InfoHub Logo

قازاقستاندىق عالىم، حيميا عىلىمدارىنىڭ كانديداتى، پروفەسسور ەرلان سۇلەيمەن حيميالىق ەلەمەنتتەردىڭ الەمدەگى العاشقى ينتەراكتيۆتى 4D-كەستەسىن جاساپ شىقتى. بۇل يننوۆاسيالىق تۋىندى ءبىلىم بەرۋ سالاسىندا جاڭا مۇمكىندىكتەر اشادى.

بۇل تۋرالى Infohub.kz اقپارات اگەنتتىگى حابارلايدى.

جاڭالىقتىڭ باستاۋى – وتباسى

بۇل يدەيانى عالىمنىڭ قىزى نۇريا ۇسىنعان. قىتايداعى عىلىم اكادەمياسىندا جۇمىس ىستەپ جۇرگەندە، قىزى بيلل گەيتستىڭ كابينەتىندەگى قاراپايىم 4D-كەستەنىڭ سۋرەتىن جىبەرگەن. وندا تەك ەلەمەنتتەردىڭ وزدەرى عانا كورسەتىلگەن ەدى. وسىدان كەيىن ەرلان سۇلەيمەن ودان دا مازمۇندى، ينتەراكتيۆتى نۇسقانى جاساۋعا بەل بۋادى.

ينتەراكتيۆتى كەستەنىڭ ەرەكشەلىكتەرى

كەستە قابىرعاعا ىلىنەتىن ستەند تۇرىندە جاسالعان. ءاربىر ۇياشىق بەلگىلى ءبىر حيميالىق ەلەمەنتكە سايكەس كەلەدى. ۇياشىقتاردىڭ ىشىنە سول ەلەمەنتتى قامتيتىن زاتتار، قوسىلىستار، مينەرالدار مەن بۇيىمدار ورنالاستىرىلعان.

ءار ۇياشىقتا QR-كود بار. ونى سمارتفونمەن سكانەرلەۋ ارقىلى حيميالىق ەلەمەنت تۋرالى قوسىمشا اقپارات الۋعا بولادى. ستەندتە سونداي-اق مۋلتيمەديالىق ەكران ورناتىلعان، وندا ءبىلىم بەرۋگە ارنالعان بەينەروليكتەر كورسەتىلەدى.

قازاقستاننىڭ گەوگرافياسىمەن بايلانىسى

بۇل كەستەنىڭ ەرەكشەلىگى – گەوگرافيالىق كومپونەنتتىڭ كىرىكتىرىلۋى. قازاقستان كارتاسىمەن بىرگە پايدالى قازبالاردىڭ كەن ورىندارى مەن ونەركاسىپ ورىندارى بەلگىلەنگەن. ۇياشىقتى اشقان كەزدە كارتادا ءتيىستى كەن ورنى نەمەسە وبەكت اۆتوماتتى تۇردە جارىقتانادى. بۇل وقۋشىلارعا قاي ەلەمەنتتىڭ قازاقستاندا قاي جەردە وندىرىلەتىنىن نەمەسە قولدانىلاتىنىن بىردەن كورۋگە مۇمكىندىك بەرەدى. مىسالى، مىس ۇياشىعى اشىلسا، جەزقازعان كەن ورنى، تەمىر تاڭدالسا، تەمىر كەنىن ءوندىرۋ ايماقتارى نەمەسە مەتاللۋرگيالىق كاسىپورىندار بەلگىلەنەدى.

ءبىلىم بەرۋدەگى ماڭىزى

ينتەراكتيۆتى ستەند حيميا، گەوگرافيا جانە ونەركاسىپتى ءبىر ءبىلىم بەرۋ كەڭىستىگىندە بىرىكتىرەدى. بۇل عىلىمدى وقىتۋعا دەگەن قىزىعۋشىلىقتى ارتتىرادى. سونىمەن قاتار، قازاقستاننىڭ تابيعي رەسۋرستارىن، ولاردىڭ گەوگرافيالىق ورنالاسۋىن جانە ونەركاسىپتىك يگەرىلۋىن كورنەكى تۇردە كورسەتۋ ارقىلى جاستاردىڭ بويىندا ەلدىڭ الەمدىك ەكونوميكاداعى ستراتەگيالىق ماڭىزىن تۇسىنۋگە جانە ۇلتتىق جەتىستىكتەرگە دەگەن ماقتانىش سەزىمىن نىعايتۋعا ىقپال ەتەدى.

بولاشاق جوسپارلار

بۇل جاڭالىق ق ر ۇلتتىق مۇراجايىنىڭ قىزىعۋشىلىعىن تۋدىرعان. مۇراجاي اكىمشىلىگى كەستەنى ەكسپوزيسياعا قويۋ مۇمكىندىگىن تالقىلاۋ تۋرالى حات جولداعان. قازىرگى تاڭدا كەستە ك. قۇلاجانوۆ اتىنداعى ۋنيۆەرسيتەتتىڭ تەحنوپاركىندە ورنالاسقان. اۆتوردىڭ پىكىرىنشە، بۇل ينتەراكتيۆتى كەستە ءبىلىم بەرۋ مەكەمەلەرىندە، مۇراجايلاردا جانە عىلىمي ورتالىقتاردا كەڭىنەن قولدانىس تاۋىپ، عىلىمدى ناسيحاتتاۋدىڭ زاماناۋي قۇرالىنا اينالۋى مۇمكىن.