InfoHub Logo

قازاقستانداعى ەسكىرگەن جىلۋ ەلەكتر ورتالىقتارىن (جەو) شاعىن ءمودۋلدى اتوم رەاكتورلارىمەن (شمر) الماستىرۋ مۇمكىندىگى قاراستىرىلۋدا. بۇل تۋرالى پرەزيدەنت بەكىتكەن اتوم سالاسىن 2050 جىلعا دەيىن دامىتۋ ستراتەگياسىندا ايتىلعان.

بۇل تۋرالى Infohub.kz اقپارات اگەنتتىگى حابارلايدى.

شاعىن اەس-تىڭ تيىمدىلىگى زەرتتەلەدى

جاڭا ستراتەگيا اياسىندا شمر-دىڭ قازاقستاننىڭ ءارتۇرلى ايماقتارىنداعى قولدانىسقا جارامدىلىعى، ولاردىڭ سەنىمدىلىگى مەن ەكونوميكالىق تيىمدىلىگى تەحنيكالىق-ەكونوميكالىق تالداۋ ارقىلى باعالانادى.

سونىمەن قاتار، ەنەرگيا تاپشىلىعى بار نەمەسە ەلەكتر جەلىسى ينفراقۇرىلىمى ناشار دامىعان ايماقتاردا شمر-دى ورنالاستىرۋ ورىندارى انىقتالىپ، ەسكى جەو-لاردى الماستىرۋ مۇمكىندىگى قارالماق.

اتوم ەنەرگياسىن دامىتۋدىڭ ماقساتى

اتوم سالاسىن دامىتۋ ستراتەگياسى – بۇل بەيبىت ماقساتتاعى اتوم ەنەرگياسىن پايدالانۋ سالاسىنداعى مەملەكەتتىك ساياساتتىڭ باعىتتارى مەن ماقساتتارىن ايقىندايتىن ۇزاق مەرزىمدى قۇجات. ونىڭ نەگىزگى مىندەتتەرى – ەنەرگەتيكالىق قاۋىپسىزدىكتى قامتاماسىز ەتۋ، ەكونوميكانىڭ تۇراقتى وسۋىنە ىقپال ەتۋ، جوعارى تەحنولوگيالىق وندىرىستەردى دامىتۋ جانە كليماتتىق مىندەتتەمەلەردى ورىنداۋ.

بۇل ستراتەگيا بۇعان دەيىنگى شەشىمدەردى جالعاستىرادى. 2024 جىلدىڭ سوڭىندا وتكەن رەسپۋبليكالىق رەفەرەندۋمدا قازاقستاندىقتار اەس قۇرىلىسىن قولداعان بولاتىن. جالپى ستراتەگيا بويىنشا، قازاقستاندا ەنەرگەتيكا، عىلىم، تەحنولوگيا، قاۋىپسىزدىك جۇيەلەرى، كادر دايارلاۋ جانە جۇمىس ورىندارىن قۇرۋدى قامتيتىن يادرولىق كلاستەر قالىپتاستىرۋ كوزدەلگەن.

بۇعان دەيىن قازاقستاندا ەكىنشى اەس قۇرىلىسىنىڭ ورنى ناقتىلانعان ەدى. ءبىرىنشى اەس سياقتى، ونى دا الماتى وبلىسىنىڭ جامبىل اۋدانىندا سالاتىن بولادى.