InfoHub Logo

كنب مەن ءىىم اۋقىمدى ارنايى وپەراسيا جۇرگىزدى

قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى (كنب) مەن ىشكى ىستەر مينيسترلىگى (ءىىم) بىرلەسە وتىرىپ، ەلىمىزدە اۋقىمدى ارنايى وپەراسيا جۇرگىزدى. ناتيجەسىندە 20 ادام ۇستالدى، دەپ حابارلايدى Infohub.kz اقپارات اگەنتتىگى.

4 اقپاندا باس پروكۋراتۋرانىڭ ۇيلەستىرۋىمەن وتكەن وپەراسيا قىلمىستىق توپتاردىڭ قىزمەتىنە توسقاۋىل قويۋعا باعىتتالدى. ولار قارۋ-جاراق ساتۋمەن، بوپسالاۋمەن، ۇرلانعان كولىكتەردى زاڭداستىرۋمەن جانە باسقا دا قىلمىستىق ارەكەتتەرمەن اينالىسقان.

ۇستالعانداردىڭ ءىسى بويىنشا تەرگەۋ امالدارى جۇرگىزىلۋدە

وپەراسيا الماتى، شىمكەنت قالالارىندا، سونداي-اق اقتوبە، الماتى، شىعىس قازاقستان، جامبىل وبلىستارىندا جانە اباي، جەتىسۋ وبلىستارىندا ءبىر مەزگىلدە وتكىزىلدى. ۇستالعان 20 ادامنىڭ 10-ى ۋاقىتشا ۇستاۋ يزولياتورلارىنا قامالدى.

ءتىنتۋ كەزىندە كۇدىكتىلەردەن اتىس قارۋلارى، وق-دارىلەر، ەسىرتكى زاتتارى جانە ءىرى كولەمدەگى اقشالاي قاراجات، سونداي-اق باسقا دا زاتتاي دالەلدەمەلەر تاركىلەندى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. قىلمىستىق-پروسەستىك كودەكستىڭ 201-بابىنا سايكەس وزگە دە اقپارات جاريا ەتىلمەيدى.

ەسكە سالا كەتەيىك، بۇعان دەيىن استانا مەن الماتى قالالارىندا پوليسيا مەن كنب قىزمەتكەرلەرى اۋىر جانە اسا اۋىر قىلمىستار جاساۋعا قاتىسى بار قىلمىستىق قاۋىمداستىقتىڭ مۇشەلەرىن ۇستاعان بولاتىن.