InfoHub Logo

قازاقستان پرەزيدەنتى قاسىم-جومارت توقايەۆ پارلامەنتكە سايلاۋ بولاتىنىن مالىمدەدى. بۇل تۋرالى اقورداعا سىلتەمە جاساپ، Tengrinews.kz حابارلادى.

مەملەكەت باسشىسى جاڭا كونستيتۋسيانىڭ جاستارعا باعىتتالعانىن اتاپ ءوتتى. ونىڭ ايتۋىنشا، نەگىزگى زاڭعا ەرىكتىلىك قىزمەتى، عىلىم، يننوۆاسيا جانە جاساندى ينتەللەكت سياقتى ماڭىزدى ۇعىمدار ەنگىزىلگەن.

«جاستار پارلامەنتى» قۇرىلادى

«اۋقىمدى ۇگىت-ناسيحات جۇمىستارى جۇرگىزىلدى. الدا اتقارار شارۋامىز كوپ. جاز ايىندا پارلامەنت سايلاۋى وتەدى، ءبىز ونى ءبىر ەل بولىپ، ۇيىمشىلدىقپەن وتكىزۋىمىز كەرەك. مەن بۇل پارلامەنتتىڭ جاستاردىكى بولۋى ءتيىس دەپ ەسەپتەيمىن»، - دەدى قاسىم-جومارت توقايەۆ رەفەرەندۋمعا بەلسەندى قاتىسقان جاستارمەن كەزدەسۋدە.

پرەزيدەنت سونداي-اق كونستيتۋسيا كۇنىنىڭ جاڭا كۇنىن اتادى. بۇل كۇن ەل تاريحىندا ماڭگى قالاتىنىن ايتتى.

رەفەرەندۋم ناتيجەلەرى

بۇعان دەيىن قازاقستاندا جاڭا كونستيتۋسيانى قابىلداۋ بويىنشا رەسپۋبليكالىق رەفەرەندۋمنىڭ ەكزيتپول ناتيجەلەرى جاريالانعان بولاتىن. ەۋرازيالىق ينتەگراسيا ينستيتۋتىنىڭ مالىمەتىنشە، جاڭا كونستيتۋسيانى قابىلداۋدى 86،7 پايىز قولداعان. «سوسيس-ا» ينستيتۋتىنىڭ ساۋالناماسى بويىنشا بۇل كورسەتكىش – 87،4 پايىز بولسا، قوعامدىق ساياسات ينستيتۋتىنىڭ ەكزيتپولى جاڭا كونستيتۋسيانى رەسپوندەنتتەردىڭ 88،6 پايىزى قولداعانىن كورسەتتى.

قازاقستاندىقتار رەفەرەندۋمدا قالاي داۋىس بەردى؟

15 ناۋرىزدا قازاقستاندا جاڭا كونستيتۋسيانى قابىلداۋ تۋرالى رەفەرەندۋم ءوتتى. ەلىمىز بويىنشا داۋىس بەرۋ ۋچاسكەلەرى تاڭعى 7:00-دەن كەشكى 20:00-گە دەيىن جۇمىس ىستەدى. داۋىس بەرۋ قۇقىعىنا 18 جاستان اسقان، سايلاۋشىلار تىزىمىنە ەنگىزىلگەن ازاماتتار يە بولدى. تىزىمگە 12 461 796 ادام ەنگىزىلدى.

رەفەرەندۋم كۇنى ەلىمىزدە 10 388 داۋىس بەرۋ ۋچاسكەسى جۇمىس ىستەدى. ودان بولەك، 54 ەلدەگى ديپلوماتيالىق وكىلدىكتەردە 71 ۋچاسكە اشىلدى. 92 ۋچاسكەدە، نەگىزىنەن اسكەري بولىمدەردە، كوميسسيالار جۇمىسىن ەرتە باستادى – 06:00-دە.

تاڭعى 10:00-گە دەيىن 2 393 844 قازاقستاندىق بيۋللەتەن الدى. بۇل سايلاۋ قۇقىعى بار ازاماتتاردىڭ 19،21 پايىزىن قۇرادى. تۇسكى 12:00-گە دەيىن بۇل كورسەتكىش 4 677 595 سايلاۋشىعا نەمەسە 37،54 پايىزعا جەتتى.

تۇسكى 14:00-گە قاراي رەفەرەندۋم ءوتتى دەپ جاريالاندى. داۋىس بەرۋگە 6 471 378 ادام قاتىستى. بۇل كەزدەگى سايلاۋشىلار بەلسەندىلىگى 51،93 پايىزدى قۇرادى.

انىقتاما: زاڭ بويىنشا رەفەرەندۋم، داۋىس بەرۋگە قۇقىعى بار ازاماتتاردىڭ جارتىسىنان كوبى قاتىسسا، وتكەن بولىپ سانالادى.

كەشكى 16:00-گە دەيىن ۋچاسكەلەردە 8 029 286 قازاقستاندىق داۋىس بەرسە، كەشكى 18:00-گە دەيىن سايلاۋشىلاردىڭ 70 پايىزدان استامى، ياعني 8 845 280 ادام ءوز داۋىسىن بەردى. كەشكى 20:00-گە قاراي رەفەرەندۋمعا 9 126 850 ادام قاتىستى. الدىن الا مالىمەت بويىنشا، سايلاۋشىلاردىڭ بەلسەندىلىگى 73،24 پايىزدى قۇرادى.

ناتيجەلەر 21 ناۋرىزعا دەيىن جاريالانادى.

Tengrinews.kz 15 ناۋرىزدا وتكەن جاڭا كونستيتۋسيانى قابىلداۋ بويىنشا رەفەرەندۋمنىڭ بارىسى تۋرالى ونلاين-ترانسلياسيا جۇرگىزدى.

جاڭا كونستيتۋسيا

كونستيتۋسياعا ەنگىزىلگەن تۇزەتۋلەر ەلدىڭ باس زاڭى ءماتىنىنىڭ 84 پايىزىن قامتىدى. نەگىزگى وزگەرىستەر قاتارىندا ۆيسە-پرەزيدەنت لاۋازىمىنىڭ ەنگىزىلۋى، ءبىر پالاتالى پارلامەنت – قۇرىلتايعا كوشۋ جانە قازاقستان حالىق كەڭەسى اتتى جاڭا كونسۋلتاتيۆتىك ورگاننىڭ قۇرىلۋى بار.

سونداي-اق، پرەزيدەنتتىككە كانديداتتارعا قويىلاتىن جاڭا تالاپ ەنگىزىلدى – مەملەكەتتىك قىزمەتتە نەمەسە سايلانبالى لاۋازىمداردا كەمىندە بەس جىل جۇمىس ءوتىلى بولۋى كەرەك. بۇدان بولەك، جوعارى لاۋازىمدى تۇلعالاردى تاعايىنداۋ كەزىندە مەملەكەت باسشىسىنىڭ وكىلەتتىكتەرى كەڭەيتىلدى. پرەزيدەنتتى ءبىر مەرزىمگە عانا سايلاۋ تۋرالى نورما ساقتالدى.

قۇجاتتا سونداي-اق ازاماتتاردىڭ قۇقىقتارى مەن بوستاندىقتارى، تىلدەردىڭ مارتەبەسى، ءدىندى رەتتەۋ، نەكە – ەر مەن ايەلدىڭ وداعى رەتىندە، سونداي-اق جەكە دەرەكتەر مەن جەكە ءومىردى قورعاۋ تۋرالى جاڭا ەرەجەلەر بەكىتىلگەن.