InfoHub Logo

ەلىمىزدەگى مەديسينالىق جوو-لار ءۇشىن الەمنىڭ ۇزدىك 500 جوو قاتارىنا كىرەتىن اقش، يتاليا، شۆەسيا، پولشا ۋنيۆەرسيتەتتەرىن ستراتەگيالىق ارىپتەستەر رەتىندە شاقىرادى. 16-17 قاڭتاردا پاريجدە وتكەن جوعارعى دەڭگەيدەگى ساياسي فورۋم مەن ەكونوميكالىق ىنتىماقتاستىق جانە دامۋ ۇيىمى دەنساۋلىق ساقتاۋ سالاسى بويىنشا كوميتەتىنىڭ وتىرىسىنا قاتىسقان ق ر دەنساۋلىق ساقتاۋ جانە الەۋمەتتىك دامۋ ۆيسە-مينيسترى الەكسەي سوي وسىلاي ءمالىم ەتتى.

جوعارىدا اتالعان فورۋمعا 300-دەن استام ادام قاتىستى. ولاردىڭ قاتارىندا ەىدۇ قاتىسۋشى ەلدەرى مەن دامۋشى ەلدەردىڭ دەنساۋلىق ساقتاۋ مينيسترلەرى مەن جوعارعى دەڭگەيلى وكىلدەرى، بەلگىلى اكادەميكتەر مەن ساۋدا وداقتارىنىڭ وكىلدەرى بولدى، دەپ حابارلايدى ءدسادم باسپا ءسوز قىزمەتى.

الەكسەي سوي ەىدۇ دەنساۋلىق ساقتاۋ سالاسى بويىنشا كوميتەتى وتىرىسىنىڭ اياسىندا وتكەن سەسسيادا «دەنساۋلىق ساقتاۋ سالاسىنداعى مامانداردىڭ ءرولىن رەفورمالاۋ» اتتى بايانداماسىندا قازىرگى تاڭدا دەنساۋلىق ساقتاۋ جۇيەسىندە ارنايى ەڭبەك نارىعىن قۇرۋعا، ونىڭ ىشىندە كادرلىق رەسۋرستاردى تولتىرۋدىڭ  ساپالى بولجامىن جاساۋعا، ورتا جانە جوعارعى مەديسينالىق ءبىلىمى بار مامانداردى دايارلاۋ ماسەلەلەرىن قايتا قاراستىرۋعا، كاسىبي ءبىلىمنىڭ ساپاسىنا قويىلاتىن تالاپتى ارتتىرۋ قاجەتتىلىگى بار ەكەنىن اتاپ ايتتى.

«ەڭبەك نارىعى مەن ادام رەسۋرستارىن دامىتۋ بولجامى مەن باقىلاۋىن ءتيىمدى جۇرگىزۋ، قازاقستاندا دەنساۋلىق ساقتاۋ سالاسىنداعى كادرلاردى دايارلاۋدى جوسپارلاۋ مەن باسقارۋدىڭ زاماناۋي تاسىلدەرىن ەنگىزۋ ماقساتىندا دەنساۋلىق ساقتاۋ سالاسى كادرلىق رەسۋرتارىن جوسپارلاۋ مەن بولجاۋدىڭ ءتيىمدى ادىستەرىن ەنگىزۋ مەن ونى ازىرلەۋمەن اينالىساتىن كادرلىق رەسۋرستار وبسەرۆاتورياسى قۇرىلدى»، - دەپ حابارلادى الەكسەي سوي.  

سونىمەن بىرگە، ۆيسە-مينيستر دەنساۋلىق ساقتاۋ سالاسى كادرلىق الەۋەتىن جەتىلدىرۋگە س.د. اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتىندە اشىلعان دۇنيەجۇزىلىك دەنساۋلىق ساقتاۋ ۇيىمىنىڭ العاشقى مەديسينالىق-سانيتارلىق كومەك بويىنشا (ءارى قاراي - مساك) گەوگرافيالىق شالعايداعى كەڭسەسى دە ىقپال ەتەتىنىن اتاپ ايتتى.

 «ددسۇ مساك بويىنشا گەوگرافيالىق شالعايداعى كەڭسەسى 53 ددسۇ قاتىسۋشى-مەملەكەتتەردى ۇيلەستىرەتىن ەۋروپالىق ايماق پەن ورتالىق ازياداعى بۇۇ-نىڭ العاشقى ءىرى كەڭسەسى بولىپ تابىلادى. ونىڭ اشىلۋى جەرگىلىكتى كادرلاردى، سونىمەن قاتار، ددسۇ  بارلىق ەۋروپالىق ايماق ماماندارىن وقىتۋعا، حالىقارالىق ساناتتاعى ساراپشىلاردى شاقىرا وتىرىپ مساك كادرلارىن قايتا دايارلاۋ مەن دايىنداۋدى جاقسارتۋعا مۇمكىندىك بەرەتىن بولادى»، - دەدى ول.

سونىمەن بىرگە، دەنساۋلىق ساقتاۋ جۇيەسى كادرلىق الەۋەتىن ءتيىمدى پايدالانۋ مەن ونى باقىلاۋ ماقساتىندا بارشا كاسىبي بەلسەندى مامانداردى قامتيتىن دەنساۋلىق ساقتاۋ سالاسى كادرلىق رەسۋرستارىنىڭ كاسىبي رەگيسترى قۇرىلۋدا. حالىقتىڭ سۇرانىسىنا ساي جوعارعى ساپالى، قولجەتىمدى قىزمەتتەردى كورسەتە الماۋ ءقاۋپىن تومەندەتۋگە، كادرلىق رەسۋرستاردى باسقارۋ تيىمدىلىگىن ارتتىرۋعا نەگىزدەلگەن دەنساۋلىق ساقتاۋ سالاسى كادرلىق رەسۋرستارىن باسقارۋدىڭ ۇلتتىق كورپوراتيۆتىك ساياساتى ازىرلەندى.

«جاڭا شارتتار كادرلاردى دايارلاۋ جۇيەسىن جەتىلدىرۋدى تالاپ ەتەدى. سوندىقتان، قازاقستان ەلىمىزدەگى مەديسينالىق جوو ءۇشىن الەمنىڭ ۇزدىك 500 جوو قاتارىنا كىرەتىن اقش، يتاليا، شۆەسيا، پولشا ۋنيۆەرسيتەتتەرىن ستراتەگيالىق ارىپتەستەر رەتىندە شاقىرادى»، - دەپ مالىمدەدى الەكسەي سوي.

ۆيسە-مينيستر شەتەلدىك ارىپتەستەرىنە قازاقستاندا نەگىزگى  الەۋمەتتىك ءمانى بار، ەلدىڭ دەموگرافيالىق احۋالىنا ايتارلىقتاي اسەرى بار 5 نەگىزگى نوزولوگيا (ميوكاردتىڭ ءجىتى ينفاركتى، ميداعى قان اينالىمىنىڭ اۋىر اۋىتقۋلارى (ينسۋلت)، قاتەرلى ىسىك اۋرۋلارى، سىنىقتار، جۇكتىلىك جانە بوساندىرۋ) بويىنشا مەديسينالىق كومەك كورسەتۋدىڭ  بىرىكتىرىلگەن ۇلگىسى كەزەڭ كەزەڭىمەن ەنگىزىلىپ جاتقانىن حابارلادى.

ەلەكتروندىق دەنساۋلىق ساقتاۋ جۇيەسىنىڭ حالىقارالىق جانە قازاقستاندىق ءبىرقاتار ستاندارتتارىنىڭ نەگىزىندە دەنساۋلىق ساقتاۋ سالاسىن اقپاراتتاندىرۋ مەن  ينتەروپەرابەلدىك پلاتفورماسى ەنگىزىلمەك. ول رەسپۋبليكانىڭ بارشا ازاماتتارىنىڭ ەلەكتروندى دەنساۋلىق پاسپورتىن، دەنساۋلىق ساقتاۋ سالاسى قىزمەتكەرى مەن پاسيەنتتىڭ جەكە كابينەتىن، دەنساۋلىق ساقتاۋ سالاسى بىرەگەي مالىمەتتەر قورىن ەنگىزۋگە مۇمكىندىك بەرەدى.

---