InfoHub Logo

قازاقستان مەكتەپتەرىندە ءبىلىم بەرۋ سالاسىنا جاساندى ينتەللەكتتى (جي) ەنگىزۋ تۋرالى ماڭىزدى قادام جاسالدى. مەملەكەت باسشىسى قاسىم-جومارت توقايەۆ «ورتا ءبىلىم بەرۋ جۇيەسىنە جاساندى ينتەللەكتتى ەنگىزۋ شارالارى تۋرالى» جارلىققا قول قويدى. بۇل جاڭالىق ءبىلىم بەرۋدىڭ بولاشاعىنا ەلەۋلى اسەر ەتەدى دەپ كۇتىلۋدە.

بۇل تۋرالى Infohub.kz اقپارات اگەنتتىگى حابارلايدى.

جارلىقتىڭ نەگىزگى ماقساتى

جارلىقتىڭ باستى مىندەتى – جاساندى ينتەللەكتتىڭ قارقىندى دامۋى جاعدايىندا قازاقستان رەسپۋبليكاسىنىڭ تۇراقتى دامۋىن قامتاماسىز ەتۋ. سونداي-اق، ادامي كاپيتالدىڭ نەگىزگى ەلەمەنتى رەتىندە زاماناۋي، يننوۆاسيالىق ءبىلىم بەرۋ جۇيەسىن قالىپتاستىرۋعا جاعداي جاساۋ كوزدەلگەن.

جاساندى ينتەللەكتتى ەنگىزۋ جوسپارى

جارلىققا سايكەس، 2026 جىلدىڭ 1 شىلدەسىنە دەيىن ۇكىمەت 2026-2029 جىلدارعا ارنالعان ورتا ءبىلىم بەرۋ جۇيەسىنە جاساندى ينتەللەكتتى كەڭىنەن ەنگىزۋگە باعىتتالعان كەشەندى ءىس-شارالار جوسپارىن بەكىتەدى. بۇل جوسپارعا جەكە تۇلعاعا باعىتتالعان وقىتۋ تەتىگىن قۇرۋ، سيفرلىق ينفراقۇرىلىمدى دامىتۋ، پەداگوگ كادرلاردى دايارلاۋ جانە وقۋشىلاردىڭ دەربەس دەرەكتەرىن قورعاۋ سياقتى ماڭىزدى باعىتتار كىرەدى.

پيلوتتىق جوبا جانە تەحنيكالىق جاراقتاندىرۋ

جارلىقتا جاساندى ينتەللەكتتى دامىتۋ كەڭەسىنىڭ مۇشەسى لي كاي-فۋدىڭ ۇسىنىستارىن پراكتيكادا قولدانۋ قاراستىرىلعان. سونداي-اق، ۇكىمەت 2026 جىلدىڭ 1 ماۋسىمىنا دەيىن ورتا ءبىلىم بەرۋ سالاسىندا پيلوتتىق جوبانى ىسكە اسىرۋ بويىنشا ناقتى ۇسىنىستار ەنگىزەدى. بۇل جاڭالىقتار قالا مەن اۋىل مەكتەپتەرى اراسىنداعى ءبىلىم ساپاسىنىڭ الشاقتىعىن قىسقارتۋعا باعىتتالعان. پيلوتتىق جوبا اياسىندا 2026 جىلدىڭ 1 تامىزىنا دەيىن مەكتەپتەردى، سونىڭ ىشىندە تۇراقتى جوعارى جىلدامدىقتى ينتەرنەتتى قامتاماسىز ەتۋ ارقىلى تەحنيكالىق جاراقتاندىرۋ كوزدەلگەن.

ستاندارتتار مەن پەداگوگتەردىڭ ءرولى

2026 جىلدىڭ 1 قىركۇيەگىنە دەيىن ورتا ءبىلىم بەرۋ جۇيەسىندە جاساندى ينتەللەكتتى قولدانۋدىڭ ستاندارتتارى بەكىتىلەدى. بۇل كەزەڭدە پەداگوگتەردىڭ كاسىبي بىلىكتىلىگىن ۇزدىكسىز ارتتىرۋدى جانە جاساندى ينتەللەكت تەحنولوگيالارىن ءبىلىم بەرۋ پروسەسىندە ءتيىمدى قۇرال رەتىندە پايدالانۋدى قامتاماسىز ەتەتىن شارالار جوسپارى قابىلدانادى. بۇل رەتتە، پەداگوگتەردىڭ كاسىبي قىزمەتىن الماستىرۋ نەمەسە ولارعا زيان كەلتىرۋ كوزدەلمەيدى.

ۇكىمەتكە ورتا ءبىلىم بەرۋ ۇيىمدارىندا دەربەس دەرەكتەردى قورعاۋدى كۇشەيتۋ جانە ءبىلىم بەرۋ مازمۇنىنىڭ مەملەكەتتىك مىندەتتى جالپى ءبىلىم بەرۋ ستاندارتىنىڭ تالاپتارىنا سايكەستىگىن قامتاماسىز ەتۋ بويىنشا شارالار قابىلداۋ تاپسىرىلدى.