InfoHub Logo

قازاقستاندا كومىر ەنەرگەتيكاسىن دامىتۋعا باعىتتالعان جاڭا ۇلتتىق جوبا بەكىتىلدى. بۇل جوبا اياسىندا كومىر ەلەكتر ستانسيالارىنىڭ قىزمەتكەرلەرى ءۇشىن جەڭىلدىكتى يپوتەكالىق باعدارلاما ىسكە قوسىلادى. بۇل تۋرالى پرەمەر-مينيستر ولجاس بەكتەنوۆ قول قويعان قاۋلىدا ايتىلعان.

بۇل تۋرالى Infohub.kz اقپارات اگەنتتىگى حابارلايدى.

جوبانىڭ نەگىزگى ماقساتى – ەلدىڭ ەنەرگەتيكالىق قاۋىپسىزدىگىن 2030 جىلعا دەيىن قامتاماسىز ەتۋ. يندۋستريالاندىرۋ مەن سيفرلىق ەكونوميكانىڭ دامۋىنا بايلانىستى ارتىپ وتىرعان قۋات كوزدەرىنە دەگەن سۇرانىستى قاناعاتتاندىرۋ كوزدەلۋدە.

جاڭا ەنەرگيا كوزدەرى جانە جاڭعىرتۋ

جوبا اياسىندا 7،8 گۆت جاڭا قۋات كوزدەرىن ىسكە قوسۋ جانە قولدانىستاعىلارىن جاڭعىرتۋ جوسپارلانعان. ونىڭ ىشىندە ەكىباستۇزدا (2640 مۆت)، كوكشەتاۋدا (700 مۆت) جانە جەزقازعاندا (500 مۆت) ءىرى نىساندار سالىنادى. سونداي-اق، كوكشەتاۋ، سەمەي جانە وسكەمەن قالالارىندا زاماناۋي جىلۋ ەلەكتر ورتالىقتارى (جەو) بوي كوتەرەدى.

بۇعان قوسا، اقسۋ گرەس-ى، ەكىباستۇز گرەس-2 جانە قاراعاندى ەنەرگەتيكا تورابى سياقتى 11 جۇمىس ىستەپ تۇرعان ستانسيانى تەرەڭدەتىپ جاڭعىرتۋ جۇمىستارى باستالادى. بۇل 2030 جىلعا دەيىن سالانىڭ نەگىزگى جابدىقتارىنىڭ توزۋ دەڭگەيىن 12،6%-عا ازايتۋعا مۇمكىندىك بەرەدى.

ينۆەستيسيا جانە ەكولوگيا

جوبالار ينۆەستيسيا تارتۋ ارقىلى قارجىلاندىرىلادى. جالپى ينۆەستيسيا كولەمى كەم دەگەندە 7،5 ترلن تەڭگە بولادى دەپ كۇتىلۋدە. جاڭا قۇرىلىستاردا زاماناۋي تەحنولوگيالار قولدانىلىپ، ەنەرگيا تيىمدىلىگى ارتتىرىلادى جانە شىعارىندىلار ازايادى. ەكولوگيالىق تالاپتارعا ساي بولۋ ءۇشىن جوعارى تەحنولوگيالىق ەلەكتروسۇزگىلەر، ازوت وكسيدتەرىن كاتاليتيكالىق قالپىنا كەلتىرۋ جۇيەلەرى جانە گازداردى سۇيىلتۋ ادىستەرى قولدانىلادى.

الەۋمەتتىك قولداۋ جانە جۇمىس ورىندارى

ۇلتتىق جوبا اياسىندا شامامەن 4،5 مىڭ جاڭا تۇراقتى جۇمىس ورنى اشىلادى. سونىمەن قاتار، كومىر ەلەكتر ستانسيالارى قىزمەتكەرلەرى ءۇشىن «وتباسى بانك»-پەن بىرلەسىپ جەڭىلدىكتى يپوتەكا ۇسىنىلادى. مامانداردى دايارلاۋ جانە بىلىكتىلىگىن ارتتىرۋ ءۇشىن ارنايى باعدارلامالار دا قاراستىرىلعان.

كومىرگە دەگەن سۇرانىس جانە كولىك ينفراقۇرىلىمى

جاڭارتىلعان ەنەرگەتيكا جۇيەسىنىڭ تۇراقتى جۇمىسىن قامتاماسىز ەتۋ ءۇشىن جوبا ءوندىرۋ جانە كولىك سالالارىمەن بايلانىستىرىلعان. 2030 جىلعا قاراي ەنەرگەتيكالىق كومىرگە دەگەن قوسىمشا سۇرانىس جىلىنا شامامەن 20 ملن تونناعا جەتەدى دەپ بولجانۋدا. بۇل ءۇشىن جارتىلاي ۆاگوندار پاركىن (تاۋلىگىنە قوسىمشا 600 بىرلىك) كەڭەيتۋ، تەمىرجول ينفراقۇرىلىمىن جاڭعىرتۋ جانە وتىن تاسىمالىنا ارنالعان تاريفتەردى رەتتەۋ جوسپارلانۋدا.