InfoHub Logo

قازاقستاندا مەديسينا سالاسىندا جاساندى ينتەللەكت (جي) پەن روبوتتاندىرىلعان جۇيەلەردى قولدانۋ قارقىن الىپ كەلەدى. بۇل جاڭالىقتار حيرۋرگيالىق وتالاردىڭ ساپاسىن ارتتىرىپ، ناۋقاستاردىڭ ساۋىعۋ پروسەسىن جەدەلدەتۋگە زور ۇلەس قوسادى.

بۇل تۋرالى Infohub.kz اقپارات اگەنتتىگى حابارلايدى.

مەديسيناداعى جاڭا ءداۋىر: روبوتتار مەن جي

جاساندى ينتەللەكت جانە روبوتتاندىرىلعان جۇيەلەر مەديسينادا، اسىرەسە حيرۋرگيادا ريەۆوليۋسيا جاساپ جاتىر. قازاقستاندا بۇل تەحنولوگيالار بىرتىندەپ ەنگىزىلىپ، دارىگەرلەرگە وتا جاساۋ كەزىندە كومەكشى قۇرال رەتىندە قىزمەت ەتۋدە. روبوتتار وپەراسيا كەزىندە ادام فاكتورىنان تۋىندايتىن قاتەلىكتەردى ازايتىپ، دالدىكتى ارتتىرادى. دەگەنمەن، بۇل تەحنولوگيالاردىڭ قاۋىپسىزدىگى مەن تيىمدىلىگى ءالى دە تالقىلانىپ جاتىر.

Da Vinciء-دىڭ ءىزباسارلارى: قازاقستانداعى روبوتتىق حيرۋرگيا

الەمدەگى العاشقى حيرۋرگيالىق روبوتتاردان باستاپ، بۇگىنگى تانىمال Da Vinci جۇيەسىنە دەيىن بۇل سالادا ۇلكەن جەتىستىكتەرگە قول جەتكىزىلدى. قازاقستاندا دا Da Vinci سياقتى روبوتتالعان جانە ناۆيگاسيالىق جۇيەلەر قولدانىسقا ەنگىزىلۋدە. ولاردىڭ قاتارىندا ROSA، MAKO، Cuvis، MISSO سياقتى روبوتتار بار. بۇل جۇيەلەر ۋرولوگيا، گينەكولوگيا، جالپى حيرۋرگيا، كارديوحيرۋرگيا جانە نەيروحيرۋرگيا سياقتى سالالاردا كەڭىنەن قولدانىلادى.

نەيروحيرۋرگيا مەن ومىرتقا حيرۋرگياسىندا قولدانىلاتىن StealthStation ناۆيگاسيالىق جۇيەسى مەن O-arm ينتراوپەراسيالىق توموگرافى وپەراسيا كەزىندە ناقتى باعىت-باعدار بەرىپ، حيرۋرگتىڭ جۇمىسىن جەڭىلدەتەدى.

ROSA: جاڭا مۇمكىندىكتەر

امەريكالىق Zimmer Biomet كومپانياسىنىڭ ROSA روبوتى بيىلدان باستاپ قازاقستاندا، اتاپ ايتقاندا استاناداعى «Green Clinic» كلينيكاسىندا قولدانىلا باستادى. جىل باسىنان بەرى بۇل روبوتتىڭ كومەگىمەن 30-دان استام ناۋقاسقا وتا جاسالدى. تراۆماتولوگ-ورتوپەد ەرسىن ءۇسىننىڭ ايتۋىنشا، روبوتپەن جاسالعان وتادان كەيىن ناۋقاستار تەز وڭالادى، سەبەبى يمپلانت پەن پروتەز ءدال قويىلىپ، بايلامدار مەن بۇلشىقەتتەر بىركەلكى بولادى.

روبوتپەن جۇمىس ىستەۋ ءۇشىن حيرۋرگتەر ارنايى دايىندىقتان ءوتىپ، سەرتيفيكات العان. وتا الدىندا ناۋقاستىڭ اياعىنا GPS-داچيكتەر قويىلىپ، كومپيۋتەرلىك توموگرافيا ناتيجەلەرى ەكرانعا شىعارىلادى. بۇل وپەراسيانى جوعارى دالدىكپەن جوسپارلاۋعا مۇمكىندىك بەرەدى.

MAKO جانە MISSO: حيرۋرگياداعى جاڭا اسسيستەنتتەر

MAKO robotic system بۋىننىڭ 3D مودەلىن جاساپ، يمپلانتتى جوعارى دالدىكپەن ورناتۋعا مۇمكىندىك بەرەدى. بۇل جۇيە الماتى قالاسىنداعى №4 قالالىق كلينيكالىق اۋرۋحاناسىندا قولدانىلادى. MAKO روبوتى يىق، شىنتاق، تىزە جانە جامباس بۋىندارىنا وتا جاساۋعا مۇمكىندىك بەرەدى. ونىڭ باستى ارتىقشىلىعى – وپەراسيانى الدىن الا جوسپارلاۋ جانە قاتەلىك ءقاۋپىن ازايتۋ.

MISSO – «اقىلدى حيرۋرگيالىق اسسيستەنت» رەتىندە بۋىنداردى ەندوپروتەزدەۋ وپەراسيالارىنا قاتىسادى. بۇل قۇرىلعى ق ر دەنساۋلىق ساقتاۋ مينيسترلىگىنىڭ مالىمەتىنشە، استاناداعى ۇلتتىق عىلىمي تراۆماتولوگيا جانە ورتوپەديا ورتالىعىندا قولدانىلادى.

جاۋاپكەرشىلىك جانە قاۋىپسىزدىك

قازاقستاندا مەديسينادا جي مەن روبوتتاردى قولدانۋ كەڭەيگەنىمەن، كلينيكالىق شەشىمدەر ءۇشىن جاۋاپكەرشىلىك ءالى دە دارىگەرلەرگە جۇكتەلەدى. قولدانىستاعى زاڭناماعا سايكەس، دياگنوز قويۋ مەن ەمدەۋ تاكتيكاسىن انىقتايتىن نەگىزگى تۇلعا – دارىگەر، ال تەحنولوگيالار تەك كومەكشى قۇرال بولىپ سانالادى. مەديسينادا قولدانىلاتىن بارلىق تەحنولوگيالار مىندەتتى تۇردە تىركەۋدەن ءوتىپ، ولاردىڭ كلينيكالىق تيىمدىلىگى، قاۋىپسىزدىگى جانە ىقتيمال تاۋەكەلدەرى جان-جاقتى باعالانادى.

ناۋقاستاردىڭ پىكىرى

روبوت ارقىلى وتا جاساۋعا كەيبىر ناۋقاستار قورقاتىنىنا قاراماستان، جي كومەگىمەن وتا جاساتقاندار اۋىرسىنۋ سەزىلمەيتىنىن جانە رەابيليتاسيانىڭ جىلدام وتەتىنىن ايتادى. مىسالى، ايگۇل قۋانجان قىزى مەن سوفيا اسقار قىزى ROSA روبوتى ارقىلى وتا جاساتىپ، اياق اۋرۋلارىنان ايىعىپ، بۇرىنعى قالپىنا ورالعاندارىن جەتكىزدى.

جي دياگنوستيكادا جانە يننوۆاسيادا

جي تەحنولوگيالارى مەديسينالىق كەسكىندەردى تالداپ، اۋرۋلاردى ەرتە كەزەڭدە انىقتاۋعا كومەكتەسەدى. مىسالى، ءسۇت بەزى وبىرى مەن كەۋدە قۋىسى اعزالارىنىڭ پاتولوگيالارىن انىقتايتىن جۇيەلەر ەنگىزىلگەن. وتاندىق ستارتاپتار دا مەديسيناداعى يننوۆاسيالىق شەشىمدەردى ۇسىنىپ ءجۇر. Cerebra، ImmuniGuide، NeuroGuard سياقتى جوبالار ءجي-دى قولدانىپ، دياگنوستيكا مەن ەمدەۋدى جاقسارتۋعا باعىتتالعان.

Astana Hub، QazInnovations جانە ساليدات قايىربەكوۆا اتىنداعى ۇلتتىق دەنساۋلىق ساقتاۋدى دامىتۋ ورتالىعى سياقتى ينستيتۋتتار تەحنولوگيالىق جوبالاردى دامىتۋعا قولداۋ كورسەتۋدە.