InfoHub Logo

مەملەكەت باسشىسى قاسىم-جومارت توقايەۆ «تازا قازاقستان» باستاماسىن دامىتۋ اياسىندا جانۋارلارعا دەگەن مادەنيەتتى ارتتىرۋ ماسەلەسىنە توقتالدى. ول ءۇي جانۋارلارىنىڭ ادامداردىڭ سالعىرتتىعىنان قۇربان بولۋىنا جول بەرىلمەيتىنىن اتاپ ءوتتى.

بۇل تۋرالى Infohub.kz اقپارات اگەنتتىگى حابارلايدى.

«ۇكىمەت جانۋارلاردى دۇرىس ۇستاماعانى ءۇشىن اكىمشىلىك جاۋاپكەرشىلىكتى قاتايتۋى، ءتىپتى ولارعا، ەڭ الدىمەن ءۇي جانۋارلارىنا قاتىگەزدىك كورسەتكەنى ءۇشىن قىلمىستىق جاۋاپكەرشىلىكتى كۇشەيتۋى ءتيىس. شىنىندا دا، كوشەدەگى ءيتتىڭ ماسەلەسى – بۇل جانۋارلاردى جاقسى كورەتىنىن ايتىپ، كەيىن ولاردان جاڭىلعان ادامداردىڭ سالعىرتتىعىنىڭ سالدارى. مۇنداي جاعدايلاردىڭ جولىن كەسۋ ءۇشىن شارالار قابىلداۋ كەرەك»، - دەدى توقايەۆ.

جانۋارلارعا ارنالعان باسپانالارعا قوعامدىق باقىلاۋ

پرەزيدەنتتىڭ ايتۋىنشا، مامانداندىرىلعان جانۋارلار باسپانالارىنىڭ جۇمىسىنا ءتيىستى قوعامدىق باقىلاۋدى قامتاماسىز ەتۋ قاجەت. ول بۇل جۇمىستى «حايپ»سىز، ناقتى ىسكە اسىرۋدى تالاپ ەتتى.

«مەنىڭ ويىمشا، سىزدەر بۇل ماسەلەمەن دە اينالىساسىزدار. جالپى، كوشەدەگى ءيتتى اياۋ – بۇل ادامداردى بىر-بىرىنە قارسى قويۋعا نەمەسە جاقتاۋشىلار مەن قارسىلاستارعا بولۋگە سەبەپ بولاتىن جاعداي ەمەس. ماسەلە مىنادا، بۇل جاعداي ءورشىپ تۇر، بالالار مەن ەرەسەكتەر دە قاڭعىباس ءيتتىڭ قۇربانى بولىپ جاتىر. ءبىز وبلىستاردان مۇنداي مالىمەتتەر الامىز. بۇل جاعدايعا مەملەكەت پەن قوعامنىڭ ارالاسۋى قاجەت، سونىڭ ىشىندە پارلامەنتتىڭ زاڭنامالىق قامتاماسىز ەتۋ تۇرعىسىنان دا. ءبىراق ءبىز ءالسىز جانۋارلارعا، سونىڭ ىشىندە بۇرىن ءۇي جانۋارلارى بولعاندارعا قاتىگەزدىك جاساۋدىڭ ءجيى كەزدەسەتىن جاعدايلارىنا توزبەۋىمىز كەرەك، ولاردى ازاپتاعانداردى، ۆارۆارلاردى قىلمىستىق جاۋاپكەرشىلىككە تارتۋىمىز قاجەت. مۇنداي تاسىلدەر قوعامدا قورشاعان ورتاعا دەگەن پروگرەسسيۆتى، جاۋاپكەرشىلىكتى كوزقاراستى نىعايتادى دەپ ويلايمىن. بۇل دا «تازا قازاقستان» اياسىنداعى جۇمىسىمىزدىڭ ءبىر بولىگى»، - دەپ اتاپ ءوتتى مەملەكەت باسشىسى.

بۇعان دەيىن قاسىم-جومارت توقايەۆ قازاقستاننىڭ بيوالۋانتۇرلىلىكتى ساقتاۋ بويىنشا تابىستى تاجىريبەسىمەن بولىسكەن بولاتىن. پرەزيدەنتتىڭ ايتۋىنشا، قازاقستاندا كيىك پوپۋلياسياسى قالپىنا كەلتىرىلگەن. سونداي-اق، قار بارىسىنىڭ سانى ەكى ەسەدەن اسىپ، شامامەن 190-عا جەتكەن.