InfoHub Logo

قازاقستاندا جول قوزعالىسىن باقىلاۋ جۇيەسىندە ەلەۋلى وزگەرىستەر بولادى. ەندى جول ەرەجەسىن بۇزعاندارعا تەك اقشالاي ايىپپۇل ەمەس، سونىمەن قاتار «ايىپپۇلدىق بالل» ەسەبىنەن جازا قولدانىلماق. بۇل جاڭاشىلدىق جۇرگىزۋشىلەردىڭ ومىرىنە ايتارلىقتاي اسەر ەتەدى دەپ كۇتىلۋدە.

بۇل تۋرالى Infohub.kz اقپارات اگەنتتىگى حابارلايدى.

جۇرگىزۋشى كۋالىگىنەن ايىرىلۋ ءقاۋپى

جاڭا جۇيە بويىنشا، ءبىر جىل ىشىندە 20 بالل جيناعان جۇرگىزۋشىلەردىڭ كۋالىگى التى ايعا اۆتوماتتى تۇردە توقتاتىلادى. ودان كەيىن كولىك جۇرگىزۋدى قايتا باستاۋ ءۇشىن جۇرگىزۋشىلەر جول ەرەجەسىن ءبىلۋى بويىنشا ەمتيحاننان قايتا ءوتۋى ءتيىس.

جاس جۇرگىزۋشىلەر مەن جاياۋ جۇرگىنشىلەرگە دە قاتىستى

بۇل جاڭالىق تەك تاجىريبەلى جۇرگىزۋشىلەرگە عانا ەمەس، ءالى كولىك تىزگىندەمەگەندەرگە دە اسەر ەتەدى. ەگەر جۇرگىزۋشى كۋالىگى جوق ادام جول ەرەجەسىن بۇزىپ، 20 بالل جيناسا، وعان الداعى التى ايدا كولىك جۇرگىزۋ كۋالىگىن الۋعا تىيىم سالىنادى.

پيلوتتىق رەجيم جانە پسيحولوگيالىق باعالاۋ

قازىرگى تاڭدا بۇل جۇيە استانا، الماتى جانە شىمكەنت قالالارىندا پيلوتتىق رەجيمدە سىنالىپ جاتىر. بولاشاقتا جۇيەلى بۇزۋشىلاردىڭ جولداعى اگرەسسيۆتى مىنەز-قۇلقىنىڭ سەبەپتەرىن انىقتاۋ ماقساتىندا پسيحولوگيالىق باعالاۋ ەنگىزۋ دە قاراستىرىلۋدا.

يتاليا تاجىريبەسى

ەۋروپانىڭ 21 ەلىندە قولدانىلاتىن مۇنداي باللدىق جۇيە يتاليادا جول اپاتتارىنان بولاتىن ءولىم-جىتىمدى العاشقى جىلدارىندا 25%-عا ازايتقان. بۇل جۇيەنىڭ باستى ارتىقشىلىعى – الەۋمەتتىك ادىلدىك ءپرينسيپى. اقشالاي ايىپپۇل ىقپال ەتپەيتىن بايلار ءۇشىن دە، جۇرگىزۋشى كۋالىگىنەن ايىرىلۋ ءقاۋپى بارلىعىن ەسكەرە وتىرىپ، بارلىق جۇرگىزۋشىلەردى بىردەي تارتىپكە شاقىرادى.

جىلدامدىقتى باقىلاۋ

باللدىق جۇيەمەن قاتار، قازاقستاندا ورتاشا جىلدامدىقتى انىقتايتىن جۇيەلەر دە كەڭىنەن ەنگىزىلەدى. بۇل تەك اقىلى تاس جولداردا عانا ەمەس، ەلدى مەكەندەر ىشىندە دە قولدانىلادى. وسىلايشا، جۇرگىزۋشىلەردىڭ كامەرالار الدىندا عانا جىلدامدىقتى باسەڭدەتۋىنە جول بەرىلمەيدى.