە كىم ءبىزدىڭ جۇرتتى ەلسىنىپ پە؟
رۋسسيادا جيىرما ميلليون بار مۇسىلمان
جەرى جوق وسىلاردىڭ ءبىر قوسىلعان.
ماسەلەن ءبىزدىن قازاق بۇل ۋاقىتتا
تىسقارى رۋحاني يدارادان.
بولا الماي تىلەك قابىل حافالىقتا.
كورۋدە جابىرشىلىك ءجۇرمىز ھامان.
قازاعىم كورمەگەنىڭ ءالى الدىڭدا،
بولارسىڭ كونە بەرسەڭ مۇنان جامان.
بوسىندا اياق-قولىڭ قيمىلداپ قال.
ءبىر كۇندە تىپىرلاۋعا كەلمەس شاماڭ.

---