InfoHub Logo

استانادا ەنەرگەتيكا ءمينيسترى ەرلان اقكەنجەنوۆتىڭ توراعالىعىمەن قاراشىعاناق گاز وڭدەۋ زاۋىتىنىڭ قۇرىلىسى بويىنشا كەڭەس ءوتتى. جيىنعا «سامۇرىق-قازىنا»، «قازمۇنايگاز» ۇلتتىق كومپانيالارىنىڭ، «قمگ قاراشىعاناق» ج ش س وكىلدەرى مەن جوبا اكسيونەرلەرى قاتىستى.

بۇل تۋرالى Infohub.kz اقپارات اگەنتتىگى حابارلايدى.

جوبانىڭ ماڭىزدىلىعى

ەنەرگەتيكا مينيسترلىگى قاراشىعاناق گاز وڭدەۋ زاۋىتىنىڭ جىلىنا 5 ميلليارد تەكشە مەتر گاز وڭدەۋ قۋاتتىلىعىمەن سالىنۋى – مەملەكەت باسشىسىنىڭ تىكەلەي تاپسىرماسى ءارى گاز سالاسىن 2029 جىلعا دەيىن دامىتۋدىڭ كەشەندى جوسپارىنىڭ نەگىزگى بولىگى ەكەنىن اتاپ ءوتتى. زاۋىتتىڭ باستى ماقساتى – ىشكى نارىقتىڭ ءوسىپ كەلە جاتقان قاجەتتىلىگىن تاۋارلىق گازبەن قامتاماسىز ەتۋ جانە بۇرىن رەسەيدىڭ ورىنبور گاز وڭدەۋ زاۋىتىنا بايلانعان قايتا وڭدەۋ قۋاتتىلىقتارىن ءارتاراپتاندىرۋ ارقىلى يمپورتقا تاۋەلدىلىكتى ازايتۋ.

جوبانىڭ دامۋ كەزەڭدەرى

مينيسترلىك مالىمەتىنشە، جوبانىڭ ەكونوميكالىق تيىمدىلىگى راستالعان. سونداي-اق، قىتايلىق «CITIC Construction» كورپوراسياسىمەن ىنتىماقتاستىق نەگىزدەرى تۋرالى كەلىسىمگە قول قويىلدى. قازىرگى ۋاقىتتا بازالىق جوبالاۋ كەزەڭى – FEED-كە دايىندىق جۇمىستارى جۇرگىزىلۋدە. بۇعان قوسا، جەر ۋچاسكەسى، ينفراقۇرىلىم جانە شيكىزاتپەن قامتاماسىز ەتۋ ماسەلەلەرى پىسىقتالۋدا.

«QazaqGaz» – ءبىرىڭعاي وپەراتور

ستراتەگيالىق ماڭىزدى جوبانىڭ ءبىرىڭعاي وپەراتورى بولىپ «QazaqGaz» ۇلتتىق كومپانياسى بەلگىلەندى. بۇل شەشىم جوبانى ىسكە اسىرۋعا كىرىسۋدى جەدەلدەتەدى دەپ كۇتىلۋدە.

شەتەلدىك اكسيونەرلەرمەن كەلىسسوزدەر

كەڭەستە قاراشىعاناق جوباسىنىڭ شەتەلدىك اكسيونەرلەرىمەن جۇرگىزىلگەن كەلىسسوزدەرگە دە ەرەكشە نازار اۋدارىلدى. تالقىلاۋدا شيكى گازدى كەپىلدەندىرىپ جەتكىزۋ، باعا بەلگىلەۋدى كەلىسۋ جانە بولاشاق زاۋىتتى كەن ورنىنىڭ قولدانىستاعى ينفراقۇرىلىمىمەن ينتەگراسيالاۋ ماسەلەلەرى قوزعالدى. ەنەرگەتيكا ءمينيسترى ەرلان اقكەنجەنوۆ كەلىسسوزدەردىڭ كەشىگۋى قۇرىلىستىڭ بەلسەندى كەزەڭىنە وتۋگە كەدەرگى كەلتىرىپ وتىرعانىن ايتتى. ول: «بۇل زاۋىت قازاقستان ءۇشىن وتە ماڭىزدى، جوبانىڭ باستالۋ مەرزىمىن شەكسىز كەيىنگە قالدىرۋعا بولمايدى. مەملەكەتكە ناتيجە كەرەك»، – دەپ اتاپ ءوتتى.

كەڭەس قورىتىندىسى بويىنشا، جوبانى ىسكە اسىرۋ ەرەكشە باقىلاۋعا الىندى.