InfoHub Logo

2026 جىلدىڭ اقپان ايىندا قازاقستاندا تۇرعىن ءۇيدى ساتىپ الۋ-ساتۋ مامىلەلەرىنىڭ سانى وتكەن ايمەن سالىستىرعاندا تاعى 1،2 پايىزعا كەمىدى. ال تەك پاتەرلەردى ەسەپكە الساق، بۇل كورسەتكىش 2،1 پايىزعا تومەندەگەن. TengriHome جۋرناليستەرى جىلجىمايتىن مۇلىك نارىعىنداعى جاعداي مەن بولاشاققا قانداي پەرسپەكتيۆالار بار ەكەنىن انىقتادى.

بۇل تۋرالى Infohub.kz اقپارات اگەنتتىگى حابارلايدى.

ۇلتتىق ستاتيستيكا بيۋروسى (ۇسب) اقپان ايىنداعى تۇرعىن ءۇيدى ساتىپ الۋ-ساتۋ مامىلەلەرى تۋرالى دەرەكتەردى جاريالادى. بۇل كورسەتكىش ءتىپتى قاڭتار ايىنداعى ازعانتاي سانداردان دا تومەندەپ كەتتى. ەل بويىنشا بارلىعى 27 421 تۇرعىن ءۇي وبەكتىسى ساتىلعان (قاڭتاردا – 27 745). ونىڭ ىشىندە پاتەرلەر – 21 259 بىرلىك (قاڭتاردا – 21 725).

العاشقى ەكى ايدىڭ جيىنتىق ستاتيستيكاسى (55 166 مامىلە) 2025 جىلعى (59 932 مامىلە) جانە 2024 جىلعى (62 247 مامىلە) وسى كەزەڭدەرمەن سالىستىرعاندا تومەن. بۇعان دەيىن وتكەن جىلدىڭ جەلتوقسان ايىندا 53 128 مامىلە جاسالعانى بەلگىلى. ال قاڭتار ايىندا نارىق 47،8 پايىزعا قۇلدىراعان ەدى.

نەگە جىلجىمايتىن مۇلىككە سۇرانىس ازايدى؟

جىلجىمايتىن مۇلىك بويىنشا ماركەتولوگ جانە ساراپشى الەكساندر بيكەتوۆتىڭ ايتۋىنشا، جوعارى باعالار نارىقتاعى بەلسەندىلىكتىڭ تومەندەۋىنە اكەلەتىن باستى فاكتورلاردىڭ ءبىرى بولىپ وتىر.

«الماتى مەن استانا تۇرعىندارىنىڭ كوپشىلىگى 30-40 ميلليون تەڭگە كولەمىندەگى باسپانا ىزدەيدى. الايدا، باستاپقى نارىقتا مۇنداي سوماعا جاقسى جەردە ورنالاسقان ساپالى تۇرعىن ءۇيدى تابۋ قيىن. ال ەكىنشى نارىقتاعى ساتىپ الۋلاردى تەك 14 بانكتىڭ بەسەۋى عانا قارجىلاندىرۋعا دايىن. مامىلەلەردىڭ ۇشتەن ءبىرى يپوتەكا ارقىلى جۇزەگە اسادى. ءبىراق پايىزدىق مولشەرلەمەلەر وتە جوعارى. وسىنىڭ سالدارىنان مامىلەلەر سانى ازايۋدا»، - دەيدى بيكەتوۆ.

ساراپشىنىڭ سوزىنشە، تۇرعىن ءۇيدىڭ قىمباتتاۋىنا بايلانىستى يپوتەكالىق نەسيە الۋدان گورى، پاتەر جالداۋ الدەقايدا ءتيىمدى بولىپ تۇر.

«كوشىپ-قونۋشىلار سانى ازايعاندا، جالداۋ اقىسى دا تومەندەدى. ءبىراق وسى ۋاقىتتا قايتا قارجىلاندىرۋ مولشەرلەمەسى توعىز پايىزدان 18 پايىزعا دەيىن ءوسىپ، يپوتەكالىق نەسيەلەردىڭ قۇنىنا اسەر ەتتى. وسىلايشا، يپوتەكاعا پاتەر الۋ ءتيىمسىز بولىپ قالدى. پوتەنسيالدى ساتىپ الۋشىلار جالدامالى تۇرعىن ءۇيدى تاڭدايدى»، - دەپ بولجايدى الەكساندر.