InfoHub Logo

قازاقستاندا ەسكى ۇلگىدەگى 10 000 تەڭگەلىك بانكنوتتاردىڭ اينالىم مەرزىمى تاعى ءبىر جىلعا ۇزارتىلۋى مۇمكىن. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ جۋرناليستەردىڭ سۇراقتارىنا جاۋاپ بەرگەندە ايتتى.

ونىڭ ايتۋىنشا، بۇل شەشىم ەكىنشى دەڭگەيلى بانكتەردىڭ ءوتىنىشى بويىنشا قاراستىرىلىپ جاتىر.

«ءيا، ءبىز مەرزىمىن تاعى ءبىر جىلعا ۇزارتۋدى جوسپارلاپ وتىرمىز. ولارعا سۇرانىس جوعارى، جانە قارجىگەرلەر قاۋىمداستىعى – ياعني ەكىنشى دەڭگەيلى بانكتەر – بىزگە تاعى ءبىر جىلعا مەرزىمىن ۇزارتۋدى سۇراپ جۇگىندى. بۇل قالىپتى جاعداي»، - دەدى سۇلەيمەنوۆ.

بۇعان دەيىن ەسكى 10 000 تەڭگەلىكتەردىڭ اينالىم مەرزىمى 2026 جىلدىڭ ماۋسىم ايىندا اياقتالادى دەپ جوسپارلانعان بولاتىن. ەندى ونى 2027 جىلدىڭ ماۋسىمىنا دەيىن ۇزارتۋ كوزدەلۋدە.

پاراللەلدى اينالىم اياقتالعاننان كەيىن نە بولادى؟

بەلگىلەنگەن مەرزىمدەر اياقتالعاننان كەيىن دە ەكىنشى دەڭگەيلى بانكتەر مەن «قازپوشتا» اق ەسكى ۇلگىدەگى بانكنوتتاردى جاڭالارىنا ءۇش جىل بويى ايىرباستاپ وتىرادى. ۇلتتىق بانكتىڭ فيليالدارى مۇنداي ايىرباستى مەرزىمسىز جۇزەگە اسىرادى.

پاراللەلدى اينالىم كەزىندە ەسكى جانە جاڭا ۇلگىدەگى بانكنوتتاردىڭ قازاقستان اۋماعىنداعى بارلىق تۇردەگى تولەمدەر، اۋدارىمدار جانە بانك شوتتارىنا ەسەپكە جاتقىزۋ ءۇشىن زاڭدى تولەم قۇرالى بولىپ تابىلاتىنى جانە مىندەتتى تۇردە قابىلداناتىنى اتاپ ءوتىلدى.

ەسكە سالا كەتەيىك، 2025 جىلدىڭ 25 جەلتوقسانىندا ۇلتتىق بانك جاڭا ديزاينداعى 500 تەڭگەلىك بانكنوتتىڭ اينالىمعا شىعارىلعانى تۋرالى حابارلاعان بولاتىن. الايدا، بۇل بانكنوتتار 2026 جىلدىڭ ەكىنشى توقسانىندا جاپپاي اينالىمعا ەنگىزىلەدى، سەبەبى ولاردى ەلدىڭ بارلىق وڭىرلەرىنە جەتكىزۋ جانە جابدىقتاردى (بانكوماتتار، تەرمينالدار جانە باسقا كاسسا تەحنيكالارى) بەيىمدەۋ ءۇشىن قوسىمشا ۋاقىت قاجەت.