InfoHub Logo

قازاقستاندا جىلجىمايتىن مۇلىك نارىعىنداعى «فليپپەرلەرمەن»، ياعني پاتەردى ساتىپ الىپ، ارزان جوندەۋدەن وتكىزىپ، كەيىن قىمباتقا ساتۋ ارقىلى پايدا تاباتىن سپەكۋليانتتارمەن كۇرەسۋدىڭ جولدارى قاراستىرىلۋدا. «وتباسى بانكى» باسقارما ءتورايىمى ءلاززات يبراگيموۆا بۇل ماسەلەگە قاتىستى ءوز ۇسىنىسىن ايتتى.

بۇل تۋرالى Infohub.kz اقپارات اگەنتتىگى حابارلايدى.

سالىقتىق شارالار ارقىلى نارىقتى رەتتەۋ

ءلاززات يبراگيموۆانىڭ ايتۋىنشا، جىلجىمايتىن مۇلىك نارىعىن قىزدىرىپ، باعانىڭ شارىقتاۋىنا سپەكۋليانتتار مەن «ينۆەستورلار» سەبەپ بولادى. ولار قولدا بار اقشاعا پاتەر ساتىپ الىپ، «فليپپەرلىك» جوندەۋ جاساپ، كەيىن قايتا ساتۋدى كوزدەيدى. مۇنىڭ نەگىزگى ماقساتى – تابىس تابۋ.

«مەنىڭ ويىمشا، تۇرعىن ءۇي نارىعىنداعى ەڭ باستى ماسەلە – سپەكۋليانتتار مەن وسىلاي اتالاتىن ينۆەستورلاردان قۇتىلۋ. ولار نارىقتى قاتتى قىزدىرادى. بوس اقشاعا ءۇي ساتىپ الىپ، ونى «فليپپەرلىك» جوندەۋدەن وتكىزىپ، قايتا ساتادى. ولار نارىقتى شارىقتاتۋعا سەبەپكەر بولادى، سەبەبى ولاردىڭ باستى ماقساتى – تابىس تابۋ. بۇل جەردە سالىقتىق ادىستەرمەن كۇرەسۋ قاجەت»، – دەدى يبراگيموۆا.

كوپ پاتەر يەلەرىنە سالىقتى ارتتىرۋ

ول سالىق كودەكسىنە ەنگىزىلگەن وزگەرىستەردى قۇپتادى. بۇل وزگەرىستەر جالپى قۇنى 450 ميلليون تەڭگەدەن اساتىن جىلجىمايتىن مۇلىك يەلەرىنە سالىقتى ارتتىرۋدى كوزدەيدى.

«سەگىز-توعىز پاتەر ساتىپ الا الاتىن ادامدار بۇل ينۆەستيسيانىڭ 10-20% مولشەرىندە سالىق تولەۋى ءتيىس. ەل ينفراقۇرىلىمعا، ەلەكتر ەنەرگياسىن، جىلۋ جەلىلەرىن تارتۋعا اقشا جۇمسايدى. نەگە بۇل تەك ءبىر وتباسىنىڭ يگىلىگىنە اينالۋى كەرەك، ال باسقا بىرەۋلەردە پاتەر مۇلدەم بولمايدى؟» – دەپ ساۋال تاستادى «وتباسى بانكى» باسشىسى.

ول سونداي-اق ەكىنشى-ۇشىنشى پاتەردى تىركەۋ كەزىندە سالىقتى كوبەيتۋدى ۇسىندى. «سوندا ادامدار ءۇيدى كىمگە ارنالسا، سول ادامنىڭ اتىنا تىركەي باستايدى. ءبىر ادام سەگىز پاتەردە تۇرا المايدى، ولاردى بىرەۋگە ساتۋ نەمەسە جالعا بەرۋ ءۇشىن ساتىپ الادى. وندا بۇل كوممەرسيالىق جىلجىمايتىن مۇلىك بولىپ سانالادى. مەن تۇرعىن ءۇي نارىعىن الدەقايدا قاتايتار ەدىم»، – دەدى ءلاززات يبراگيموۆا.

ول قازاقستاندا جىلجىمايتىن مۇلىك باعاسى تەڭگەمەن ەسەپتەگەندە ەشقاشان تومەندەمەگەنىن اتاپ ءوتتى. «ورتاشا قازاقستاندىق، قورداعى اقشاسى پايدا بولىپ، تابىسى ءسال ارتقان كەزدە، اۆتوماتتى تۇردە تاعى ءبىر پاتەر ساتىپ الۋعا بارادى. پاتەر – بۇل ينۆەستيسيالىق اكتيۆ. بۇل جاقسى، ءبىراق ونى زاڭنامامەن قاتاڭ رەتتەۋ كەرەك. ەكىنشى، ءۇشىنشى، ءتورتىنشى پاتەرى بارلار ءۇشىن سالىقتى ارتتىرۋ قاجەت. سوندا، ەگەر ءسىز نەمەرەڭىزگە پاتەر ساتىپ الساڭىز، ونى سول نەمەرەڭىزدىڭ اتىنا رەسىمدەيتىن بولاسىز»، – دەپ قورىتىندىلادى ءلاززات يبراگيموۆا.