InfoHub Logo

2025 جىلعى 1 ساۋىردەگى جاعداي بويىنشا قازاقستان اۋماعىندا جەرگىلىكتى اتقارۋشى ورگانداردىڭ رۇقساتىمەن 13 891 شەتەل ازاماتى ەڭبەك ەتۋدە. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى.

شەتەل جۇمىس كۇشىن (شجك) تارتۋ رۇقساتتارى بىرنەشە سانات بويىنشا بەرىلەدى. اتاپ ايتقاندا، ءبىرىنشى سانات – باسشىلار مەن ولاردىڭ ورىنباسارلارىنا 570 رۇقسات بەرىلسە، قۇرىلىمدىق بولىمشەلەردىڭ باسشىلارى ءۇشىن ەكىنشى سانات بويىنشا 2 439 رۇقسات راسىمدەلگەن. ءۇشىنشى جانە ءتورتىنشى ساناتتارعا – ياعني، ماماندار مەن بىلىكتى جۇمىسشىلارعا – تيىسىنشە 4 541 جانە 1 023 رۇقسات بەرىلگەن. بۇدان بولەك، ماۋسىمدىق جۇمىستارعا 1 709 ادام، ال كورپوراتيۆتىك اۋىستىرۋ اياسىندا 3 609 شەتەل مامانى تارتىلعان.

قازىرگى تاڭدا ەلىمىزدە شەتەل جۇمىس كۇشىن پايدالاناتىن 1 768 جۇمىس بەرۋشى بار. بۇل مەكەمەلەردە جالپى 376 مىڭنان استام قازاقستان ازاماتى جۇمىس ىستەيدى، بۇل بارلىق قىزمەتكەرلەردىڭ 96،4%-ىن قۇرايدى.

سالا بويىنشا ەڭ كوپ شەتەل ماماندارى قۇرىلىس سالاسىندا جۇمىس ىستەيدى – 5 131 ادام. اۋىل، ورمان جانە بالىق شارۋاشىلىعىندا – 1 695 ادام، تاۋ-كەن ءوندىرىسى مەن كارەرلەردى قازۋدا – 1 351 ادام، ال وڭدەۋ ونەركاسىبىندە – 1 232 ادام تارتىلعان.

شەتەلدىك ەڭبەك ميگرانتتارىنىڭ نەگىزگى كەلۋ ەلدەرى: جۇڭگو – 4 885 ادام، وزبەكستان – 1 614 ادام، ءۇندىستان – 1 150 ادام جانە تۇركيا – 1 124 ادام.

مينيسترلىك ىشكى ەڭبەك نارىعىن قورعاۋ ماقساتىندا جىل سايىن شەتەلدىك مامانداردى تارتۋعا كۆوتا بەلگىلەپ وتىرادى. 2025 جىلى بۇل كۆوتا رەسپۋبليكاداعى جۇمىس كۇشىنىڭ سانىنا شاققاندا 0،2% نەمەسە 14،8 مىڭ بىرلىك كولەمىندە بەلگىلەنگەن بولاتىن. الايدا بيىلعى ناۋرىز ايىنان باستاپ جەرگىلىكتى اتقارۋشى ورگانداردىڭ وتىنىمدەرىنە بايلانىستى كۆوتا كولەمى 16،5 مىڭ بىرلىككە دەيىن ۇلعايتىلدى.