InfoHub Logo

قازاقستان مەن ۋكراينانىڭ ىشكى ىستەر مينيسترلىكتەرى بىرلەسىپ، اۋقىمدى وپەراسيا جۇرگىزىپ، ازاماتتاردى الداپ كەلگەن الاياقتار كولل-ورتالىعىنىڭ جەلىسىن جويدى. بۇل تۋرالى Polisia.kz سايتىنا سىلتەمە جاساپ، Tengrinews.kz حابارلادى.

بۇل وپەراسيا ناتيجەسىندە قازاقستان مەن ۋكراينانىڭ باس پروكۋراتۋرالارىمەن بىرلەسە وتىرىپ، ۋكراينا اۋماعىندا الاياقتىق كولل-ورتالىقتارىن باسقارعان ترانسۇلتتىق ۇيىمداسقان قىلمىستىق توپ اشكەرەلەندى.

31 ناۋرىزدا دنەپر قالاسىندا قازاقستان، ۋكراينا جانە ەۋروپا وداعى ەلدەرى ازاماتتارىنا جۇيەلى تۇردە ينتەرنەت-الاياقتىق جاساپ كەلگەن ءۇش كولل-ورتالىقتىڭ جۇمىسى توقتاتىلدى. قازاقستان ىشكى ىستەر مينيسترلىگىنىڭ ۋاقتىلى ارەكەتى ارقاسىندا ازاماتتاردىڭ اۋىر زارداپ شەگۋى مەن قارجىلىق شىعىندارىنىڭ الدىن الۋ مۇمكىن بولدى.

قىلمىستىق توپ جۇزدەگەن ادامنىڭ اقشاسى مەن سيفرلىق اكتيۆتەرىن جىمقىرعان. ولار جالعان ينۆەستيسيالىق كومپانيالاردىڭ اتىنان ارەكەت ەتىپ، ادامداردى الداپ، ولاردىڭ قۇپيا دەرەكتەرىنە، جەكە كابينەتتەرى مەن بانك شوتتارىنا قول جەتكىزىپ، اقشالارىن يەمدەنگەن. سونىمەن قاتار، كريپتوۆاليۋتا اكتيۆتەرىنە قاتىستى جالعان ينۆەستيسيالار مەن «رومانتيكالىق سحەمالار» ارقىلى جاسالعان الاياقتىق دەرەكتەرى دە انىقتالدى.

الاياقتاردىڭ ارەكەتى

قىلمىسكەرلەر بەلگىلى ينۆەستيسيالىق پلاتفورمالار مەن كريپتوبيرجالارعا ۇقساس فيشينگتىك ينتەرنەت-رەسۋرستارىن پايدالانعان. بۇل ولارعا جابىرلەنۋشىلەردىڭ اكتيۆتەرىن تولىق باقىلاۋعا الۋعا مۇمكىندىك بەرگەن.

وپەراسيا ناتيجەسى

دنەپر قالاسىندا 40 مەكەنجايدا ءبىر مەزگىلدە ءتىنتۋ جۇرگىزىلدى. ۋكراينانىڭ 53 ازاماتى ۇستالدى، ونىڭ ىشىندە سەگىز نەگىزگى فيگۋرانت ايىپ تاعىلىپ، ۋاقىتشا ۇستاۋ يزولياتورىنا قامالدى. قالعان قاتىسۋشىلار زاڭناماعا سايكەس جاۋاپقا تارتىلادى. الدىن الا مالىمەتتەر بويىنشا، ءتىنتۋ كەزىندە 100 مىڭ دوللار، 90 بىرلىك كومپيۋتەر تەحنيكاسى، 125 سمارتفون، 6 ەليتالىق اۆتوكولىك جانە اتىس قارۋىنا ۇقساس زات تاركىلەندى. تەرگەۋ ءالى جالعاسۋدا.

ۋكراينا ارىپتەستەرىمەن بەلسەندى ءوزارا ءىس-قيمىل ارقاسىندا قىلمىستىق ارەكەتتەردىڭ بارلىق ەپيزودتارىن انىقتاۋعا، قوسىمشا ورتاقتاردى تابۋعا جانە ازاماتتارعا كەلتىرىلگەن جالپى زالالدى انىقتاۋعا باعىتتالعان تەرگەۋ جانە جەدەل-ىزدەستىرۋ شارالارى جۇرگىزىلۋدە.

قازاقستان رەسپۋبليكاسى ىشكى ىستەر مينيسترلىگى حالىقارالىق كيبەرقىلمىسپەن كۇرەسۋدەگى تاباندىلىعىن اتاپ ءوتتى. ازاماتتاردىڭ سەنىمىنە كىرىپ، اقشا تابۋعا تىرىسقان كەز كەلگەن قىلمىسكەر ارەكەتتەرى ۋاقتىلى انىقتالىپ، قاتاڭ تۇردە جويىلاتىن بولادى.