InfoHub Logo

2026 جىلعى حوككەيدەن الەم چەمپيوناتىنىڭ توپ-ديۆيزيونىنداعى توپتىق كەزەڭ اياقتالعاننان كەيىن، قازاقستان ۇلتتىق قۇراماسىنىڭ كەلەسى جىلى كىمدەرمەن وينايتىنى بەلگىلى بولدى.

تۋرنيردەگى 7 كەزدەسۋ قورىتىندىسى بويىنشا ۇلىبريتانيا مەن يتاليا قۇرامالارى بارلىق ويىندارىندا جەڭىلىپ، توپتىق كەزەڭنەن شىعىپ قالدى. ولاردىڭ ورنىنا 2027 جىلعى الەم چەمپيوناتىندا قازاقستان مەن ۋكراينا قۇرامالارى ونەر كورسەتەدى. بۇل كوماندالار 2026 جىلعى ءبىرىنشى ديۆيزيونداعى تۋرنيردە ءبىرىنشى جانە ەكىنشى ورىنداردى يەلەنگەن بولاتىن.

بۇل تۋرالى Infohub.kz اقپارات اگەنتتىگى حابارلايدى.

قازاقستان قۇراماسى الەم حوككەي ەليتاسىنا ورالدى

ەستەرىڭىزگە سالا كەتەيىك، قازاقستان قۇراماسى ءبىرىنشى ديۆيزيونداعى توپتىق كەزەڭدە بارلىق كەزدەسۋلەرىن جەڭىپ، ەليتاعا جولداما العان ەدى. تۋرنيردەگى العاشقى ويىندا ليتۆا قۇراماسىمەن كەزدەسىپ، ەكىنشى كەزەڭگە دەيىن 0:1 ەسەبىمەن ۇتىلىپ تۇرسا دا، كەيىن ويىندى وزگەرتىپ، 4:1 ەسەبىمەن جەڭىسكە جەتكەن بولاتىن. ەكىنشى كەزدەسۋدە قازاقستاندىقتار ودان دا سەنىمدىرەك جەڭىسكە قول جەتكىزدى – جاپونيالىقتار بىردە-بىر شايبا سوعا الماي، جايلاۋوۆتىڭ كومانداسى 6:0 ەسەبىمەن باسىمدىق تانىتتى. ءبىرىنشى ديۆيزيونداعى چەمپيوناتتىڭ ءۇشىنشى كەزدەسۋىندە قازاقستان قۇراماسى پولشا قۇراماسىنان 0:1 ەسەبىمەن ۇتىلىپ تۇرسا دا، ويىندى قايتا بۇرىپ، جەڭىس سەرياسىن جالعاستىردى. ءتورتىنشى جانە بەسىنشى ويىندا ۇلتتىق قۇراما بۋلليتتەر ارقىلى ۋكراينا مەن فرانسيانى جەڭدى.

چم-2027 تۋرنيرىندەگى قازاقستاننىڭ قارسىلاستارى

الداعى چەمپيوناتتا ەلىمىزدىڭ قارسىلاستارى اۆستريا، ۆەنگريا، گەرمانيا، دانيا، كانادا، لاتۆيا، نورۆەگيا، سلوۆاكيا، سلوۆەنيا، اقش، ۋكراينا، فينليانديا، چەحيا، شۆەيساريا جانە شۆەسيا بولادى. 2027 جىلعى الەم چەمپيوناتى 14-30 مامىر ارالىعىندا گەرمانيانىڭ ديۋسسەلدورف قالاسىندا وتەدى.

قازىرگى ۋاقىتتا شۆەيساريانىڭ سيۋريح قالاسىندا ءوتىپ جاتقان ەليتاداعى تۋرنيرگە كەلەتىن بولساق، مەدالدار ءۇشىن شۆەيساريا، فينليانديا، لاتۆيا، اقش، كانادا، نورۆەگيا، چەحيا جانە شۆەسيا قۇرامالارى تالاسادى. قۇرامالار وليمپيادالىق جۇيە بويىنشا الەم چەمپيوناتىنىڭ مەدالدارىن ساراپقا سالادى: 28 مامىردا – شيرەك فينال، 30 مامىردا – جارتىلاي فينال، 31 مامىردا – فينال جانە ءۇشىنشى ورىن ءۇشىن ماچ وتەدى.

بۇعان دەيىن تۋرنيردە ۆەنگريا حوككەي قۇراماسى ۇلىبريتانيا قۇراماسىنا بەس شايبا سوعىپ، 1939 جىلدان بەرگى ەڭ ءىرى جەڭىسىنە قول جەتكىزگەن بولاتىن. الداعى ۋاقىتتا كانادالىق حوككەيشى دجەيك ماسسي استانانىڭ «بارىس» كلۋبىمەن جاڭا كەلىسىمشارتقا وتىرعاننان كەيىن قازاقستاندىق جانكۇيەرلەر تۋرالى پىكىر ءبىلدىردى.