InfoHub Logo

ەلىمىزدەگى بانكتەر ەندى كليەنتتەرمەن جاڭاشا جۇمىس ىستەيتىن بولادى. قارجى نارىعىن رەتتەۋ جانە دامىتۋ اگەنتتىگى (قنردا) ازىرلەگەن جاڭا ەرەجەلەر جيناعى بانكتەر مەن كليەنتتەر اراسىنداعى قارىم-قاتىناستى تۇبەگەيلى وزگەرتىپ، «جاۋاپتى نەسيەلەۋ» ۇعىمىن ەنگىزەدى. سونداي-اق، الاياقتارمەن كۇرەس جوسپارلانعان.

بۇل تۋرالى Infohub.kz اقپارات اگەنتتىگى حابارلايدى.

الاياقتارمەن كۇرەس: جاۋاپ الۋ جانە اقشانى ۇستاپ قالۋ

ەندى بانكتەر بەت الپەتتى تەكسەرۋدى قامتيتىن بيومەتريالىق اۋتەنتيفيكاسياسىز ونلاين نەسيە بەرمەيدى. بۇعان قوسا، ينتەرنەت ارقىلى بەرىلەتىن كەپىلسىز نەسيە الدىندا بانك كليەنتتى انكەتالاۋى ءتيىس. وندا «نەسيە الۋعا كىم كەڭەس بەردى؟»، «قاۋىپسىزدىك قىزمەتىنەن حابارلاستى ما؟» دەگەن سياقتى سۇراقتار قويىلادى. جاۋاپتار كۇدىك تۋدىرسا، نەسيەدەن باس تارتىلۋى مۇمكىن.

ەگەر ونلاين نەسيەنىڭ سوماسى 255 اەك-تەن (ايلىق ەسەپتىك كورسەتكىش) اسسا، بانك اقشانى بىردەن ەمەس، 24 ساعاتتان كەيىن اۋدارادى. ال 150-دەن 255 اەك-كە دەيىنگى نەسيەلەر ءۇشىن، ەگەر الاياقتىق ءقاۋپى جوعارى بولسا، كەمىندە 8 ساعات كۇتۋگە تۋرا كەلەدى.

جۇبايىنىڭ كەلىسىمىمەن عانا نەسيە

ەندى 1000 اەك-كە (2026 جىلعى ەسەپپەن 4 325 000 تەڭگە) تەڭ نەمەسە ودان اساتىن كەپىلسىز قارىز سوماسى ءۇشىن بانك مىندەتتى تۇردە نەكە تىركەلگەنىن تەكسەرىپ، جۇبايىنىڭ رەسمي كەلىسىمىن تالاپ ەتەدى. كەلىسىمدى جازباشا، eGov ارقىلى نەمەسە بانك قوسىمشاسى ارقىلى بيومەتريامەن بەرۋگە بولادى.

بانك سىزگە نەسيە قاجەت ەمەس دەپ شەشۋى مۇمكىن

«قارىز الۋعا جارامدىلىقتى باعالاۋ» ءپرينسيپى ەنگىزىلەدى. بانك تەك تولەم قابىلەتىن عانا ەمەس، ءونىمنىڭ ءسىزدىڭ ماقساتىڭىزعا ساي ەكەنىن جانە زيان كەلتىرمەيتىنىن دە باعالايدى. ەگەر كليەنت شارتتار مەن تاۋەكەلدەردى تۇسىنبەسە، نەسيە قارجىلىق جاعدايدى ناشارلاتۋى ىقتيمال بولسا، نەمەسە ءيمپۋلسيۆتى شەشىم بەلگىلەرى بايقالسا، نەسيە «جارامسىز» دەپ تانىلىپ، باس تارتىلادى.

«كىشكەنتاي شريفتتەن» جانە قوسىمشا قىزمەتتەردى تاڭۋدان باس تارتۋ

بانكتەرگە جازا قولدانىلاتىن «ادىلەتسىز تاجىريبەلەر» ءتىزىمى ەنگىزىلەدى. ولارعا اقپاراتتى جاسىرۋ، ياعني شارتتاردى تۇسىنىكتى تىلمەن بايانداماۋ جانە نەسيە تەك ساقتاندىرۋ نەمەسە باسقا اقىلى قىزمەتتەردى ساتىپ العان جاعدايدا عانا بەرىلەدى دەگەن تالاپ قويۋ جاتادى. كليەنتكە كەلىسىمشارتقا قول قويماس بۇرىن ستاۆكا، ارتىق تولەم، مەرزىمدەر مەن تاۋەكەلدەر كورسەتىلگەن ەكى بەتتەن اسپايتىن قۇجات بەرىلۋى مىندەتتى.

ادەپتى بورىش جيناۋ

جاڭا ەرەجەلەر بورىشكەرلەرمەن جۇمىس ىستەۋدى قاتاڭ رەتتەيدى. زۆونوكتار مەن كەزدەسۋلەر تەك جۇمىس كۇندەرى ساعات 8:00-دەن 21:00-گە دەيىن، ال دەمالىس جانە مەرەكە كۇندەرى ساعات 9:00-دەن 19:00-گە دەيىن (تەك تەلەفون ارقىلى) جۇرگىزىلەدى. اپتاسىنا 3 رەتتەن ارتىق قوڭىراۋ شالۋعا نەمەسە بارۋعا بولمايدى. بارلىق اڭگىمەلەر جازىلادى.

بارلىعىنا قولجەتىمدىلىك

مۇمكىندىگى شەكتەۋلى جاندار ءۇشىن ارنايى تالاپتار قاراستىرىلعان. بانكتەر قولجەتىمدى قىزمەت كورسەتۋ ارنالارىن، سۋردواۋدارمانى پايدالانۋ مۇمكىندىگىن، بەيىمدەلگەن بانكوماتتاردى جانە سەنىمدى تۇلعا ارقىلى قىزمەت الۋدى قامتاماسىز ەتۋى ءتيىس.

جاڭا ەرەجەلەردىڭ كوپشىلىگى قۇجات رەسمي جاريالانعاننان كەيىن كۇشىنە ەنەدى، ءبىراق جۇيەلەردى تەحنيكالىق جاڭارتۋدى تالاپ ەتەتىن كەيبىر نورمالار 2026 جىلدىڭ 1 شىلدەسىنەن نەمەسە 2027 جىلدىڭ 1 قاڭتارىنان باستاپ قولدانىسقا بەرىلەدى.