InfoHub Logo

قازاقستان ەكونوميكاسى قارقىندى ءوسىپ كەلەدى، ءبىراق بۇل ءوسىمنىڭ ارتى قىزىپ كەتۋگە اكەلۋى مۇمكىن. بۇل تۋرالى حالىقارالىق ۆاليۋتا قورىنىڭ (مۆف) ساراپشىلارى مالىمدەدى. ولار 2025 جىلدىڭ قاراشا ايىندا قازاقستانعا ساپار شەگىپ، زەرتتەۋ جۇرگىزگەن بولاتىن.

بۇل تۋرالى Infohub.kz اقپارات اگەنتتىگى حابارلايدى.

ەكونوميكانىڭ جاساندى ءوسۋى

مۆف ەسەبىندە قازاقستان ەكونوميكاسىنىڭ 2025 جىلى جوعارى قارقىنمەن ءوسۋى كەزىندە قىزىپ كەتكەنى ايتىلدى. بۇل جاعدايعا كۆازيمەملەكەتتىك سەكتور ارقىلى نەگىزگى سالالارعا قارجى قۇيۋ اسەر ەتتى.

— ىشكى سۇرانىستىڭ تۇراقتى كەڭەيۋى، مۇناي ءوندىرۋ كولەمىنىڭ ارتۋى، مۇنايعا قاتىسى جوق سالالارداعى بەلسەندىلىك جانە ءىرى ينفراقۇرىلىمدىق جوبالاردىڭ جۇزەگە اسىرىلۋى فيسكالدىق ساياساتتىڭ ىنتالاندىرۋشى جاعدايىندا جانە مەملەكەتتىك كاسىپورىنداردىڭ ينۆەستيسيالارىنىڭ ارتۋى ارقىلى قولداۋ تاپتى، — دەلىنگەن ەسەپتە.

ەكونوميكانى سالقىنداتۋ قاجەت

مۆف ساراپشىلارى قازاقستاننىڭ فيسكالدىق جانە سىرتقى رەزەرۆتەرىنىڭ جەتكىلىكتى ەكەنىن، ال بانك سەكتورىنىڭ تۇراقتى ەكەنىن اتاپ ءوتتى. ولار ۇلتتىق بانكتىڭ اقشا-نەسيە ساياساتىن قاتاڭداتۋىن، ونىڭ ىشىندە بازالىق مولشەرلەمەنى كوتەرۋىن قۇپتادى جانە ينفلياسيامەن كۇرەسۋ ءۇشىن قابىلدانعان شارالاردى ساقتاۋدى ۇسىندى. سونىمەن قاتار، قىسقا مەرزىمدى نوتالاردى شىعارۋ ارقىلى وتىمدىلىكتى باسقارۋدىڭ تيىمدىلىگىن ارتتىرۋ قاجەت ەكەنىن ايتتى.

— مۆف ماكروەكونوميكالىق ساياساتتى ۇيلەستىرۋدى كۇشەيتۋ، كۆازيمەملەكەتتىك وپەراسيالاردى شەكتەۋ، بيۋدجەت ەرەجەلەرىن قاتاڭ ساقتاۋ جانە بيۋدجەتتىڭ ۇلتتىق قوردان ترانسفەرتتەرگە تاۋەلدىلىگىن ازايتۋ قاجەتتىگىن اتاپ ءوتتى. ەكونوميكانى ءارتاراپتاندىرۋعا جانە ءوسۋ قارقىنىن ارتتىرۋعا باعىتتالعان قۇرىلىمدىق رەفورمالاردى تەزدەتۋ ۇسىنىلادى، — دەدى ۇلتتىق بانك وكىلدەرى.

ساراپشىلار مەملەكەت ءرولىن ازايتىپ، جەكە سەكتوردى دامىتۋ، ىسكەرلىك كليماتتى جاقسارتۋ جانە قارجىلىق تۇراقتىلىقتى نىعايتۋ قاجەتتىگىن ايتتى. سونىمەن قاتار، مۇنايدىڭ الەمدىك باعاسىنىڭ قۇلدىراۋى جانە نەگىزگى ساۋدا سەرىكتەستەرىندەگى ەكونوميكالىق قيىندىقتار سياقتى تاۋەكەلدەرگە نازار اۋدارۋ كەرەك.

مۆف قازاقستان ەكونوميكاسىنىڭ ءوسۋ قارقىنى الداعى جىلدارى 3،5%-عا دەيىن باياۋلايدى دەپ كۇتۋدە.

ۇلتتىق بانكتىڭ جوسپارلارى

قازاقستان ۇلتتىق بانكى 2026 جىلدىڭ ءبىرىنشى جارتىسىندا قاتاڭ اقشا-نەسيە ساياساتىن ساقتاۋدى جوسپارلاپ وتىر. رەتتەۋشى باسشىسى تيمۋر سۇلەيمەنوۆ ينفلياسيانىڭ بىرنەشە اي بويى تۇراقتى تۇردە 10%-عا دەيىن تومەندەۋى جاعدايىندا عانا بازالىق مولشەرلەمەنى تومەندەتۋگە بولاتىنىن ايتتى.