InfoHub Logo

مەتالل ءوندىرۋشى «قازاقمىس» كورپوراسياسى Aidarly Project كومپانياسىنداعى ۇلەسىنەن باس تارتتى. بۇعان دەيىن بۇل كومپانيانى ميلليونەر نۇرلان ارتىقبايەۆ باسقارعان بولاتىن. ەندى Aidarly Project اكسيالارىنىڭ ءبىر بولىگىن ۆلاديمير كيم مەن ەدۋارد وگايدىڭ Qaz Copper Group كومپانياسى يەلەنەدى.

بۇل تۋرالى Infohub.kz اقپارات اگەنتتىگى حابارلايدى.

اكسيونەرلىك قۇرامداعى وزگەرىس 18 اقپاندا تىركەلدى. Qaz Copper Group-پەن قاتار، Aidarly Project كومپانياسىنىڭ ءىرى اكسيونەرى رەتىندە نيدەرلاندىدا تىركەلگەن Aidarly B.V. قالا بەردى.

Qaz Copper Group كىمگە تيەسىلى؟

Qaz Copper Group – بۇل Kazakhmys Copper كومپانياسىنىڭ ەنشىلەس ۇيىمى. ايتا كەتەيىك، بۇعان دەيىن كيم مەن وگاي «قازاقمىس» كورپوراسياسىن ءدال وسى Kazakhmys Copper ارقىلى يەلەنگەن بولاتىن.

وتكەن جەلتوقساندا Kazakhmys Copper كومپانياسىنىڭ مەنشىك يەلەرى اۋىسقان ەدى. نيدەرلاندىدا تىركەلگەن K.C.C. B.V. كومپانياسىنىڭ ورنىنا مفسا-دا تىركەلگەن KCC Copper Limited كەلدى. ال بۇل كومپانيانى ءقازىر كيم مەن وگاي يەلەنەتىن Kazakhmys Holding Limited حولدينگى باقىلايدى.

Aidarly Projectء-تىڭ جاعدايى

2025 جىلدىڭ قاراشا ايىندا «قازاقمىس» كومپانياسى ءوزىنىڭ اكتيۆتەرىنىڭ ءبىر بولىگىن جاڭا زاڭدى تۇلعا – Qaz Copper Group-قا بولگەنىن حابارلاعان بولاتىن. بۇل كومپانياعا نەگىزگى تابىس اكەلمەيتىن، ياعني وندىرۋمەن تىكەلەي بايلانىستى ەمەس اكتيۆتەر بەرىلدى. سونداي-اق، كومپانيا قاراعاندى وبلىسىنداعى سوقىرقوي كەن ورنىندا مىس پەن پوليمەتالل وندىرۋگە ارنالعان كەلىسىمشارت بويىنشا جەر قويناۋىن پايدالانۋ قۇقىعىن الدى.

2024 جىلى Aidarly Project كومپانياسى 5،4 ملرد تەڭگە شىعىنعا ۇشىرادى. ال 2023 جىلى بۇل كورسەتكىش 4،3 ملرد تەڭگە بولدى. 2024 جىلدىڭ سوڭىنداعى Aidarly Projectء-تىڭ جابىلماي قالعان شىعىنى 9 ملرد تەڭگەگە جەتتى (2023 جىلدىڭ سوڭىندا بۇل كورسەتكىش 3،6 ملرد تەڭگە بولعان). كومپانيانىڭ جارعىلىق كاپيتالى 2،9 ملرد تەڭگە بولعانىن ەسكەرسەك، ونىڭ كاپيتالى تەرىس 6،1 ملرد تەڭگەگە تەڭ بولدى.

Aidarly Projectء-تىڭ شىعىنعا ۇشىراۋىنا نەگىزگى سەبەپ – اباي وبلىسىنداعى ايدارلى كەن ورنىندا گەولوگيالىق بارلاۋ جۇمىستارىن جۇرگىزىپ، كەيىن مىس كەنتابىن وندىرۋمەن اينالىسۋى. كومپانيانىڭ مىس كەنتابىن بارلاۋ جانە ءوندىرۋ تۋرالى كەلىسىمشارتى بار.

ەستەرىڭىزگە سالا كەتەيىك، 2025 جىلدىڭ سوڭىندا ۆلاديمير كيم مەن ەدۋارد وگاي «قازاقمىس» كومپانياسىن «Qazaq Stroy» قۇرىلىس كومپانياسىنىڭ يەسى نۇرلان ارتىقبايەۆقا ساتقانى بەلگىلى بولدى. مامىلە قۇنى اشىق جاريالانبادى. Bloomberg اگەنتتىگىنىڭ مالىمەتىنشە، بيزنەسمەنگە 1،2 ملرد دوللار كولەمىندەگى قارجىنى شۆەيساريالىق ساۋداگەر Mercuria Energy Group ۇسىنعان.