InfoHub Logo

قازاقستان رەسپۋبليكاسى دەنساۋلىق ساقتاۋ مينيسترلىگىنىڭ مەديسينالىق جانە فارماسيەۆتيكالىق باقىلاۋ كوميتەتى «سترەپتوسيد» دارىلىك زاتىنىڭ ءبىر پارتياسىن اينالىمنان شىعارىپ، مەديسينالىق قولدانىسقا تىيىم سالدى. بۇل تۋرالى كوميتەت ءتوراعاسىنىڭ 2026 جىلعى 23 اقپانداعى بۇيرىعىندا ايتىلعان.

بۇل شەكتەۋ قازاقستاندىق «حيمفارم» اق وندىرگەن «سترەپتوسيد، تابلەتكالار، 300 ميلليگرامم، 10 تابلەتكادان تۇراتىن كونتۋرلى ۇياشىقتى قاپتامادا. بەس كونتۋرلى ۇياشىقتى قاپتامادان كارتون قوراپتا» ءدارىسىنىڭ رك-لس-5 № 003366 ءنومىرلى پارتياسىنا قاتىستى. اتالعان پارتيانىڭ جارامدىلىق مەرزىمى 2030 جىلعى تامىزعا دەيىن بولعان.

انىقتاما: «سترەپتوسيد» – سۋلفانيلاميدتەر توبىنا جاتاتىن سينتەتيكالىق انتيباكتەريالدى پرەپارات. ول باكتەريالاردىڭ ءوسۋى مەن كوبەيۋىن تەجەپ، باكتەريوستاتيكالىق اسەر ەتەدى. بۇل ءدارى ءارتۇرلى باكتەريالىق ينفەكسيالاردى، سونىڭ ىشىندە تەرى، جارا، كۇيىك، شىرىشتى قابىق ينفەكسيالارى مەن تىنىس جولدارىنىڭ اۋرۋلارىن ەمدەۋگە قولدانىلادى.

اتالعان تىيىم ءدارىنىڭ تەك وسى پارتياسىنا عانا قاتىستى. دەمەك، بۇل ءدارىحانالار مەن مەديسينالىق مەكەمەلەردەن، سونداي-اق باسقا دا ساتۋ ورىندارىنان الىنۋى ءتيىس. الايدا، بۇيرىقتا تىيىمنىڭ ناقتى سەبەپتەرى كورسەتىلمەگەن.

بۇل تاپسىرمانى ورىنداۋ فارماسيەۆتيكالىق قىزمەتتى جوسپاردان تىس تەكسەرۋ باسقارماسىنا جۇكتەلدى. ولار ءبىر جۇمىس كۇنى ىشىندە ءتيىستى اۋماقتىق كوميتەت بولىمشەلەرىنە، دارىلىك زاتتار اينالىمى سالاسىنداعى مەملەكەتتىك ساراپتاما ۇيىمىنا، الەۋمەتتىك مەديسينالىق ساقتاندىرۋ قورىنا جانە «سك-فارماسيا» جشس-نا حابارلاۋى كەرەك.

بۇعان دەيىن قازاقستاندا گەرمانيادا وندىرىلگەن «يزوپتين» (بەلسەندى زاتى – ۆەراپاميل) 40 مگ دارىلىك پرەپاراتىن رەسمي تۇردە ساتۋعا جانە تاراتۋعا تىيىم سالىنعانى حابارلانعان بولاتىن. سونداي-اق، «ۆياگرانىڭ» گەنەريگى دە ەل اۋماعىندا ساتىلىمنان الىنعان ەدى.