InfoHub Logo

قازاقستاندا 17 ناۋرىزدان باستاپ قالالىق جانە اۋداندىق اسكەرگە شاقىرۋ كوميسسيالارى جۇمىسىن باستادى. ولار اكىم ورىنباسارلارىنىڭ توراعالىعىمەن مەرزىمدى اسكەري قىزمەتكە ازاماتتاردى شاقىرۋدى جۇزەگە اسىرادى. بيىل كوكتەمدە قانشا ادام اسكەرگە الىناتىنى جانە ولاردىڭ قايدا جىبەرىلەتىنى تۋرالى قورعانىس مينيسترلىگى مالىمەت بەردى.

بۇل تۋرالى Infohub.kz اقپارات اگەنتتىگى حابارلايدى.

اسكەرگە شاقىرىلۋشىلار سانى مەن ءبولىنۋى

قارۋلى كۇشتەر باس شتابىنىڭ ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى الماس يسابەكوۆتىڭ ايتۋىنشا، 30 ماۋسىمعا دەيىن 18-27 جاس ارالىعىنداعى 21 مىڭ ازاماتتى اسكەرگە شاقىرۋ جوسپارلانعان.

ونىڭ ىشىندە 11 مىڭنان استام ادام قارۋلى كۇشتەرگە، 7 مىڭنان استامى ۇلتتىق ۇلانعا، 2 مىڭ ادام ۇقك شەكارا قىزمەتىنە، شامامەن 400ء-ى توتەنشە جاعدايلار مينيسترلىگىنە جانە 300ء-ى مەملەكەتتىك كۇزەت قىزمەتىنە جىبەرىلەدى.

شاقىرۋ قاعازدارى قالاي كەلەدى؟

ازاماتتارعا شاقىرۋ قاعازدارى SMS حابارلامالار جانە eGov پورتالىنداعى حابارلامالار ارقىلى، كەلۋ كۇنىنە دەيىن كەمىندە ءۇش كۇن بۇرىن جىبەرىلەدى. مۇنداي حابارلاما رەسمي بولىپ سانالادى جانە ونى العان ازامات اسكەري كوميسسارياتقا نەمەسە شاقىرۋ پۋنكتىنە كەلۋگە مىندەتتى.

دالەلدى سەبەپسىز كەلمەگەن جاعدايدا زاڭ بويىنشا جاۋاپكەرشىلىك قاراستىرىلعان. جاعدايلارعا بايلانىستى ازاماتقا اكىمشىلىك ىقپال ەتۋ شارالارى قولدانىلۋى مۇمكىن، ال ادەيى شاقىرۋدان جالتارعان جاعدايدا قىلمىستىق جاۋاپكەرشىلىككە تارتىلادى.

اسكەرگە شاقىرىلۋشىلارعا قولداۋ شارالارى

قورعانىس مينيسترلىگى شاقىرىلۋشىلارعا كورسەتىلەتىن قولداۋ شارالارى تۋرالى دا ەسكە سالدى. اتاپ ايتقاندا، ولارعا نەسيە كانيكۋلدارى جانە ۇبت ناتيجەلەرىنە قاراماستان جوعارى وقۋ ورىندارىنا مەملەكەتتىك ءبىلىم گرانتتارىنا ءتۇسۋ مۇمكىندىگى بەرىلەدى. سونىمەن قاتار، قىزمەت كەزىندە ساربازدار قارۋلى كۇشتەر تۇرلەرىنىڭ كىشى مامانداردى دايارلاۋ وقۋ ورتالىقتارىندا جۇمىسشى ماماندىقتارىن الا الادى.

بۇعان دەيىن پرەزيدەنت توقايەۆ مەرزىمدى اسكەري قىزمەتىن وتەگەن اسكەري قىزمەتشىلەردى زاپاسقا شىعارۋ جانە 2026 جىلدىڭ ناۋرىز-ماۋسىم جانە قىركۇيەك-جەلتوقسان ايلارىندا ازاماتتاردى مەرزىمدى اسكەري قىزمەتكە كەزەكتى شاقىرۋ تۋرالى جارلىققا قول قويعان بولاتىن.